APOCALIPSIS

Nau kartaɗe Juanba naa ɓʉɗa

1 Mʉ Jesucristo baita bari trajabarii Juanbʉ. Nau kartaɗe ɓʉ ɓuu Jesucristoba bajãaɗebena mʉʉmaa unubiɗa. Mau Dachi Akõreba Jesucristomaa unubisii ichiɗe ijãa nureerãmaa unubiamera kãꞌãabariwãeɗe kãare sãai ɓuu.* Jesucristoba ángel mʉʉmaa bʉisii mau unubimera. 2 Joma mʉʉba unuɗa biawãra jara ɓuu. Mʉʉba jara ɓuu nau beɗea Dachi Akõreɗebena nee ɓuu mauɗe Jesucristoba biawãra unubisii. 3 Chi mau Dachi Akõre baita berreabarii beɗea ãbarã daaɗe eɗa jaraaruu ãrea biꞌia ɓuai. Mauɗe chi nau beɗea ũriɗapeɗa wau nuree ãrea biꞌia nureaɗai, kãꞌãabariwãeɗe makaiɗeeba.

Ãbarã Asia druaɗebena baita Juanba ɓʉɗa

4 Mʉ Juanbʉ. Nau karta ɓʉmaa ɓuu ãbarã Asia druaɗe 7 puuruɗebenarã baita. Mʉʉba kʉ̃ria ɓuu Dachi Akõreba ichi sõbiaɗeeba machi aiɗa ɓuai mauɗe jirukaraayuwãe ɓuabiai. Mau chi nibaɗabʉ, chi niibʉ mauɗe chi neei baita ɓuubʉ. Mauɗe mʉʉba kʉ̃ria ɓuu Dachi Akõre rey ãkau bia ɓuu daaɗe 7 jauri panuuba maka wau panaɗai.* 5 Mauɗe kʉ̃ria ɓuu Jesucristo biɗa maka wau ɓuai. Ichiba Dachi Akõre ʉ̃rʉbena biawãra jarabarii. Biu ɓuaɗa naa chokae jiradusii, joma nau iujãaɗebena chi reyrã audeara chi mechiu nii ɓuai baita. Mauba dachi kʉ̃ria ɓuu mauɗe ichi oaɗeeba kachiruaɗebena karibasii. 6 Dachi ɓusii Dachi Akõreba ichi juaɗe paare nureaɗamera.* Maka ichi Bajãaɗebena Akõreba kʉ̃ria ɓuu wau panaɗai. Maumaa biꞌia berreaɗai panuu. Biꞌia ɓuu mau ewaricha jomaurã Mechiu ɓuai. Biawãra biꞌia ɓuu maka ɓuai.*

Juanba Cristo unuɗa

9 Mʉ machi ãba Juanbʉ. Dachi Jesucristo ome panuuɗeeba mʉ machi ome Dachi Akõre juaɗebenarãbʉ, machi ome ãrea biꞌiwãe ɓuu, mauɗe machi ome joma dauchia jãadua ɓuu.

Dachi Akõre beɗea jaradea ɓuu kakua mauɗe Jesús ʉ̃rʉbena biawãra a ɓuu kakua mʉ Patmos islaɗe ɓusiɗau. 10 Dachi Mechiu ewariɗe mʉ Dachi Akõre Jauriɗeeba ɓuasii.* Mauɗe mʉ kaaɗeeba aɓa mimi jĩwa berrea ɓuu ũrisii. Ichi beɗea kachu jĩwabarii kĩra ũrisii. 11 Mauba jarasii: «Bichiba unuuruu kartaɗe ɓʉpeɗa ãbarã 7 puuru ɓeeɗe duanuurãmaa urubʉise: Efesoɗaa, Esmirnaɗaa, Pergamoɗaa, Tiatiraɗaa, Sardisɗaa, Filadelfiaɗaa mauɗe Laodiceaɗaa».*

12 Mauɗe mʉʉba waya ichiasii kai berrea ɓuu kuitaa. Ichiasiiɗe 7 ʉ̃ɗaa koabarii nee wauɗa unusii. 13 Mau 7 ʉ̃ɗaa koabarii ẽsa, chi Ẽbẽra Ba Ɓuaɗa kĩra nii unusii.* Paru jʉ̃rʉɗeeɗe deseroa jʉ̃ ɓuasii. Ichi pechuɗe nee wauɗa paraa jʉ̃ ɓuasii. 14 Ichi buɗa meraa torroa ɓuasii oeja kara kĩra maebʉrã nieve kĩra. Ichi dau tʉbʉ aokooruu kĩra ɓuasii. 15 Ichi jʉ̃rʉ bronce tʉbʉɗe kuɓuɗakare urua kuɓuu kĩra ɓuasii. Ichi beɗea do ãrea cheeruu kĩra jĩwa ɓuasii. 16 Ichi jua biare pusterrea 7 uru ɓuasii. Ichi okarrɗebena espada kiɗa muriacha peeɗea era ɓuu neesii. Ichi kĩedarr ʉmada teɗechoa kĩra ɓuasii.

17 Ichi unusiiɗe ichi jʉ̃rʉ kaita peraba jeeɗa ɓari ɓeesii. Maamina ichi jua bia mʉ ʉ̃rʉ kuɓupeɗa jarasii: «Perarã́se. Mʉ chi nabenabʉ mauɗe kaaɗebenabʉ. 18 Mʉ chi Chokae Nima. Mʉ biuɗamina ichiáse chokae nii, mauɗe ewaricha chokae nibai. Mʉa chi biuɗarã poyaa chokae jiradubiai ɓuu.* 19 Bichiba unu ɓuu karta aɓaɗe ɓʉse. Iɗibae makamaa ɓuu ʉ̃rʉbena mauɗe chi kaaɗebena ewariɗe makai ʉ̃rʉbena ɓʉse. 20 Mʉʉba unubiiruu chi 7 pusterrearã bichiba mʉ jua biare uru ɓuu unuɗa kãare jara ɓuu mauɗe kãare jara ɓuu lámpararã nee wauɗa. Mau 7 lámpararã jara ɓuu chi angelerã. Mau 7 panuuba ãbarã 7 puuruɗe duanuu nubadaurãbʉ. Ãchi aɓaaɓaa chi ãbarã puurucha nubadau. Chi 7 lámpararã jara ɓuu chi 7 puuruɗebena ãbarã.

Cristoba chi ãbarã Efesoɗebenarã baita ɓʉbiɗa

2 »Chi Éfeso puuruɗebena ijãabadaurã nubarii ángel baita kartaɗe naka ɓʉse:

»Chi jua biare 7 pusterrea uru ɓuuba mauɗe 7 lámpara nee wauɗa tãeɗe niiba naka jara ɓuu:

2 »Mʉʉba machiba wau panuu kuitaa ɓuu. Mʉ baita ãrea traja panuu mauɗe ãrea biꞌiwãe panuuɗe joma dauchia jãadua panuu kuitaa ɓuu. Machiba chi kachirua waubadaurãmaa ida kabiɗakau kuitaa ɓuu. Chi nuree machimaa wãɗapeɗa maabae Jesucristoba bʉiɗarã abachiɗau.* Maamina machiba kauwa ichia panuuɗeeba kuitaasiɗau maarã chi seta nuree. 3 Machi mʉ kakua ãrea biꞌiwãe panuuɗe joma dauchia jãadua panuu mauɗe kĩrajaaɓariwẽa mʉ baita biꞌia traja panuu. 4 Maamina mʉʉba nau miadaa unu ɓuu: chi kʉ̃ria machiba naeɗe uru panaɗa iɗi jãabae ãrea uru panuuwãe. 5 Mauɗeeba kĩrabásturu machiba naeɗe kʉ̃ria uru panaɗa. * Waya Dachi Akõremaa nésturu. Chi bia wáusturu naeɗe waubachiɗau kĩra. Dachi Akõremaa neeɗawẽebʉrã, mʉʉba machi kastikaɗe wãi. * Mauɗe machi lámpara ãyaa ɓui. 6 Maamina nau biꞌia wau panuu: chi Nicolaitasɗe ijãabadaurãba kachirua waubadau machiba kʉ̃riaɗakau. Mʉa biɗa mau kʉ̃riakau. 7 Chi kʉʉrʉ bara niiba ũrise chi Jauriba ãbarãmaa jara ɓuu. Chi kachirua wauɗai poyaa ida ɓupeɗaaɗamaa chi nejõo bakuru chokae nibabiabariiɗebena koi ida kabii. Mau bakuru Dachi Akõre drua biaɗe nuɓuu.

