MUTWE WA KULILONGESA 47
MWASO 103 Tufunga—Kali Yawana Kuli Atu
Mandumbu a Malunga—Shina Nunase Tachi Hanga Nupwe Makulwana a mu Chikungulwila?
“Nyi umwe lunga malikolweza hanga apwe mukulwana wa mu chikungulwila, kanazange mulimo upema.”—1 TIMO. 3:1.
YIZE MUTULILONGESA
Ha mutwe uno, mutumonaho yimwe yitanga ya mu Mbimbiliya yize ndumbu wa lunga atamba kupwa nayo nyi kanazange kupwa mukulwana wa mu chikungulwila.
1-2. “Mulimo uka upema” makulwana a mu chikungulwila akulinga?
NYI unakalakala ngwe kavumbi, kota unalikolweza hanga upwe ni yitanga yize muyikukwasa kupwa mukulwana wa mu chikungulwila. Shina unazange kulinga “mulimo upema” uze makulwana akulinga?—1 Timo. 3:1.
2 Mulimo uka makulwana akulinga? Ayo kakusongwela mulimo wa kwambujola, kakukalakala chinji hanga aye ni kumeneka mandumbu, kakulongesa ni kutakamisa chikungulwila kupalikila mu maliji ni mu yilweza yo. Twahasa kumona mumu liaka Mbimbiliya yakuvuluka malunga wano ngwo, yikilikita hanji ngwetu ‘yawana ya atu.’—Efwe. 4:8.
3. Yika ndumbu atamba kulinga mba apwe mukulwana wa mu chikungulwila? (1 Timoteu 3:1-7; Titu 1:5-9)
3 Yika ndumbu atamba kulinga mba apwe mukulwana wa mu chikungulwila? Ndumbu keshi kumutongola ngwe mukulwana wa mu chikungulwila, mumu lia kupwa wika niumwe utotombo. Kanji-kanji, mutu mba amutayize ku mulimo wa ku musunya, katamba kupwa ni utotombo uze mwenya mulimo akufupa. Alioze, kupwa mukulwana wa mu chikungulwila chalisa. Mba upwe mukulwana wa mu chikungulwila, kuwatambile wika kupwa mukwa-kwambujola mupema hanji kulongesa kanawa. Watamba nawa kupwa ni yitanga yize Mbimbiliya yakusolola ha 1 Timoteu 3:1-7; Titu 1:5-9. (Tanga.) Mutwe uno, muusolola yikuma yitatu yilemu yize akushimbwila hali makulwana a mu chikungulwila. Chitangu, kupwa ni lufuma mupema mu chikungulwila ni haze lia chikungulwila. Chamuchiali, kupwa mwata mupema mu usoko, ni chamuchitatu, kulihana hanga akalakalile chikungulwila.
PWAKO NI LUFUMA MUPEMA
4. Maliji kuhona “chitela cha kumusumina mulonga” yika analumbunuka?
4 Mba upwe mukulwana wa mu chikungulwila, watamba kupwa mutu yoze “keshi chitela cha kumusumina mulonga.” Maliji wano kanalumbunuka ngwo, watamba kupwa ni lufuma mupema mu chikungulwila, niumwe katambile kupwa ni chitela chakukulamikiza ngwo wakulinga yuma yipi. Chikwo nawa, watamba kupwa ni “lufuma mupema kuli akwa-haze.” Kwamba umwenemwene, atu waze keshi kuwayila Yehova mahasa kwamba yuma yipi ha yize wafuliela. Alioze ayo katambile kukakajana nyi uli mutu mupema nawa wakuhanjika umwenemwene. (Danie. 6:4, 5) Muhasa kulihula ngwe, ‘Shina ngukwete lufuma mupema mu chikungulwila ni haze lia chikungulwila?’
5. “Kuzanga yipema” yika chinalumbunuka?
