Uwahililo wa Kupwa ni Mwono Washi

DANIEL NI MIRIAM kalimbachile ha Setembro 2000 nawa kapwile ni mwono upema mu Barcelona, Espanha. Daniel yamba ngwenyi: “Milimo yize twapwile nayo te yakutukwasa kuya ni kulia mu restaurante jipema, kulinga wenyi nawa ni kulanda mazalo apema. Yetu nawa te twakuya mashimbu eswe mu mulimo wa kwambujola.” Alioze chimwe yichilingiwa.

Ha chimwe kukunguluka cha mambonge cha 2006, Daniel yapanjika jimwe pande, chocho yalihula ngwenyi: “Shina tunase tachi hanga tukwase waze ‘anambe kwaashiha’ ende mu tapalo ya mwono wa mutolo?” (Yishima 24:11) Pande yijilumbununa ngwo tuli ni chiteli cha kwambujola sango jamu Mbimbiliya mumu mwono wa atu he unatale. (Yilinga 20:26, 27) Daniel yamba ngwenyi, “Napwile ni kwivwa ngwe Yehova kanahanjika ni yami.” Pande yijamba nawa ngwo twakwivwa chiseke muze mutukalakala chinji mu mulimo wa Yehova. Daniel yanyingika ngwenyi, maliji wano te amwenemwene, mumu te kakumona Miriam, yoze te pionelu mawahilila ku mwono.

Pande jacho jakwachile chinji ku mbunge ya Daniel, chocho yakwata chiyulo chinene cha kwalumuna mwono wenyi. Yaputuka kukalakala ha maola akehe, yapwa pionelu, nawa yanyonga ha uwahililo uze te mapwa nawo iye ni Miriam nyi maya ni kwambujola kuze kunafupiwa chinji akwa-kwambujola Wanangana.

CHITANGU YIPIKALO—MBA HI KUSULA LUSANGO WA CHISEKE

Ha Maio 2007, Daniel ni Miriam yecha milimo yo yaya ku Panamá, chifuchi chize aliangile kumeneka. Njiza yo te yapwa ya matungu eka ni eka mu kalunga-lwiji Caride. Atu anji atwamamo kali Guaymi. Daniel ni Miriam yanyonga ngwo te mahasa kupwa mu Panamá ha tukweji nake ni mbongo jize apwile najo.

Ayo yenda mu matungu hakuzachisa wato ni kinga. Ni haliapwila machewuluka tangwa litangu lize endele ha kinga tando 30 ja kilometro kupalikila ha milundu, nawa kwilu kwapwile ni kusasaminya chinji. Daniel kapwile ni kuhonga chinji yamba kulezumuka. A-Guaymi waze apwile ni kuwana te kakwaazumbula kanawa, chipi-chipi muze te ayo akulilongesa amwe maliji a limi lio. Ha mashimbu akehe ayo yapwa ni alongi a Mbimbiliya 23.

Yika yalingiwileko muze mbongo jize apwile najo jahwile? Daniel yamba ngwenyi: “Ni masoji mu meso, yinguputuka kunyonga ha chize mutufuna ku Espanha. Twapwile ni kwivwa yikola ku mbunge ha kuhichika alongi jetu a Mbimbiliya.” Alioze hakupalika cha kakweji umuwika, ayo yatambula lusango wa chiseke. Miriam ngwenyi: “Yatusanyika hanga tukalakale ngwe mapionelu alipwila. Tunakawahilila chinji ha kununga mu mulimo wetu!”

UWAHILILO WO UNENE

Mumu lia kwalumuka cha yuma mu ululikiso, Daniel ni Miriam yecha mulimo wa pionelu walipwila ha mwaka 2015. Haliapwila yika te malinga? Ayo yafuliela chilakenyo chili ha Samu 37:5, chakwamba ngwo: ‘Kunjika jila ye kuli Yehova; mufuliele iye, mba makukwasa.’ Ayo yawana mulimo uze wakwaakwasa kukalakala ngwe pionelu, haliapwila kali mu chikungulwila mu Veraguas, Panamá.

Daniel yamba ngwenyi: “Muze te kanda tuchihichika Espanha, kutwakapwile ni shindakenyo nyi te mutuhasa kupwa ni mwono washi. Haliapwila tunahase, nawa kutwahonene yuma yize yikwete ulemu ku mwono.” Mba uwahililo wo unene kulihi unakatuka? Ayo yamba ngwo: “Kukwasa atu waze alikehesa hanga anyingike Yehova chili uwahililo unene.”