Cristoba ãbarã Esmirnaɗebena baita ɓʉbiɗa

8 »Chi Esmirna puuruɗebena ijãabadaurã nubarii ángel baita kartaɗe naka ɓʉse:

»Chi Nabena mauɗe Kaaɗebena, chi biuɗa baɗa waya chokae niiba naka jara ɓuu:

9 »Mʉʉba machiba wau panuu kuitaa ɓuu. * Ãrea biꞌiwãe panuu mauɗe chi nejarr barauwãe nuree kuitaa ɓuu. Maamina Dachi Akõreɗeeba machi ne bara nuree. Maka panumina machi Dachi Akõreɗeeba chi nejarr barau nuree kĩra nuree. Mʉʉba kuitaa ɓuu chi nuree judiorãba machi ʉ̃rʉbena miadaa berreabadau. Maarãba Dachi Akõreɗerã* abadamina Satanasɗebʉ. * 10 Chi machi kãꞌãabariwãeɗe biꞌiwãe panaɗai ewari wapearã́sturu. ¡Ũrísturu! Chi jʉbawãe niiba machiɗebena chi nuree jʉ̃a bʉikai ijãa panuu kuitaayua. Ewari 10 ãrea biꞌiwãe panaɗai. * Maamina biuduuɗaa ijãa panásturu. Mauɗe mʉʉba machimaa boro jũra dearuuɗe ewaricha chokae nibabiai. 11 Chi kʉʉrʉ bara niiba ũrise Dachi Akõre Jauriba ãbarãmaa jara ɓuu. Chi kachirua wauɗai poyaapeɗaaɗa ewaricha Dachi Akõreɗebena awara nureaɗaabai. *

Cristoba ãbarã Pérgamoɗebena baita ɓʉbiɗa

12 »Chi Pérgamo puuruɗebena ijãabadaurã nubarii ángel baita kartaɗe naka ɓʉse:

»Chi espada kiɗa muriacha peeɗea era ɓuu iniiba naka jara ɓuu:

13 »Machiba wau panuu mʉʉba kuitaa ɓuu. * Mauɗe kuitaa ɓuu machi panabadaumare Satanás chi rey ãkauɗe akʉ ɓuu. * Maamina machi wabiɗa mʉ baara nibabadau. Chi Satanasɗerãba chi ãba Antipas beasiɗauɗe mʉ kakua biawãra berreasiiɗeeba, machi mʉʉɗe ijãaɗai ida ɓuɗaabasii. 14 Maamina mʉʉba nau miadaa unu ɓuu. Machiɗebena chi nureeba Balaanba jaradeaɗa ũri panuu. * Balaanba Balacmaa jaradea ɓuasii israelɗebenarã kachiruaɗe saka ɓaebiai ɓuu. Mauba chi Dachi Akõre kuenda juaba ne kapeɗaaɗamaa baa deabadau kiuru kobiabachii mauɗe dachi kakuaba barikiu kachirua waubiabachii. 15 Mauɗe machiɗebena chi nureeba Nicolasba jaradeaɗa ũri panuu. Mau jaradeabadau mʉʉba kʉ̃riakau. * 16 Mauɗeeba waya Dachi Akõremaa nésturu. Mau makaɗawẽebʉrã, kãꞌãabariwãeɗe mʉ machi kastikaɗe wãi. Mauɗe espada mʉ okarrɗebena neeruuba mau ẽbẽrarã ome chĩo ɓuai. 17 Chi kʉʉrʉ bara niiba ũrise chi Dachi Akõre Jauriba ãbarãmaa jara ɓuu. Chi kachirua waui poyaaɗamaa mʉʉba chi maná* mera ɓuaɗa deai komera mauɗe mokara torroa ɓuu siɗa aɓa deai. Mau mokara kaebe ɓuumaa trʉ̃ wiɗi ɓʉ kuɓuu. * Aɓau biɗa mau trʉ̃ adua ɓuu. Chi adaurúburu mau trʉ̃ kuitaai.

Cristoba ãbarã Tiatiraɗebena baita ɓʉbiɗa

18 »Chi Tiatira puuruɗebena ijãabadaurã nubarii ángel baita kartaɗe naka ɓʉse:

»Dachi Akõre Warr dau tʉbʉ aokooruu kĩra ɓuu, mauɗe jʉ̃rʉ bronce tʉbʉɗe kuɓuɗakare urua kuɓuu kĩra ɓuu. Ichiba naka jara ɓuu:

19 »Machiba wau panuu mʉʉba kuitaa ɓuu. Machi kʉ̃riabadau, mʉʉɗe ijãabadau, mʉ baita waubadau, mauɗe dauchia jãadua panabadau kuitaa ɓuu. Mauɗe kuitaa ɓuu machiba naeɗe wau panaɗa audeara bibuara wau panuu. 20 Maamina mʉʉba nau miadaa unu ɓuu: Machiba wẽra Jezabel abadauba chi setaa jaradea ɓuu ida kabi panuu. * Ara mauba Dachi Akõre baita berreabarii abarii. Maamina chi mauba jaradea ɓuuɗeeba mʉ baita bari trajabadaurã setaa kũrua ɓuu kĩra dachi kakuaba barikiu kachirua wau panaɗamera mauɗe kiuru Dachi Akõre kuenda juaba ne kapeɗaaɗamaa baa deabadau koɗamera. 21 Mʉʉba eseɗau ɓuasii jãuba chi kakuaba barikiu kachirua wau ɓuu ida ɓupeɗa Dachi Akõremaa neemera. Maamina mau kachirua ida ɓui kʉ̃riabasii. 22 Mauɗeeba mʉʉba jãu wẽra chi kakua pira baraa kʉɗaɗe ɓari ɓui. Mauɗe joma chi jãu ome kachirua waubadaurãba ara mau wẽra kĩra kachirua wau panuu ida ɓuɗawẽebʉrã biꞌiwãe panabiai. 23 Mʉʉba chi warrarã kinibiai. Maka joma ãbarãba kuitaaɗai mʉʉba jomaurã kʉ̃risia kuitaa nii mauɗe chi sõɗeeba wau kʉ̃ria panuu. Mʉʉba machiba waupeɗaaɗa kĩra kastikai. 24 Maamina chi nuree machiɗebena Tiatiraɗebenarãba jãu wẽraba jaradea ɓuu ũriɗawẽa panuu. Mau awara machiba chi “Satanasba mera ua ɓuu” abadau jʉrʉɗawẽa panuu kuitaaɗai baita. Mʉʉba june maucha waubiawẽe, 25 bari dauchia jãadua panuuɗe, mʉʉɗe ijãa panaɗai mʉ neeruuɗaa. 26 Chi kachirua wauɗai poyaapeɗaaɗarã mauɗe chi mʉʉba kʉ̃ria ɓuu ewaricha waupeɗaaɗarã, mʉʉba puuru jomaɗe chi karrarã ɓui mʉ chachaba mʉ jomaurã karr ɓusii kĩra. Mauɗe kĩra chuburiaɗawẽa joma nau iujãaɗebenamaa ichiɗe ijãabia ɓuai. * Maarãba jomaurã poyaa panaɗai kuuru ãribarii kĩra. * 27 —. 28 Mʉʉba maarãmaa chi ewarimaabena pusterrea deai. * 29 Chi kʉʉrʉ bara niiba ũrise Dachi Akõre Jauriba ãbarãmaa jara ɓuu.