5 Nyi uli “mukwa-kuzanga yipema,” mumona yitanga yipema ya akwenu ni kwachichimieka ha yitanga yacho. Mwalingila yuma yipema chipwe yize o keshi ni kushimbwila. (1 Tesa. 2:8; tala “mukwa-kuzanga yipema” ha nota ya estudo ha Titu 1:8.) Mumu liaka chili chilemu kuli makulwana a mu chikungulwila “kuzanga yipema”? Mumu ayo kakusa mashimbu jo hanga ameneke mandumbu ni kulinga milimo yikwo mu chikungulwila. (1 Petu. 5:1-3) Chipwe ngwe yino yakwaha milimo yinji, nihindu ayo kakuwahilila ha kukwasa akwo.—Yili. 20:35.
6. Kupwa “mukwa-kuzumbula ngeji” yika chinalumbunuka? (A-Hepreu 13:2, 16; tala nawa chizulie.)
6 Musolola ngwe uli “mukwa-kuzumbula ngeji” muze mulingila akwenu yuma yipema, kuchingako waze hi masepa je ko. (1 Petu. 4:9) Hakutwala kuli mutu yoze wakuzumbula ngeji, umwe mukanda unambe ngwo: “Pito lia zuwo lienyi ni lia mbunge yenyi, liatamba kupwa liawashi chipwe kuli yilambala.” Kashika, lihule ngwe: ‘Shina kangunyingika ngwe mutu yoze wakuzumbula atu waze akumeneka chikungulwila chetu?’ (Tanga A-Hepreu 13:2, 16.) Ndumbu yoze wakuzumbula ngeji, kakulianyina ni akwo yize ali nayo. Ngwe chilweza, kakuzumbula waze kechi kuhasa kumufunyishina chuma nichimwe, waze akwiza ni kulinga pande mu chikungulwila cho, ni tulayi a mbonge waze akukalakala chinji hanga asangulwise mandumbu.—Uputu. 18:2-8; Yishi. 3:27; Luka 14:13, 14; Yili. 16:15; Roma 12:13.
Lunga ni pwo waze akuzumbula ngeji kanatambwisa kalayi wa mbonge ni mukwo-pwo (Tala paragrafu 6)
7. Kuchi mukulwana wa mu chikungulwila mahasa kusolola ngwenyi, keshi “kuzanga mbongo”?
7 Katambile “kuzanga mbongo.” Maliji wano kanalumbunuka ngwo, kuwatambile kulihulikila chinji ha kufupa yuma ya ku musunya. Chipwe ngwe uli pichi hanji chiswale, nihindu watamba kusa Wanangana wa Zambi ha chihela chitangu ku mwono we. (Mateu 6:33) Watamba kusa mashimbu ni tachi hanga uwayile Yehova ni yuma yeswe yize uli nayo, ufunge asoko je ni kulingila chikungulwila. (Mateu 6:24; 1 Yoa. 2:15-17) Kashika lihule ngwe: ‘Kuchi nakunyonga hakutwala ku mbongo? Shina nakuwahilila ni yuma yize nguli nayo? Nyi shina nakulihulikila wika ha kufupa mbongo ni yikumba yinji?’—1 Timo. 6:6, 17-19.
8. Mu majila aka muhasa kusolwelamo ngwo, uli “mukwa-yitanga yipema,” nawa “mukwa-kusuula”?
8 Kupwa “mukwa-yitanga yipema” nawa “mukwa-kusuula,” chinalumbunuka ngwo, wakulinga yuma yeswe ku mwono we ni kulita. Ngwe chilweza, kuushi kuhianyisa ha kulia ni kunwa, wakuzala mazalo alita, wakululieka kanawa kambu ni kusakula yiheho yalita. Kuushi kwimbulula yitanga ya atu waze keshi kuwayila Yehova. (Luka 21:34; Tia. 4:4) Wakuhasa kulihumikiza chipwe muze akwenu akukwihia hanji muze akuhona kukusolwela umbovu. Kuushi “kuzengewa” chipwe kukunyingika ngwo, uli mutu yoze wakunwa walwa unji. Kashika lihule ngwe, ‘Shina mwono wami wakusolola ngwo nguli ni yitanga yipema, nawa nguli mukwa-kusuula?’
