Kupwa ni Sambukila Chipwe Ngwe Kuchili Jita ni Mbwanja
Gary yoze wanjilile mu mulimo wa uswalale kambile ngwenyi: “Shimbu te kanda nguchiputuka kulilongesa Mbimbiliya, chakanyingikine mumu liaka atu azangile kulinga yuma yipi, kuhona kusolola ululi ni mumu liaka hashi heswe hanapiha chocho. Haliapwila nguli ni sambukila ya ku mbunge. Chikwo nawa, ngunanyingika ngwami, Yehova Zambi makaneha sambukila hano hashi.”
Atu anji che akulivwa hi wika ko Gary. Tala chize Mbimbiliya yakwashile atu anji.
MBIMBILIYA YAKWAMBA NGWO: “Mumu yena Mwene uli mupema, uli mukwa kukonekena.”—Samu 86:5.
CHIZE VERSU YINO YAKUKWASA: “Versu yino yakungwaha shindakenyo ngwami, Yehova kali mukwa-keke. Ngunanyingika nawa ngwami, iye kangukonekena ha shili yize nalingile ku mashimbu akunyima, muze nakwashile ku jita.”—Wilmar, wa ku Colômbia.
MBIMBILIYA YAKWAMBA NGWO: “Mungutanga lilu liaha ni hashi haha, ni yuma ya kushi kechi kayiwuluka nawa, chipwe kuyinyonga.”—Izaia 65:17.
CHIZE VERSU YINO YAKUKWASA: “Nakupinda chinji ni manyonga api mumu lia yuma yipi yize nalingile ku jita. Alioze maliji a versu yino kakungwiwulula ngwami, Yehova makangukwasa nguvulame manyonga wano api nakupwa no. Keshi kanunga nawa mu mbunge yami. Chino chili chiwape chinene chinji kuli yami!”—Zafirah, wa ku Estados Unidos.
MBIMBILIYA YAKWAMBA NGWO: “Ha matangwa jenyi akwa ululi kumakawaha, kulumbama cha sambukila ndo kakweji wakuhi nawa.”—Samu 72:7.
CHIZE VERSU YINO YAKUKWASA: “Nakunyonga chinji ha maliji wano. Kwasala hakehe, manyonga api waze nakupwa no mumu lia yize napalikile ku jita, makapalika. Chikwo nawa, kutushi keza kalihulumba ni ukulungunga wa asoko jetu waze hanafu muze makaahindwisa.”—Oleksandra, wa ku Ucrânia.
MBIMBILIYA YAKWAMBA NGWO: “Afu jenu makahinduka ni mwono. . . . Enu eswe nwaya ku fufuta, laulenu nukembe ni uwahililo!”—Izaia 26:19.
CHIZE VERSU YINO YAKUKWASA: “Asoko jami kafwile muze atu eswe a mu munyachi wa Tutsi aashihile. Alioze chisoneko chino chinangwehe shindakenyo ngwami, mungukaamona cheka. Ngunashimbwila kwivwa maliji jo a uwahililo muze makaahindwisa!”—Marie, wa ku Ruanda.
MBIMBILIYA YAKWAMBA NGWO: “Mumu kwasala hakehe mba yingulungulu hi akuhi . . . Alioze yimbovu kumahinga chifuchi. Kumawahilila mu kulumbama cha sambukila.”—Samu 37:10, 11.
CHIZE VERSU YINO YAKUKWASA: “Chipwe ngwe jita yahwile, nihindu kuchili atu waze akulinga yuma yipi. Versu jino jakungutakamisa chinji. Yehova kakumona yuma yeswe ni kunyingika chize ngunalivu. Iye kanatulakenya ngwenyi, lamba lieswe mulikahwa mba mutukalivulama.”—Daler, wa ku Tajiquistão.
Atu anatongola hano kali tununu ja Yela ja Yehova waze awanyine ukwaso wa mu Mbimbiliya ni kupwa ni sambukila. Ayo yakumba katonde, yuma ya mafwefwe, mianda ni yitanga yo yipi. (A-Efwesu 4:31, 32) Yela ja Yehova keshi kulinjisa mu yuma ya mafwefwe chipwe kulinga yuma ya upupilo.
Yela ja Yehova kakulisolwela zango umwe ni mukwo. (Yoano 13:35) Ngwe chilweza, Oleksandra, yoze twatongola ku uputukilo, kachinyine ku chifuchi cheka hamwe ni ndumbwenyi mumu lia jita. Iye yamba ngwenyi: “Muze twaheteleko, yitumona mandumbu jetu waze ejile kawashi-washi ni kutupatwiza. Ukwaso wo watukwashile chinji kwejilila ni yuma yaha ya mu chifuchi cho.”
Tunakusanyika hanga ukunguluke hamwe ni yetu ha kukunguluka chetu kuze mulilongesa hakutwala ku sango ja sambukila ja mu Mbimbiliya ni kumona chize muhasa kujikaula ku mwono we. Njila ha site jw.org mba uwane chihela cha kulikungulwilamo chili hakamwihi ni yena hanji kwita longeso lia Mbimbiliya kuli umwe Chela cha Yehova ha mukanda Wahilila ku Mwono ku Miaka Yeswe!