Cristoba ãbarã Sardisɗebena baita ɓʉbiɗa

3 »Chi Sardis puuruɗebena ijãabadaurã nubarii ángel baita kartaɗe naka ɓʉse:

»Chi Dachi Akõre daaɗe 7 jauri uru ɓuuba* mauɗe 7 pusterrea uru ɓuuba naka jara ɓuu:

»Machiba wau panuu mʉʉba kuitaa ɓuu. Ẽbẽrarãba jara panuu machiba Dachi Akõre ãrea ijãa panuuɗeeba chokae nuree. Maamina biawãra ara machiba Dachi Akõreɗe ijãaɗawẽa panuuɗeeba chi biuɗarãbʉ. 2 ¡Kauwa ichiásturu! Mʉʉba unu ɓuu machiba wau panuu Dachi Akõre daaɗe jipawãe ɓuu. Mauɗe chi naeɗe biꞌia wau panaɗa machiba beraa ida ɓuumaa panuu. Maamina mau waya mau biꞌia wáusturu. 3 Chi biawãra beɗea machiba ũripeɗaaɗa kĩrabásturu. Mau ãrea ijã́sturu. Kachirua ida ɓuɗapeɗa Dachi Akõremaa waya nésturu. Machi kauwa nibabadauwãebʉrã mʉ kãꞌãabariwãeɗe neei machi kastikai baita nechiru kãꞌãabariwãeɗe neebarii kĩra. 4 Maamina machi Sardisɗebena ɓaꞌãra barau chi kachiruaɗe panabadauwãe, machi paru jayoaswãe panuu kĩra. Machi mʉ baara ãbua nibaɗai baita biꞌia panuuɗeeba, paru torroa jʉ̃ʉduuɗe mʉ baara nibaɗai. 5 Chi kachirua wauɗai poyaapeɗaaɗarãba ara mau kĩra paru torroa jʉ̃ɗai. Ãchi trʉ̃ chi ewaricha chokae duanabarii kartaɗe ɓʉ kuɓuuɗeeba mʉʉba mau jareebai. Maumaarã mʉ Chacha daaɗe mauɗe chi angelerã daaɗe ãchi mʉʉɗerã ai. 6 Chi kʉʉrʉ bara niiba ũrise Dachi Akõre Jauriba ãbarãmaa jara ɓuu.

Cristoba ãbarã Filadelfiaɗebena baita ɓʉbiɗa

7 »Chi Filadelfia puuruɗebena ijãabadaurã nubarii ángel baita kartaɗe naka ɓʉse:

»Mau chi Ara Dachi Akõre Báitaburu Nii, Chi Biawãra Beɗea Aɓa Ɓuu, chi David puuru mechiu niibʉ. * Chi ichiba ewabarii aɓau biɗa poyaa jʉ̃abai. Ichiba jʉ̃aruu aɓau biɗa poyaa ewaabai. 8 Naka jara ɓuu:

»Machiba wau panuu mʉʉba kuitaa ɓuu. ¡Ũrísturu! Mʉʉba poraa aɓa machi daaɗe ewasii. Mau aɓau biɗa poyaa jʉ̃abai. Machi meserãa ãreawãe nuremina, mʉ beɗea ãrea ijãabadau. Mʉ istu ɓuɗawẽa panuu. 9 ¡Ũrísturu! Machi jʉ̃rʉ kaita mʉʉba Satanasɗe ẽbẽrarã õdarrɗe kopaneebiai. * Maarãba Dachi Akõreɗerã abadamina, makawãema. * Maarã chi seta nuree. Mʉʉba maarãmaa kuitaabiai mʉʉba machi kʉ̃ria ua ɓuu. 10 Machiba joma chi mʉ kakua biꞌiwãe duanuu dauchia jãadua panuu mʉʉba jaraɗa kĩra. Mauɗeeba chi joma nau iujãaɗebena biꞌiwãe panaɗai ewari neeruuɗe, mʉʉba machi nu ua ɓuai. Mau ewariɗe joma chi nau iujãaɗe duanuu biꞌiwãe panabiai sakaɗai kuitaayua. 11 Mʉ kãꞌãabariwãeɗe neei. Mauɗeeba machiba iɗibae ijãabadau kĩra dauchia jãadua panásturu. Maka aɓau biɗa machi boro jũra jʉ̃barii ẽe adauɗaabai. 12 Chi kachirua poyaapeɗaaɗa mʉ Dachi Akõre de wãto kĩra ɓui. Maka mau deɗebena wãɗaabai. Ãchi dauɓʉʉrʉɗe mʉ Chacha trʉ̃ ɓʉi ichiɗirã kuitaabiayua. Mauɗe ãchi dauɓʉʉrʉɗe mʉ Chacha puuru trʉ̃ ɓʉi mau puuruɗebenarã kuitaabiayua. Mau Jerusalén Wiɗi abadau puuru bajãaɗebena mʉ Chacha ɓuuɗebena neei. Mauɗe ãchi dauɓʉʉrʉɗe mʉ trʉ̃ wiɗi ɓʉi mʉʉɗerã kuitaabiai baita. 13 Chi kʉʉrʉ bara niiba ũrise Dachi Akõre Jauriba ãbarãmaa jara ɓuu.

Cristoba ãbarã Laodiceaɗebena baita ɓʉbiɗa

14 »Chi Laodicea puuruɗebena ijãabadaurã nubarii ángel baita kartaɗe naka ɓʉse:

»Biawãra Beɗea trʉ̃ jarabadauba Dachi Akõreɗebena biawãra joma arakʉɗe jarabarii. * Ichiɗeeba Dachi Akõreba ne joma wausii. * Ichiba naka jara ɓuu:

15 »Machiba wau panuu mʉʉba kuitaa ɓuu. Mʉ ida ɓuɗawẽa panuu maamina sõɗeeba mʉ baara niɗauwãe. Maka machi bania kũrasãa kĩra nureewãe mauɗe bania wãsia kĩra. Sõɗeeba biawãra ichi baara wãɗawẽebʉrã, mʉʉmaarã bibuara ɓuu mʉ baara akawa nibaɗaabai ɓuu. 16 Maamina machi bania wãsia kĩra nuree; mʉ ida ɓuɗakamina, biawãra sõɗeeba nibaɗakau. Mauɗeeba mʉʉba machi ida ɓui, mʉ okarrɗebena bania jʉ̃ʉrʉa iɗuuruu kĩra. 17 Machiba chi nejarr barau nuree a panuu, ne joma uru panuu a duanuu, mauɗe ne aɓa biɗa wãꞌãe nistaɗai baita a duanuu. Maamina adua panuu machi miichuburi duanuu, kachirua duanuu, ne aɓa biɗa uru panuuwãe, dau pãriu duanuu mauɗe ãkaɗaa duanuu. 18 Mauɗeeba mʉʉba machimaa naka kʉ̃risia dearuu: Nee tʉbʉchiaɗe dorrɓariɗa nedósturu mʉʉɗebena. Maka machi biawãra barau nureaɗai. Mauɗe mʉʉɗebena paru torr nedósturu jʉ̃ɗai baita. Maka nejasiaɗaabai machi ãkaɗaa panasiiɗeeba. Mauɗe mʉʉɗebena dauɗe taabadau nedósturu, mauba taaɗapeɗa biꞌia ichiaɗamera. 19 Chi ẽbẽrarã mʉʉba kʉ̃riakua ɓuu kastikakuabarii mauɗe beɗea bia ũribiabarii mʉ beɗea ijãaɗamera. Mauɗeeba waya mʉʉmaa nésturu biawãra mʉ baara sõɗeeba nibaɗamera. 20 ¡Ũrísturu! Mʉ poraaɗe ɓuma. Awareeba iu ɓuma machiba mʉ deeɗaa ida neebiɗamera. Barikiuba mʉ mimi ũripeɗa chi poraa ewaaruubʉrã, mʉ eɗa wãpeɗa mau baara koi. 21 Mʉʉba chi kachirua waui poyaasiiɗeeba Dachi Akõre baara ichi rey ãkauɗe akʉ ɓeesii. Ara mau kĩra chi kachirua waui poyaapeɗaaɗa mʉ baara mʉ rey ãkauɗe akʉ ɓeebiai. 22 Chi kʉʉrʉ bara niiba ũrise Dachi Akõre Jauriba ãbarãmaa jara ɓuu».

Bajãaɗebenarãba Dachi Akõre ãrea kʉ̃riapeɗaaɗa

4 Mau maaɗakare Dachi Akõreba mʉʉmaa unubisii poraa aɓa bajãaɗe ewa nuɓuu. Ara mauɗe chi naeɗe mimi kachu chaaruu kĩra ũri ɓuaɗaba jarasii: «Nama ʉtʉ uruse. Mʉʉba unubii chi jãaɗakare makai ɓuu ewari».