9. Yika chinalumbunuka kupwa “mukwa-mana” ni “kululieka yuma kanawa”?
9 Nyi uli “mukwa-mana,” mulinga yuma yeswe ku mwono we ha kukaula shimbi ja mu Mbimbiliya. Muhengwola kanawa shimbi jacho ha hita chikuma ni kuwana ulumbunwiso walita. Kuuchi kukwata chiyulo shimbu kanda uchinyingika sango jeswe. (Yishi. 18:13) Mumu lia chino, mukwata yiyulo yize yinalite ni manyonga ja Yehova. Alioze kupwa mukwa “kululieka yuma kanawa” chinalumbunuka ngwo, watamba kusa hita chuma mu chihela chacho ni kuvumbika mashimbu. Atu katamba kukunyingika ngwo, uli mutu yoze wakukaula usongwelo, yoze mahasa kujikijila. Yitanga yino, muyikukwasa kupwa ni lufuma mupema. Haliapwila tutalenu yitanga ya mu Mbimbiliya yize mukulwana atamba kupwa nayo, mba apwe mwata mupema mu usoko.
PWAKO MWATA MUPEMA WA MU USOKO
10. Kuchi lunga mahasa “kusongwela kanawa usoko wenyi”?
10 Nyi ngwe hiunambata mba unazange kupwa mukulwana wa mu chikungulwila, lufuma wa usoko we neye kali mulemu. Kashika, watamba “kusongwela kanawa usoko we.” Maliji wano kanalumbunuka ngwo, watamba kufunga usoko we ni zango ni kukwata yiyulo yize muyiyukisa eswe mu usoko. Chikwo nawa, watamba kusongwela uwayilo wa mu usoko, kusa shindakenyo ngwo asoko je kakuya ku kukunguluka cheswe, ni kwakwasa hanga apwe ni kwambujola. Mumu liaka chino chili chilemu? Mumu postolo Paulu kambile ngwenyi: “Nyi mutu keshi kuhasa kusongwela kanawa usoko wenyi, kuchi mahasa kufunga chikungulwila cha Zambi?”—1 Timo. 3:5.
11-12. Nyi ndumbu kanazange kupwa mukulwana wa mu chikungulwila, mumu liaka lufuma wa ana jenyi kali mulemu? (Tala nawa chizulie.)
11 Nyi uli chisemi, ana je waze kanda achikumbanyisa miaka 18 ali mu chiyulo che, “katamba ku kuzeyela ni vumbi lieswe.” Watamba kwalongesa ni kwafumba ni zango. Kwamba pundu, unazange hanga ana je awahilile ni kulivwisa kuwaha ngwe chize twanuke akwo akulinga. Alioze fumbo lize mwaaha muliaakwasa ononoke, asolole vumbi ni kupwa ni yitanga yipema. Chikwo nawa, watamba kulinga yize muhasa hanga ukwase ana je apwe ni usepa upema ni Yehova, akaule shimbi ja mu Mbimbiliya ni kujama hanga aapapachise.
12 “Ana jenyi katamba kupwa akwa-kufuliela, hi akwa-lufuma mupi ko hanji akwa-kukolema.” Nyi mwana yoze uli Chela cha Yehova malinga shili yinene, kuchi chino muchikwata hali tato? Nyi tato kakamufumbile ni kumwaha ukwaso uze te anafupu, iye kechi kununga nawa ni kupwa mukulwana wa mu chikungulwila.—Tala Kaposhi wa Kutalila 15 Outubro, 1996, lifwo 21, paragrafu 6-7.
