Yihula ya Waze Akutanga Mikanda Yetu

Shimbu lika mulimo wa kwambujola sango jipema muukahwa?

Yesu kambile ngwenyi: “Sango jino jipema ja Wanangana kumakajambujola hashi heswe, jikapwe shindakenyo ku mavungu eswe, mba songo mulikeza.” (Mateu 24:14) Liji lia Ngregu telos analumbununa ngwo songo, lize lili ha versu 14 ni ha versu 6 ni 13, linatale ha songo lia chifuchi chino cha Satana chize makanongesa ha Armagedone. (Uso. 16:14, 16) Chino chinalumbunuka ngwo, mutununga ni kwambujola sango jipema ja Wanangana wa Zambi ndo hakamwihi ni songo liacho. Uno uli ulumbunwiso waha twapwa nawo ha chikuma chino.

Kunyima twapwile ni kwamba ngwetu, mulimo wetu wa kwambujola sango jipema, muuhwa muze luyinda munene maputuka ni unongeso wa Babilonia Yinene. (Uso. 17:3, 5, 15, 16) Twapwile ni kutayiza ngwetu, kuputuka cha luyinda munene, te muchisa songo ha “mwaka wa vumbi lia Yehova,” hanji ngwetu, shimbu lize Yehova te mahana kuli atu uhashi wa kutayiza sango jipema. (Iza. 61:2) Twapwile nawa ni kunyonga ngwetu, atu waze ashishikile kuli Yehova shimbu luyinda munene te kanda achiputuka, e wika makanunga ni mwono hanyima lia luyinda munene. Atu jacho, te twakwatesa ni A-Yunda waze alamwinyine ha unongeso wa Yerusaleme ha mwaka 607 K.M.J. A-Yunda wano, kaasakwile anunge ni mwono mumu te kakuwayila Yehova, nawa kapwile ni kuvwila lwaji yuma yipi. (Eze. 5:11; 9:4) Alioze, ulumbunwiso uno kuwalitele ni maliji a Yesu waze ali ha Mateu 24:14, waze akusolola ngwo, atu hanji makapwa ni uhashi wa kutayiza sango jipema muze hikwasala hakehe hanga Armagedone yihwe.

Ulumbunwiso uno waha twapwa nawo ha Mateu 24:14, walumuna nawa ulumbunwiso uze twapwile nawo ha sango ja usopeso jili ha Usolwelo 16:21, jize akutesa ni mawe anene-anene a chiwe. Kuhengwola chize twalinga, chasolola ngwo yisoneko yino yaali, yakulumbununa chuma chimuwika. Mu mutapu uka? Chuma chize chakutukwasa kunyingika chikuma chino, chili yize Mbimbiliya yakwamba hakutwala ku chize atu akumona sango ja Wanangana. Postolo Paulu kasonekene ngwenyi: “Mukachi ka waze ali mu jila ya ulamwino,” sango jacho te mujipwa jipema ngwe “vumba lia mwono.” Alioze kuli akwa-kole ja Zambi, te mujipwa sango jipi ngwe “vumba lia kufwa.” (2 Kori. 2:15, 16) Akwa-Kole wano keshi kuzanga sango ja Wanangana mumu jakuhanjika umwenemwene ngwo, chifuchi chize o akuzanga chili chipi, kakuchiyula kuli Satana nawa kwasala hakehe machinongesa.—Yoa. 7:7; 1 Yoa. 2:17; 5:19.

Chili chilemu kunyingika ngwetu, Usolwelo 16:21, wakwamba nawa ngwo, munyiko wa chiwe te muupwa “unene.” Chino kota chinalumbunuka ngwo, ha mashimbu a luyinda munene, mulimo wa kwambujola muukakola chinji, hanji ngwetu, jina lia Yehova makalinyingikisa kuhiana musono. (Eze. 39:7) Shina ha mashimbu jacho, muze Babilonia Yinene makayinongesa atu makazanga chinji sango jipema ngwe chize akuzanga vumba lipema? Chino muchihasa kulingiwa. O hanji makeuluka ngwo ha miaka yinji, Yela ja Yehova te kakwambujola hakutwala ku unongeso wa uwayilo wa mahuza.

Yino, yinatwiulula yize yalingiwile mu Engitu ya kushakulu hanyima lia yilungo kumi. Muze Zambi apatwilile “tuzambi tweswe twa Engitu,” atu anji waze te hi A-Izalele ko, yalichinga hamwe ni A-Izalele. (Kutuhu. 12:12, 37, 38) Kota muze amwene ngwo yuma yeswe yize Mose ambile hakutwala ku yilungo kumi yamanunukine, atu jacho yasakula kupwa sali lia Yehova.

Hanyima lia unongeso wa Babilonia Yinene, mutu mweswawo makapwa ku sali lia Yehova makapwa ni chiwape cha kukwasa mandumbu ja Kristu waze makapwa hano hashi ha mashimbu jacho. (Mateu 25:34-36, 40) Kwamba pundu, kusopesa atu ngwe mapanga, muchikahwa muze mukukasala hakehe hanga Armagedone yiputuke. Ha shimbu liacho he Akwa-Kristu akuwahisa waze makapwa hano hashi, makatambula fweto yo ya kuya mwilu.

Ulumbunwiso uno waha, unasolola zwalala zango ni keke ya Yehova. Kwamba pundu, iye kazangile hanga mutu ‘niumwe atoke, alioze kanazange hanga eswe alikonyeke.’—2 Petu. 3:9.