2 Ara makʉɗe Dachi Akõre Jauri mʉʉɗe neeɗaba chi rey ãkau bajãaɗe unubisii. Mau ʉ̃rʉ aɓa akʉ ɓuasii. 3 Chi mau ãkauɗe akʉ ɓuu teɗechoasii mokara jaspe mauɗe coralina teɗechoabadau kĩra. Mau ãkau aɗu iuma jũra ɓuasii. Chi iuma mokara esmeralda kĩra teɗechoa ɓuasii. 4 Mauɗe 24 rey ãkau panuu chi rey ãkau aɗu jũra panasii. Mau ʉ̃rʉ 24 chõrarã mechiu akʉ duanasii. Ãchi paru torroa ɓuasii. Mauɗe boro jũra nee wauɗa jʉ̃ panasii. 5 Ara mauɗe chi rey ãkau bajãaɗe ɓuuɗebena bã puri chebi ɓuasii, ʉrʉrʉa ɓuasii, mauɗe bã ãrea to ɓuasii. Mau rey ãkau daaɗe 7 lámpara koa topanasii. Mau lámpara chi 7 jauri Dachi Akõreɗebʉ. 6 Mau rey ãkau kĩraare mar biirio kĩra doɗaa nuɓuasii.

Mau rey ãkau jua biare, jua sordoare, kaaɗe, mauɗe kĩraare kimare chokae nuree panasii. Maarã dau ãrea uru panasii, pechuɗe mauɗe akarrare. 7 Aɓa imama kĩra nibasii. Aɓa paka kĩra nibasii. Aɓa ẽbẽra kĩedarr kĩra nibasii. Mauɗe aɓa nejõo ũuɓari nii kĩra nibasii. 8 Maarã chokae nuree aɓaaɓaa ikia 6 uru nureasii. Ãchi kakuaɗe dau ãrea bara nureasii. Mauɗe ãchi ikia ekare biɗa dau ãrea basii. Ãyadaa, mauɗe ẽsabuɗe maarãba ida ɓuɗayuwãe nau jarabachiɗau:

9 Chi Dachi Akõre ewaricha chokae nii ichi rey ãkauɗe akʉ ɓuu. Ara mauɗe chi chokae nureeba jara panuu ichi mipitaa nii, ichimaa biꞌia jara panuu, mauɗe ichíturu kiɗibai a panuu. Mau jaraaduucha chi 24 mechiu chõrarã Dachi Akõre ewaricha chokae nii daaɗe õdarrɗe kopaneeɗapeɗa ãrea kʉ̃riabadau. Ãchi boro jũra jʉ̃badau chi rey ãkau jãkaa duanuɗapeɗa naka jarabadau: 10 —.

Oeja kaebeu Juanba unuɗa

5 Mauɗe mʉʉba unusii chi rey ãkauɗe akʉ ɓuu ichi juaɗe karta bʉra uru ɓuasii. Chi kartaɗe muriacha ne ɓʉ kuɓuasii. Chi karta kuɓuumaa 7 jʉrrʉba wãa kuɓuasii aɓau biɗa ewarãamera. 2 Mauɗe mʉʉba ángel aɓa poyaabarii unusii. Mauba jĩkua berrearuuba iɗisii: «¿Kai biꞌia ɓuma chi kartamaa wãa kuɓuu oetapeɗa ewai baita?» 3 Maamina mau karta ewapeɗa eɗa jarai baita aɓa biɗa chi bia wãꞌãe basii. Bajãaɗe, nau iujãaɗe mauɗe biupeɗaaɗa duanaabadaumarebena siɗa wãꞌãe basii.* 4 Mauɗe mʉ ãrea jẽa koɓeesii ẽbẽra bia aɓa biɗa wãꞌãe basiiɗeeba mau karta ewapeɗa eɗa jaramera. 5 Maamina aɓa chi 24 chõrarãɗebenaba mʉʉmaa naka jarasii: «Jẽarã́se. Ichiáse, Davidɗebena aɓa neeɗabʉ. Mau Judaɗebena neeɗa Imama abadauba Dachi Akõre kʉ̃riaɗakaurã poyaasii. * Mauɗeeba chi nau kartaɗe 7 wãa nuɓuu poyaa oetapeɗa ewai ɓuu».

6 Mauɗe Dachi Akõreɗe rey ãkau kaita, kimare chokae nuree kaita mauɗe 24 chõrarã mechiurã tãeɗe oeja kaebeu aɓa akʉ nuɓuu unusii. Mau chi bea panaɗa kĩra nibasii. Kachu 7 bara nibasii. Mauɗe 7 dau bara nibasii. Mau dau jara ɓuu chi 7 jauri Dachi Akõre daaɗe panuu. Dachi Akõreba nau iujãa jomaɗe maarã bʉikasii. 7 Mauɗe mau oeja kaebeu chi rey ãkauɗe akʉ ɓuumaa wãpeɗa chi karta mau jua biare uru ɓuaɗa adausii. 8 Mau karta adausiiɗe chi kimare chokae nuree mauɗe chi 24 chõrarã siɗa ichi daaɗe õdarrɗe kopaneesiɗau. Ãchi aɓaaɓaa arpa mauɗe sãu nee wauɗa uru panasiɗau. Chi sãu incienso keraba waabiru uru panasii. Chi kera incienso jara ɓuu ẽbẽrarã Dachi Akõreɗerãba chi ichimaa ʉtaa iɗibadau. 9 Chi 24 chõrarã mauɗe chi kimare chokae nureerãba nau kari wiɗi karisiɗau:

11 Maka ɓuuɗe mʉʉba angelerã karimaa panuu unusii. Maarã ãrea basiiɗeeba mʉʉba poyaa juasiibasii. * Maarãba Dachi Akõre chi rey ãkau, chi chokae duanuurã mauɗe chi 24 chõrarã aɗu jũra duanasiɗau. 12 Naka jĩwa kari panasiɗau:

13 Mauɗe mʉʉba ũrisii chi joma Dachi Akõreba waukuaɗa chi bajãaɗe duanuu, chi nau iujãaɗe duanuu, chi biupeɗaaɗa mauɗe marɗe duanuu biɗa naka kari panasiɗau: *

14 Maabae chi kimare chokae nureeba naka jarasiɗau: «Bibuara ɓuu maka ɓuai». Ara makʉɗe chi 24 chõrarã õdarrɗe kopaneeɗapeɗa chi ewaricha chokae niimaa biꞌia berreasiɗau. *

Chi kartamaa wãa kuɓuu oetaɗa

6 Maabae mʉʉba unusii chi Oeja Kaebe Niiba chi kartamaabena wãa kuɓuu aɓa oetasii. Maka ɓuuɗe chi kimare chokae nureeɗebena aɓauba naka jaraaruu ũrisii: «¡Neese!»* Chi mimi bã kĩra jĩwa ɓuasii. 2 Araa ichiasiiɗe, mura torroa nii unusii. Chi mau mura ʉ̃rʉ akʉ ɓuasiiba ichi juaɗe enadrʉma uru ɓuasii: Aɓauba ichimaa boroɗe jũra jʉ̃barii aɓa deasii. Ara makʉɗe chi nuree poyaapeɗa maabae maucha poyaaɗe wãsii.

3 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!». 4 Mauɗe mura puria nii awara neesii. Aɓauba chi mau mura ʉ̃rʉ akʉ ɓuumaa espada aɓa deasii. Dachi Akõreba maumaa ẽbẽrarã chi nau iujãaɗe nebʉraswãe duanuumaa kachirua wauyu ida ɓusii chĩoɗapeɗa chiya beaɗamera.