Miata a mu usoko katamba kufumba ana jo hanga akalakalile Yehova ni chikungulwila (Tala paragrafu 11)
KUKALAKALILA CHIKUNGULWILA
13. Kuchi muhasa kusolola ngwo uli “chimbovu,” nawa hi uli “mukwa-pami” ko?
13 Mandumbu waze akwete yitanga ya Ukristu, kakuyukisa chinji chikungulwila. Mutu yoze wapwa “chimbovu” kakusa tachi hanga anehe sambukila. Nyi unazange atu akunyingike ngwo uli chimbovu, watamba kupwa ni kupanjika akwenu ni kutayiza manyonga jo. Ngwe chilweza, nyi nuli ha kukunguluka cha makulwana, mba makulwana anji matayiza chiyulo chize chinalite ni shimbi ja mu Mbimbiliya, shina yena muchitayiza chipwe ngwe uli ni nyonga lieka? Kuwatambile kupwa “mukwa-pami” hanji ngwetu, kulikwachilila ha kulinga yuma ngwe chize wakuzanga. Watamba kulemesa ni kuvumbika manyonga ja akwenu. (Uputu. 13:8, 9; Yishi. 15:22) Kuwatambile kupwa “mukwa-mbwaja” hanji “mukwa-kutenuka ni kwashi.” Shimbu upwe ni kulihangujola ni akwenu mashimbu eswe, watamba kupwa mutu mwashi ha kuhanjika no kanawa. Nyi wapwa mukwa-sambukila, muosa tachi hanga uliange kuneha sambukila chipwe muze yuma muyikaliwa. (Tia. 3:17, 18) Nyi wahanjika kanawa ni akwenu, kuchingako atu waze akulimika ni ufulielo wetu, chino muchaakwasa alihumikize.—Kuyu. 8:1-3; Yishi. 20:3; 25:15; Mateu 5:23, 24.
14. Yika chinalumbunuka kuhona “kupwa mutu mwaha mu ufulielo” ni “kushishika”?
14 Mba ndumbu ajame ni kupwa mukulwana, “katambile kupwa mutu mwaha mu ufulielo.” Chipwe ngwe kuwafupiwile kupwa ni miaka yinji ya upapachiso, alioze kwatamba kupalika amwe mashimbu hanga upwe Mukwa-Kristu yoze wajama. Shimbu kanda achikutongola ngwe mukulwana, chizechene ngwe Yesu, watamba kusolola ngwo wakulikehesa ni kulihumikiza ha kushimbwila muli Yehova hanga akwehe chiteli cheswacho mazanga. (Mateu 20:23; Fwili. 2:5-8) Muhasa kusolola ngwe “washishika,” ha kukakaminya kuli Yehova ni ku shimbi jenyi ja mu Mbimbiliya ni kwononokena usongwelo uze akutwaha kupalikila mu ululikiso wenyi.—1 Timo. 4:15.
15. Shina mukulwana wa mu chikungulwila katamba kupwa ni kulinga pande ja lukundwila? Lumbununa.
15 Mbimbiliya yakusolola ngwo, makulwana a mu chikungulwila katamba kupwa ni “utotombo wa kulongesa.” Shina chino chinalumbunuka ngwo, makulwana eswe mu chikungulwila katamba kulinga pande ja lukundwila? Ka. Makulwana anji ajama chipwe ngwe keshi ni utotombo wa kulinga pande mu chikungulwila, nihindu kakulongesa kanawa mu mulimo wa kwambujola ni ha kumeneka mapanga. (Tala ‘utotombo wa kulongesa’ ha nota ya estudo ha 1 Timoteu 3:2; tesa ni 1 A-Korindu 12:28, 29; A-Efwesu 4:11.) Chipwe ngwe kuwatambile kupwa ni kulinga pande ja lukundwila, nihindu watamba kusa tachi hanga upwe ni kulongesa kanawa. Kuchi muhasa kuchilinga?
