Fupa Chihela Chipema Chize Mulilongesela

Shina unazange upwe ni kuyuka chinji ha longeso lie lia wika? Muhasa kukaula yikuma yili mushi, hanga upwe ni kuyuka chinji ha longeso lie lia wika.

• Sakula chihela chalita. Nyi muchilita, fupa chihela chipema chize chinatemuka kanawa. Muhasa kutwama ku mesa, hanji kufupa chimwe chihela chipema haze lia zuwo.

• Yako ku chihela kuze mupwa ukawe. Yesu kasakwile kulemba “ha chimenemene” ku chihela “kwaukawenyi.” (Marku 1:35) Nyi kuwahashile kupwa ukawe, lweza asoko je hanji waze watwama no ku zuwo, anyingike mashimbu waze mulilongesa ni kwaeta hanga ahone kukupinjisa ha mashimbu jacho.

• Lihulikile ha yize unalilongesa. Ehuka yuma yize muyikupinjisa. Nyi mulilongesa kupalikila mu telefone hanji tablet, tepulula zungo hanji kuyisa ha kachilayi ka ndeke (modo de voo) hanga yihone kukupinjisa. Muze unalilongesa, nyi mwiuluka chimwe chuma chize watamba kulinga, chisoneke hanga uchilinge muze muuhwisa kulilongesa. Nyi mumona ngwo kuwahashile kulihulikila ha malongeso, mana ndambu hanga wolole molu.