5 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!». Araa ichiasiiɗe mʉʉba mura parrba nii unusii. Chi mau mura ʉ̃rʉ akʉ ɓuuba ichi juaɗe chikʉa chaabarii uru ɓuasii. 6 Maka ɓuuɗe mʉʉba chi kimare chokae nuree panuu tãeɗe aɓa berrearuu ũrisii. Mauba naka jarasii chi mura ʉ̃rʉ akʉ ɓuumaa: «Chi trigo ãrisii. Maka ẽbẽra aɓa ewari aɓa trajai, trigo libra ome nedoi baita. Mauɗe chi cebada siɗa ãrisii. Maka ẽbẽra aɓa ewari aɓa trajai cebada 6 nedoi baita. Maamina olivo jõ mauɗe uva jõ ida biꞌia chaubise drabirua mauɗe uva ɓaa baraamera».

7 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!» 8 Araa ichiasiiɗe mʉʉba mura kukuaraa nii unusii. Chi mau mura ʉ̃rʉ akʉ ɓuu trʉ̃ «Biuɗa» abadau. Chi ichi ome nibabarii chi trʉ̃ «Biuɗarã Panabadau» abadau. Joma nau iujãaɗe ẽbẽra kimareɗebena aɓa Dachi Akõreba maarãmaa ida beabiasii. Maarã ẽbẽrarã beasiɗau chĩoduuba, jarrbaba, dachi kakua kachirua paneebibadauba mauɗe ãnimara kachirua nureeba.

9 Mau maaɗakare Oeja Kaebe Niiba chi wãa kuɓuu maucha oetasiiɗe mʉʉba unusii chi Dachi Akõre beɗea jaradea panuu kakua beapeɗaaɗa jaurirã. Maarã bajãaɗe chi ãnimara baa deabadau jãkaa panasiɗau. 10 Kĩruɗeeba naka berreasiɗau: «Jomaurã Mechiu, bichi ãrea bia nii mauɗe biawãra berreabarii. ¿Bichiba sakaeɗe chi jãu iujãaɗebenarã dai beapeɗaaɗa kakua kastikakuaima?» 11 Dachi Akõreba ãchi aɓaaɓaa paru torr deaɗakasii jʉ̃ɗamera. Maabae naka jarasii: «Apii eseɗau panaɗáusturu joma chi ẽbẽrarã beaduuɗaa joma bichi ãbarã Cristoba pekuaɗa machi beapeɗaaɗa kĩra».

12 Mau maaɗakare mʉʉba unusii chi Oeja Kaebe Niiba chi wãa kuɓuu maucha oetaaruu. Mauɗe ioromia ãrea urisii. Ʉmada pãriusii paru parr aɓa biuɗakare jʉ̃badau kĩra. Jeɗako joma oa kĩra puria koɓeesii. 13 Ãrea pũatuuruuɗe higo jõo pãaraa ɓaebadau kĩra chi bajãaɗebena pusterrearã iujãaɗe ɓaesiɗau. 14 Bajãa wãꞌãesii karta araa bʉrabarii kĩra. Joma earã mauɗe islarã siɗa chi naeɗe kuɓuaɗamare wãꞌãesii. 15 Mauɗe chi nau iujãaɗebena rey mechiurã, chi gobernadorã, chi kokoroarã mechiurã, chi nejarra barau nuree, chi meserãa nuree, chibari baita bari trajabadaurã mauɗe chibariswãe nuree ea choɓeaɗe mauɗe eaɗe mo koɓeaɗamare mirusiɗau. 16 Maarãba naka jarasiɗau: «¡Ea, mo, dai ʉ̃rʉ ɓáesturu. Dai mirubiásturu chi rey ãkauɗe akʉ ɓuuba dai unurãamera mauɗe chi Oeja Kaebe Niiba kastikarãamera. 17 Chi ichiba kastikai ewari mechiu neesii. ¿Kaiba mau ome dauchia jãadua ɓuaima?»

Chi dauɓʉʉrʉmaa sello wãabarii wauɗa

7 Mau maaɗakare mʉʉba ángel kimare unusii. Maarã nau iujãaɗe õkiɗucha akʉ topanasiɗau. Maarãba pũatu mamareecha pũayu ida kabiɗaabasii nau iujãaɗe, marɗe mauɗe bakurumaa biɗa. 2 Dachi Akõreba ãchimaa poyaabarii dea ɓuasii chi iujãa mauɗe mar ãriɗamera. Maka ɓuuɗe mʉʉba ángel maucha ʉmada urubariare uruu unusii. Mauba Dachi Akõre chokae niiɗe sello wãabarii uru ɓuasii. Mauba naka jarakuasii chi kimare angelerãmaa: 3 «Nau iujãa, mar mauɗe bakururã ãrirã́sturu, aɓa daiba Dachi Akõre seña chi ichi baita bari trajabadaurã dauɓʉʉrʉɗe joma wauduuɗaa».

4 Mauɗe mʉʉba ũrisii Dachi Akõre sello uru panuu sãabe panuu: 144.000 basii. Maarã joma Israelɗebena imipeɗaaɗarã basii. 5 Judaɗebena imipeɗaaɗarã 12.000 basii. Rubenɗebena imipeɗaaɗarã 12.000 basii. Gadɗebena imipeɗaaɗarã 12.000 basii. 6 Aseɗebena imipeɗaaɗarã 12.000 basii. Neftaliɗebena imipeɗaaɗarã 12.000 basii. Manasesɗebena imipeɗaaɗarã 12.000 basii. 7 Simonɗebena imipeɗaaɗarã 12.000 basii. Leviɗebena imipeɗaaɗarã 12.000 basii. Isacarɗebena imipeɗaaɗa 12.000 basii. 8 Zabulonɗebena imipeɗaaɗarã 12.000 basii. Joseɗebena imipeɗaaɗarã 12.000 basii. Mauɗe Benjaminɗebena imipeɗaaɗarã 12.000 basii.

Ẽbẽrarã ãrea Dachi Akõre daaɗe nuree

9 Mau maaɗakare Dachi Akõreba waya mʉʉmaa ẽbẽrarã ãrea unubisii. Aɓau biɗa maarã poyaa juasiibasii. Druachaɗebena, puuruchaɗebena ẽbẽrarã didiwaraacha jomaɗebena mauɗe beɗea didiwaraacha jomaɗebena chi nuree aɓaaɓaa duanasii. Joma paru torroa jʉ̃ duanasii mauɗe kĩrajʉʉ duanasiiɗeeba ãchi juaɗe meme kiruu uru panasiɗau. Dachi Akõre rey ãkau daaɗe mauɗe chi Oeja Kaebe Nii daaɗe ɓari topanasiɗau. 10 Mauɗe joma naka kĩruɗeeba jarasiɗau: «¡Dai Akõre nau rey ãkauɗe akʉ ɓuu mauɗe chi Oeja Kaebe nii baarauba dai karibasiɗau!»

11 Mauɗe chi kimare chokae nuree panuurãba mauɗe chi 24 chõrarã chi rey ãkau kaita duanasiɗau. Joma chi angelerã chi maarã aɗu jũra ɓari topanasiɗau. Mauɗe chi joma angelerã õdarrɗe kopaneesiɗau mauɗe chi rey ãkau daaɗe dauɓʉʉrʉ jaaɓariɗapeɗa maabae Dachi Akõremaa biꞌia berreasiɗau. 12 Naka jarasiɗau:

13 Maabae chi 24 chõrarãɗebena aɓaba mʉʉmaa naka iɗisii:

—¿Bichiba kuitaa ɓuka jãarã chi paru torroa jʉ̃ panuu kai mauɗe samareeba neesiɗau?

14 Mʉʉba panausii:

—Bichiaburu kuitaa ɓuu.

Maabae ichiba jarasii:

—Naarã ẽbẽrarã́turu karibasiɗau chi kaaɗebena ãrea biꞌiwãe panabiai ewari. Maarã chi Oeja Kaebe Nii oaba ãchi paru torroa jeraasiɗau. 15 Mauɗeeba maarã Dachi Akõre rey ãkau jãkaa duanuu. Ichi deɗe ãyadaa mauɗe ẽsabuɗe ichi baita ne wau panuu. Mauɗe chi ãkauɗe akʉ ɓuu maarã baara ɓuai. * 16 Maarã makaa jarbisiaɗaabai mauɗe waya obisia siɗa uru panaɗaabai. Ʉmadaba makaa baakuabai mauɗe pisia biɗa makaa joebai. 17 Chi Oeja Kaebe Nii rey ãkauɗe akʉ ɓuuba maarã nu ɓuai. Maarã uaɗoi chi chokae nibabiabarii ioroɗe bania bumadru ɓuumaa doɗamera. Mau ewariɗe Dachi Akõreba ãchi dau ɓaa joma jarekuai.