16. Kuchi muhasa kupwa longeshi mupema? (Tala nawa chizulie.)
16 “Kulikwachilila ku liji lia umwenemwene.” Mba upwe longeshi mupema, kalakalisa Mbimbiliya mashimbu eswe mufupa kulongesa, chipwe muze muhana yiyulo. Lilongese chinji Mbimbiliya ni mikanda yetu. (Yishi. 15:28; 16:23 tala “kulikwachilila ku liji lia umwenemwene” ha nota ya estudo ha Titu 1:9.) Muze mulilongesa, sako shindakenyo ha chize mikanda yetu yakulumbununa yisoneko hanga ukayilumbunune mu jila yalita. Chikwo nawa, muze mulongesa, sako tachi hanga ukwate ku mbunge ya waze anakupanjika. Muhasa nawa kululieka utotombo we wa kulongesa, ha kwita ni kukaula yiyulo ya makulwana akwo waze ajama. (1 Timo. 5:17) Makulwana a mu chikungulwila katamba kusa tachi hanga ‘atakamise’ mandumbu jo; alioze ha mashimbu amwe, ayo katamba kuhana yiyulo kuli mandumbu jo hanji lume “kwakumika.” Chipwe chocho, katamba kuchilinga ni umbovu. Nyi wapwa mutu mwashi, mukwa-zango nawa wakukalakalisa Mbimbiliya ha kulongesa, muopwa longeshi mupema mumu mwimbulula Longeshi Munene, Yesu.—Mateu 11:28-30; 2 Timo. 2:24.
Kavumbi kanasolola chize mahasa kulongesa kanawa kupalikila mu Mbimbiliya, muze ali ni umwe mukulwana wajama. Kavumbi kanalijilisa pande jenyi kulutwe lia katalilo (Tala paragrafu 16)
NUNGA NI KULINGA YIZE MUHASA
17. .(a) Yika muyihasa kukwasa tuvumbi anunge ni kusa tachi hanga apwe makulwana? (b) Yika makulwana atamba kunyingika muze anahengwola umwe ndumbu hanga amwehe chiteli? (Tala mushete, “Kanda Ushimbwila Ungunu Kuli Akwenu.”)
17 Hanyima lia kuhengwola yize yakufupiwa mba ndumbu apwe mukulwana wa mu chikungulwila, tuvumbi amwe mahasa kunyonga ngwo, kechi kuhasa kupwa ni yitanga yacho mba apwe makulwana. Alioze iwuluka ngwe, chipwe Yehova hanji ululikiso wenyi keshi kushimbwila ngwo mandumbu katamba kupwa angunu ha kusolola yitanga yacho. (1 Petu. 2:21) Chikwo nawa, spiritu yisandu ya Yehova muyikukwasa hanga upwe ni yitanga yino. ( Fwili. 2:13) Shina kuli chimwe chitanga chize watamba kululieka? Nyi uli nacho, lemba kuli Yehova hakutwala ku chitanga chacho. Hengwola hakutwala ku chitanga chino ni kwita ukwaso wa umwe mukulwana wa mu chikungulwila ha chize muhasa kuchilulieka.
18. Yika tuvumbi eswe mu chikungulwila atamba kulinga?
18 Yetu eswe, kuchingako makulwana a mu chikungulwila, twatamba kununga ni kusa tachi hanga tupwe ni yitanga yize twahengwola ha mutwe uno. (Fwili. 3:16) Shina uli kavumbi? Nyi uli kavumbi, kanda usulila hazehene, eta kuli Yehova hanga akufumbe ni kukukwasa uhase kukalakala chinji mu chikungulwila. (Iza. 64:8) Pundu lume, Yehova mawahisa tachi je hanga ujame ni kukutongola ngwe mukulwana mu chikungulwila.
MWASO 101 Tulinunge ni Kuzachila Hamuwika