Unachinyingika Nyi?

Mashinyi a mutapu uka apwile no Ka-Etiopia muze Fwilipe akundamine kuli iye?

LIJI lize analumbununa ngwo “temba” mu Mbimbiliya ya Chifuchi Chaha, mu limi lia Ngregu mulihasa kulumbunuka mashinyi eka ni eka. (Yili. 8:28, 29, 38) Chinasoloka ngwe mashinyi waze Ka-Etiopia te anazachisa kapwile anene, kuhiana matemba a jita hanji akuzomboka no. Tutalenu mumu liaka tunambe chocho.

Ka-Etiopia kapwile chilolo munene ku nguvulu yoze walingile wenyi usuku. Iye kapwile ni “chiteli chinene mu chiyulo cha Kandace, mwanangana wa pwo wa ku Etiopia. Chikwo nawa, kapwile ni chiyulo cha kufunga upite weswe wa mwanangana.” (Yili. 8:27) Etiopia yikulu yinachingi Sudão ya musono ni chihanda chikwo cha Engitu. Chipwe ngwe lunga yono kota kakendele mu mashinyi amuwika mu wenyi weswe, alioze kota kafupiwile mashinyi anene waze te makumbana yikwata yinji yize te mazachisa mu wenyi wacho usuku. Ku sekulu yitangu, mashinyi waze apwile ni kuzachisa chinji hanga ambachilemo atu kapwile ni maroda awana. Umwe mukanda wa kulumbununa Mbimbiliya unambe ngwo: “Mashinyi amutapu au kapwile ni chihela chinene cha kumbachila yikwata yinji, te kakukwasa atu ende kanawa mu wenyi usuku.

Ka-Etiopia te kanatange muze Fwilipe amukundamine. Mukanda wa Yilinga unambe ngwo: “Fwilipe yazomboka ni kukundama ku temba, yamwivwa [Ka-Etiopia] kanatange ni liji linene mukanda wa profeta Izaia.” (Yili. 8:30) Matemba waze te akulinga no wenyi usuku, kakaalingile hanga apwe ni kwenda kafuji-fuji. Kwenda chino hakehe-hakehe, kuchakahanyine wika uhashi kuli Ka-Etiopia atange yisoneko, alioze chakwashile nawa Fwilipe yoze te unende hashi ahete ku temba.

Ka-Etiopia “yeta kuli Fwilipe anyine mu temba atwame hamwe nenyi.” (Yili. 8:31) Matemba waze te akwenda fuji jinji akwa-kwendesa te keshi kutwama, kapwile ni kumana. Alioze temba lia wenyi lize ayo apwile, mwapwile chihela hanga Ka-Etiopia ni Fwilipe atwame.

Kulita ni yize twakutanga mu kapitulu 8 wa Yilinga ni sango jikwo nawa, mikanda yize twatuhwisa ha mashimbu wano, yakusolola Ka-Etiopia kanende mu amwe mashinyi anene kuhiana waze apwile ni kuzachisa ku jita hanji kuli akwa-kuzomboka.