Chi kaaɗeare chi wãa kuɓuu oetaɗa ʉ̃rʉbena

8 Oeja Kaebe Niiba chi kaaɗearebena chi wãa kuɓuu oetasiiɗe, bajãa ãrea chũpea nuɓuaɗausii.* 2 Mau maaɗakare mʉʉba 7 angelerã Dachi Akõre daaɗe akʉ topanuu unusii. Maarãmaa kachu 7 deasii. 3 Maabae ángel june neepeɗa Dachi Akõre baita kera baabadaumare akʉ nuɓeesii. Mau Dachi Akõre baita kera baabadau nee wauɗa chi rey ãkau kĩraare nuɓuu. Chi angelba ichi juaɗe paratu nee wauɗa uru ɓuasii kera baai baita. Aɓaba ichimaa kera ãrea deasii Dachi Akõre baita baamera ẽbẽrarã Dachi Akõreɗerã ʉtaa iɗimaa panuumisa. Ara makʉɗe ichiba chi kera baasii chi kera baa deabadau ʉ̃rʉ. 4 Chi ẽbẽrarã Dachi Akõreɗerãba ʉtaa iɗipeɗaaɗa mau angelba kera baaɗa nari baara ãbua chi Dachi Akõremaa ʉtaa piumaa wãsii. 5 Maabae chi angelba kera baa deabadauɗebena tʉbʉ kĩra adaupeɗa, chi paratu waabirubisii. Mau tʉbʉ kĩra nau iujãaɗaa jiratasii. Mauba bã tosii, ʉrʉrʉa wã koɓeesii, bajãa puri chebi koɓeesii mauɗe nau iujãa siɗa uri koɓeesii.

Angelerãba kachu chaapeɗaaɗa

6 Maabae chi 10 angelerãba kachu 7 chaaɗai baita kopaneesiɗau.

7 Aɓauba ichi kachu chaasii. Ara makʉɗe bajãaɗebena nau iujãaɗe hielo kui kĩra ɓaesiɗau. Mauɗe nau iujãaɗe tʉbʉchia oa baara ɓaesiɗau. Mauba nau iujãa jomaɗebena beraa mita baawãsii mauɗe bakururã siɗa.* Mama chi siruarã joma baawãsii.

8 Mau maaɗakare june aɓa angelba ichi kachu chaasii. Ara makʉɗe aɓauba ea kĩra urua aoko ɓuu marɗe jiratasii. Mauba beraa mita chi mar oa ba nuɓeesii. 9 Chi oa ba nuɓee ɓuaɗamare ãnimararã marɗebena beraa mita kinisiɗau mauɗe jãba aria duanaɗa beraa mita teakuasii.

10 Mau maaɗakare june aɓa angelba ichi kachu chaasii. Ara makʉɗe bajãaɗebena pusterrea mechiu aɓa tʉbʉchiaba bʉra ɓuu ɓaesii. Beraa mita doorã ẽsaɗe ɓaesii mauɗe bania bumadru ɓuuɗe. 11 Mau pusterrea “Asia Nii” abadau. Chi mau ɓaeɗamare bania beraa mita asia nuɓeesii. Mau baniaba ẽbẽrarã ãrea kinisiɗau.

12 Mau maaɗakare june aɓa angelba ichi kachu chaasii. Ara makʉɗe beraa mita jeɗako pãriusii mauɗe ʉmada. Mauɗe beraa mita pusterrearã siɗa pãriusii. Mauɗeeba beraa mita ewari aɓa pãriu nuɓeesii. Mauɗe ẽsabuɗe biɗa beraa mita chi jeɗako mauɗe pusterrearã siɗa pãriu nuɓeesii.

13 Mʉʉba ʉtaa ichiasiiɗe ũrisii nejõo aɓa ʉtʉ ũuɓari kãriiba naka jara kãrii:* «¡Mia pera! ¡Mia pera! ¡Mia pera! Ẽbẽrarã nau iujãaɗebena kĩra chuburiaɗai chi waabena angelerãba ãchi kachu chaaduuɗe!»

9 Mau maaɗakare june aɓa angelba ichi kachu chaasii. Ara mauɗe mʉʉba pusterrea aɓa nau iujãaɗe ɓaeruu unusii. Aɓauba mau pusterreamaa llave aɓa poraa eakarr eɗaa choɓea ewabarii deasii. 2 Mau eakarr eɗaa choɓeaɗe poraa ewasiiɗe, choɓeaɗebena ʉtaa nari ãrea chesii mode baaruuɗe makabarii kĩra.* Mau nariba ʉmada paimaa ãrea koɓeesii mauɗe chi bajãa siɗa. 3 Mauɗe jãu nariɗebena nau iujãaɗaa sisi mechiu ũuɓari chesiɗau. Dachi Akõreba maarã sisirãmaa poyaabarii deasii ẽbẽrarã kaaɗamera, dosurĩba kaaruu kĩra. 4 Chi sisirãmaa jarasii siruarã mauɗe bakururã ãriraaɗamera. Bari ẽbẽrarãba ãchi dauɓʉʉrʉɗe Dachi Akõre selloswãe nuree kaabiasii. 5 Dachi Akõreba chi sisirãmaa ẽbẽrarã ida beabiaibasii, bari jeɗako jua aɓa pirabíturu deasii. Mau pira ɓuu dosurĩba kaaɗa kĩra pira ɓuai. 6 Mau ewariɗe ẽbẽrarãba biuɗai jʉrʉɗai. Biawãra biuɗai kʉ̃ria panumina, biuɗaabai.

7 Mau sisi mura kokoroaba chĩoɗe adoebarii kĩra nureasii. Ãchi boroɗe boro jũra aɓa nee wauɗa kĩra ɓuu jʉ̃ panasii. Ẽbẽra kĩedarr kĩra nibasiɗau. 8 Ãchi buɗa wẽra buɗa kĩra panasii. Ãchi kiɗa imama kiɗa kĩra panasii. 9 Ãchi kakuaɗe chaarea ɓuu jʉ̃barii jiorr wauɗa jʉ̃ panasii. Ãchi ikia mura ãrearã piraaduuɗe ãchi karreta baara chĩoɗe wãaduu kĩra chirĩderrea panasii. 10 Ãchi druu dosurĩ druu kĩra misua panasii. Maarãba ẽbẽrarã ãchi druuba jeɗako jua aɓa poyaa puꞌua pirabiaɗai panasii. 11 Chi maarã sisi rey chi eakarr eɗaa choɓeaɗebena angelbʉ. Ichi trʉ̃ hebreo beɗeaɗe Abadón abadau mauɗe griego beɗeaɗe Apolión.*

12 Chi nabena mia pera jaraɗa wãꞌãesii, maamina wabiɗa ome panuu.*

13 Mau maaɗakare june aɓa angelba ichi kachu chaasii. Mauɗe chi Dachi Akõre daaɗe kera baa deabadau nee wauɗa kachu kimare panuumareeba mʉʉba aɓa berreamaa ɓuu ũrisii. 14 Chi berrea ɓuuba chi ángel chi kachu chaaɗamaa naka jarasii: «Chi kimare angelerã do Éufrates mechiu abadaumare jʉ̃ panuu enatase». 15 Ara makʉɗe ichiba maarã kimare enakuasii nau iujãaɗebena ẽbẽrarã beraa mita beaɗamera.* Dachi Akõreba maarã uru ɓuasii maka beaɗamera ara mau añoɗe, ara mau jeɗako aɓaɗe mauɗe ara mau ewariɗe biɗa. 16 Mauɗe mʉʉba ũrisii aɓauba jaramaa ɓuasii sãabe kokoroa nuree muraɗe ataubadau eneemaa panuu. Dosientos millones eneemaa panuu asii.

