Yize Muyikukwasa Kulilongesa Mashimbu Eswe
SHINA chakukukalila kulilongesa Mbimbiliya hita poso? Shina ha mashimbu amwe wakwivwa uswelele wa kulilongesa Mbimbiliya? Ha mashimbu amwe, yetu eswe che twakulivwa. Alioze achinyonga ha yuma yize twakulinga mashimbu eswe ngwe, kusana. Kusana chakufupiwa mashimbu ni tachi, chipwe chocho, muze twakusana twakulivwa kanawa. Longeso lia Mbimbiliya mutuhasa kulitesa ni “kusana meya.” (Efwe. 5:26) Tala yikuma yize muyihasa kukukwasa:
Linga katalilo. Longeso lia Mbimbiliya lili mukachi ka “yuma yahiana ulemu” yize Mukwa-Kristu katambile kulengulula. (Fwili. 1:10) Mba uhone kuvulama tangwa ni ola yize wa kulilongesa, yisoneke ha limwe papilo ni kuyisa ha chihela haze muchipwa chashi kuyimona. Chuma chikwo chize muchikukwasa, chili kusa alarme mu telefone yize muyikwiulula maola a kulilongesa.
Sakula mashimbu ni chize muzanga kulinga longeso lie. Shina wakuhasa kulihumikiza ha mashimbu anji muze unalilongesa, nyi ha mashimbu akehe alioze ha yisuho yinji? Yena mwene mwe unalinyingika. Kashika, linga katalilo kulita ni uhashi we. Nyi kuushi kuzanga kulilongesa ha ola yize watesele, muhasa kulilongesa ha minutu kumi. Kulilongesa ha minutu kumi chili chipema kuhiana kuhona kulilongesa. Nyi waputuka, chino muchihasa kukukwasa kupwa ni chako chakulilongesa.—Fwili. 2:13.
Sakula yize mulilongesa. Nyi washimbwila ndo ha shimbu lize watesele kulilongesa mba usakule yize mulilongesa, acho ‘unakisa mashimbu je.’ (Efwe. 5:16) Linga katalilo wa yikuma yize muzanga kulilongesa. Ngwe chilweza, nyi uli ni chimwe chihula hakutwala ku yize kuyishi kukulumbunuka kanawa, soneka chikuma chacho ha katalilo yoze walinga. Kusongo lia hita longeso, muhasa kuwezela ha katalilo yikuma yikwo yize unazange kulilongesa.
Alumuna yize muhasa nyi muchifupiwa. Eseka kwalumuna yimwe ha katalilo we, ngwe mashimbu waze wakupalikisa ha kulilongesa hanji yikuma yize wakusakula. Chuma chilemu chili ngwo, watamba kulilongesa ha poso jeswe. Mba uchilinge, nyi muchilita alumuna tangwa ni ola yize wakulilongesa, mashimbu waze wakupalikisa ha kulilongesa hanji yikuma yize wakulilongesa.
Nyi walilongesa ha poso jeswe, usepa we ni Yehova muukola chinji, mulilongesa kukwata yiyulo yipema, chikwo nawa, mulivwa kanawa.—Yoshu. 1:8.