17 Chi murarã mʉ daumaa unubiɗa naka nureasii: ãchi boro imama boro kĩra nureasii. Ãchi okarrɗebena tʉbʉchia mauɗe nari aokokobadau panasii. Mau kakuaɗe chaarea ɓuu puria aoko ɓuu kĩra ɓuasii, zafiro mo pãwaraa kĩra ɓuasii mauɗe azufre mo kĩra kuaraa ɓuasii.* 18 Chi mura okarrɗebena aokooruuba, nariba mauɗe azufre chi cheeruu biɗa beraa mita chi nau iujãaɗebena ẽbẽrarã kenasii. 19 Mau murarã poyaa ãchi okarrɗe mauɗe ãchi druɗe ɓuasii. Ãchi druu dama kĩra panasii. Ãchi druu boro bara nureeba ẽbẽrarã kaaɗapeɗa maabae beabachiɗau.

20 Maka ɓuukauɗe chi ẽbẽrarã mauba biuɗaabaɗaba wabiɗa chi kachirua wauɗayu mauɗe jai kachiruarã ijãaɗai ida ɓuɗaabasii. Dachi Akõre kuenda juaba ne kapeɗaaɗarã ida ɓuɗaabasii: chi nee wauɗa, parata wauɗa, bronce wauɗa, mo wauɗa mauɗe bakuru eraɗa ida ɓuɗaabasii. Maarã unuɗakau, ũriɗakau mauɗe nibaɗakau. 21 Mauɗe mia beabadau, waabenarã ẽpermabadau, dachi kakuaba barikiu kachirua waubadau mauɗe chiruabadau ida ɓuɗaabasii.

Angelba karta kaebeu uru ɓuaɗa

10 Mau maaɗakare mʉʉba ángel ãrea poyaabarii aɓa bajãaɗebena jʉ̃rʉara tãeɗe uruu unusii. Ichi boro ʉ̃rʉ iuma jũra nuɓuasii. Ichi kĩedarr ʉmada kĩra urua ɓuasii. Ichi jʉ̃rʉ tʉbʉ aoko nuɓuu kĩra ɓuasii. 2 Ichi juaɗe karta kaebeu ewa uru ɓuasii. Ichi jʉ̃rʉ biarebena marɗe tʉa ʉkʉ nuɓuasii. Jʉ̃rʉ sordoarebena ioroɗe tʉa ʉkʉ nuɓuasii. 3 Maabae ichi imama arraaruu kĩra jĩwa ɓiasii. Maka ɓiaruuɗe bã 7 ɓes tosii. 4 Bã 7 ɓes tosiiɗe mau bã tooruuba jaraɗa mʉʉba kartaɗe ɓʉʉruu basii. Maamina bajãaɗe mʉʉba mimi ũrisii naka jaraaruu: «Bã 7 ɓes tosiiba jaraɗa chũpea uru ɓuase. Kartaɗe ɓʉrã́se».

5 Maabae chi ángel mʉʉba unuɗa jʉ̃rʉ aɓa marɗe tʉa akʉ nuɓuaɗa mauɗe jʉ̃rʉ aɓa ioroɗe tʉa akʉ nuɓuaɗa ichi jua biarebena ʉtaa bajãaɗaa jirasii. 6 Maabae Dachi Akõre trʉ̃ɗeeba berreasii chi nau iujãaɗebena, bajãaɗebena, marɗebena joma wauɗa. Dachi Akõre ewaricha chokae nii trʉ̃ɗeeba naka jarasii: «Dachi Akõreba jaraɗa kãꞌãabariwãeɗe joma makai. 7 Ichi baita berreabadaurã, ichi baita bari trajabadaurãbʉ. Naeɗe Dachi Akõreba ãchimaa jara ɓuaɗa ichiba kaaɗeare unubiwẽa ɓuaɗa joma makai. Kaaɗebena ángel aɓaba chi kachu chaaruuɗe biawãra joma makai».

8 Maabae bajãaɗe chi mimi mʉʉba naeɗe ũriɗaba waya mʉʉmaa naka jarasii: «ángel aɓa ichi jʉ̃rʉ aɓa marɗe tʉa uru ɓuu mauɗe aɓa ioroɗe tʉa uru ɓuuba karta kaebeu ichi juaɗe ewa uru ɓuu adauɗe wãse».

9 Ara makʉɗe chi angelmaa wãpeɗa chi karta kaebeu iɗisii mʉʉmaa deamera. Chi mauba panausii: «Adause. Kotase. Bichi okarrɗe nidurr kũaɓari ɓaa kĩra kũaa ɓuai, maamina bichi ɓiɗe asia ɓuai».

10 Mau karta kaebeu chi ángel juaɗebena adaupeɗa kosii. Mʉ okarrɗe nidurr kũaɓari ɓaa kĩra kũaa ɓuasii maamina kosiiɗe mʉ ɓiɗe asia ɓuasii. 11 Maabae ichiba mʉʉmaa jarasii: «Bichi waya Dachi Akõreɗeeba berreai ɓuu puuru ãrea makai ʉ̃rʉbena, drua ãrea sakai ʉ̃rʉbena, berreabadaucha sakai ʉ̃rʉbena, mauɗe reyrã sakai ʉ̃rʉbena».

Chi ẽbẽra ome Cristo ʉ̃rʉbena berreabadau

11 Mau maaɗakare aɓauba bakuru ne chaabarii mʉʉmaa deapeɗa naka jarasii: «Dachi Akõre de mechiu bakuruba chaayase asii, mauɗe chi Dachi Akõre baita ne baa deabadaumare. Mauɗe chi aria Dachi Akõremaa biꞌia berrea panuurã joma juasiise. 2 Maamina Dachi Akõre de mechiu mooba aude aɗu kĩra ɓuu ekarebena drua chaarã́se, mau Dachi Akõreɗe ijãaɗakaurã deasiiɗeeba. Maarãba Dachi Akõre puuru Jerusalén poyaaɗai 42 jeɗakoɗaa.* 3 Mau ewariɗe mʉʉba ẽbẽra ome bʉi mʉ ʉ̃rʉbena doɗaa berreaɗamera. Maarã paru parrba jʉ̃ɗapeɗa 1.260 ewari Dachi Akõre baita berreaɗai».

4 Chi nau iujãaɗebena Mechiu daaɗe olivo bakuru ome topanuu mauɗe ʉ̃ɗaa koabarii ome topanuu. Mau chi ichi ʉ̃rʉbena doɗaa berreabadau ome panuu jara ɓuu.* 5 Aɓauba maarã kachirua waui kʉ̃riaruubʉrã, ãchi okarrɗebena aokoi mauɗe maarã kĩramaabadaurã baakuai. Ara mau kĩra chi maarãmaa kachirua wauɗai kʉ̃riaduu joma kenaɗai. 6 Maarã ome ẽbẽra Dachi Akõre baita berreamaa panuuɗe, bajãa poyaa jʉ̃aɗai kui chebiamaaba. Mauɗe bania siɗa poyaa oa babiɗai, mauɗe ne kachirua didiwaraa poyaa neebiɗai nau iujãa ãchi kʉ̃ria ãriɗai baita.

7 Maamina joma Dachi Akõre ʉ̃rʉbena berreapeɗaaɗakare mau ãnimara eakarr eɗaa choɓeaɗebena* neeruuba ãchimaa orrai. Maarã poyaapeɗa kenai. 8 Chi biupeɗaaɗa chi Jerusalén puuru mechiuɗe jirata ɓari panaɗai. Mau puuru «Sodoma» maebʉrã «Egipto» abadau, aria ãchi Mechiu Jesús cruzɗe jiraɓu beasiɗauɗeeba. 9 Ẽbẽrarã didiwaraacha jomaɗebena, beɗea didiwaraacha jomaɗebena, puurucha mauɗe drua jomaɗebenarãba mau biupeɗaaɗa aria jirata ɓari ɓee unuɗai ewari õbea baɗapeɗa mauɗe ãsaɗaa.* Maarã biupeɗaaɗa ʉyaaɗai ida kabiɗaabai. 10 Chi ẽbẽrarã nau iujãaɗebena mau biupeɗaaɗa kakua kĩrajʉʉɗai. Kĩrajʉʉba ne kaebea bia ãchiba chiya bari deaɗakaɗai, Dachi Akõre baita berreabadaurãba maarã ãrea biꞌiwãe panabiasiɗauɗeeba. 11 Maamina ewari õbea ẽsa basiiɗe Dachi Akõreba ãchi chokae jiradubiasii. Ãchi jiraduuduu unupeɗaaɗa ãrea perasiɗau. 12 Maabae chi Dachi Akõre baita berreabadaurãba bajãaɗe mimi jĩkua ũrisiɗau. Naka jarasii: «Namaa ʉtaa urústuru». Ara makʉɗe chi kĩramaabadaurãba ichiamaa panuuɗe, ʉtaa jʉ̃rʉara tãeɗe bajãaɗaa wãsiɗau.

13 Mauɗe ioromia meserãa neesii. Mauba Jerusalén puuruɗe de ãrea korekuasii.* 7.000 ẽbẽrarã biusiɗau. Ara mauɗe chi chokae panuuba peraɗeeba chi bajãaɗebena Dachi Akõremaa biꞌia nii a jarasiɗau.

14 Chi mawãarebena mia pera jaraɗa wãꞌãesii. Maamina chi kaaɗearebena mia jaraɗa kãꞌãabariwãeɗe neei.*

Kaaɗearebena kachu chaaɗa

19 Maabae Dachi Akõre de mechiu bajãaɗe kuɓuu ewa wãsii. Aria chi Dachi Akõreba waubiɗa baúl* kuɓuu mʉʉba unusii. Ara mauɗe bã puri chebi koɓeesii, bã to koɓeesii, mauɗe chi bã ãrea ʉrʉrʉa wã koɓeesii. Nau iujãa uri koɓeesii mauɗe hielo siɗa kui kĩra ãrea che koɓeesii.

Wẽra Juanba unuɗa

12 Bajãaɗe ne makai ɓuu ʉ̃rʉbena unusii. Mʉʉba wẽra aɓa ʉmada paru kĩra jʉ̃ ɓuu unusii.* Mau jʉ̃rʉ jeɗako ʉ̃rʉ tʉa kuɓuasii. Boro jũra pusterrea 12 wauɗa jʉ̃ ɓuasii. 2 Mau wẽra warr baraa ɓuasii. Chi warr anakʉɗe adauruuɗeeba chi puaba ɓia ɓuasii.

3 Maabae maucha ne makai ɓuu ʉ̃rʉbena bajãaɗe unusii. Mʉʉba dragón mimichia puria nii unusii. Mau dragón boro 7 inibasii mauɗe kachu siɗa 10 inibasii. Boro jũra borocha jʉ̃ ɓuasii. 4 Chi druu neapesiiɗe pusterrearã bajãaɗebenarã beraa mita ɓaesiɗau nau iujãaɗe.* Mau dragón wẽra warr adaui baita ɓuumare ɓari nuɓeesii chi warr adauruuɗe mii baita. 5 Ara mauɗe chi wẽraba warr adausii. (Mau warrba kĩra chuburiayuwãe joma nau iujãaɗebenarãmaa ichiɗe ijãabia ɓuai).* Maamina mau dragonba mii naeɗe Dachi Akõreba mau warr ʉtaa adoesii ichi ãkauɗe akʉ ɓuumaa. 6 Maabae chi wẽra drua sirua wãꞌãeɗaa miru wãsii. Dachi Akõreba aria joma maka wau ɓuasii 1.260 ewariɗaa mau nu uru panaɗamera.

7 Mau maaɗakare chi ángel mechiu Miguel abadau mauɗe chi angelerã joma ichi baara duanuu, chi dragón chi ichi baara duanuu ome bajãaɗe chĩosiɗau. 8 Maamina chi dragonba mauɗe chi ichi baara duanuuba poyaaɗaabasii. Mauɗeeba chi maarã makaa poyaa bajãaɗe panaɗaabasii. 9 Ara mauɗe chi dragón mechiu mauɗe joma chi ichi baara duanuu nau iujãaɗaa jirakuasiɗau. Mau dragón chi nabẽraeɗebena damabʉ. Chi mau trʉ̃ jʉbawãe nii mauɗe Satanás abadau.* Mauba joma nau iujãaɗebenarã setaa kũrua ua ɓuu.

10 Maabae mʉʉba aɓa bajãaɗe jĩkua berrearuu ũrisii. Naka jarasii:

«Iɗi Dachi Akõreba ichi ẽbẽrarã karibamaa ɓuu.

Iɗi ichi poyaabariiba jomaurã ichi juaɗe ua ɓuu.

Cristo chi karibabarii deai jaraɗaba joma poyaai.

Bajãaɗebena iujãaɗaa chi dachi ãbarã jideabarii jiratasii.

Mauba ẽsabuɗe mauɗe ãyadaa Dachi Akõre daaɗe makabachii.

11 Dachi ãbarãba Oeja Kaebe Nii oa cheɗaba mauɗe ichi beɗea jara panuuɗeeba poyaasiɗau.

Dachi biuɗai panuu ʉ̃rʉbena wapeaɗaabasii, bari Cristo kakua biuɗayua panasii.

12 ¡Mauɗeeba joma chi bajãaɗe panuurã kĩrajʉ́sturu!

Maamina chi nau iujãaɗe mauɗe marɗe panuurã siɗa miichuburi panaɗai, jʉbawãe nii machimaa neesiiɗeeba.

Mau miusia ãrea ɓuu, ãrea ɓuabai ɓuu kuitaa ɓuuɗeeba».

13 Chi dragonba ichi nau iujãaɗaa jirataɗa kuitaasiiɗeeba, mau wẽra warr adauɗa wãraasii kachirua wauyua. 14 Maamina Dachi Akõreba mau wẽramaa nejõo mechiu ikia ome deasii drua sirua wãꞌãeɗaa ũuɓari wãmera. Dachi Akõreba aria joma wau uru ɓuasii año õbea y medio chi dragonɗebena nu uru ɓuai baita. 15 Mauɗeeba chi dragonba ichi okarrɗebena bania iɗutasii do kĩra chi mau wẽra ũu adoemera. 16 Maamina ioroba mau wẽra karibasii. Chi ioro ewapeɗa maabae chi bania dragonba ichi okarrɗebena iɗu ɓuaɗa joma dosii. 17 Mauɗeeba chi dragón chi mau wẽra ome ãrea kĩru koɓeesii. Ara makʉɗe chi waabenarã chi mau wẽraɗebena imipeɗaaɗa ome chĩoɗe wãsii. Maarã imipeɗaaɗa chi Dachi Akõreba waubi ɓuu beɗea waubadaurãbʉ mauɗe chi Jesusba jaradeaɗaɗe ijãabadaurãbʉ.

Ãnimara kachirua marɗebena awara neeɗa

13 Mau maaɗakare chi dragón mar iikaa ibuɗe ʉkʉ nuɓeesii.* Ara mauɗe mʉʉba ãnimara kachirua marɗebena awara neeruu unusii. Mau ãnimara 7 boro inibasii mauɗe 10 kachu. Kachurãcha boro jũra aɓa inibasii. Borocha trʉ̃ kachirua Dachi Akõre ʉ̃rʉbena ɓʉ kuɓuasii. 2 Chi mau ãnimara mʉʉba unuɗa imama kĩra pã nibasii. Ichi jʉ̃rʉ ui jʉ̃rʉ kĩra nibasii. Chi okarr león okarr kĩra nibasii. Dragonba mau ãnimaramaa chi poyaabarii deasii. Mauɗe ichi rey ãkauɗe akʉ ɓeebisii chi nau iujãaɗe panuurã joma ichi juaɗe duanamera. 3 Chi mau ãnimara boro aɓaɗe tõoɗa baɗa aniɗa aɓa inibasii. Biawãra mau tõoɗaba biui ɓuasii maamina chi tõoɗa jãabae aniɗa ɓuasii. Joma nau iujãaɗebenarã kãare kʉ̃risiaɗai adua panasiiɗeeba mau baara panasiɗau. 4 Mauɗe ãchiba chi dragonmaa biꞌia berreabachiɗau, mau ãnimaramaa chi poyaabarii dea ɓuasiiɗeeba. Naka jarabachiɗau: «¿Kai nau ãnimara kĩra nima? ¿Kai nau ome poyaa chĩoi ɓuma?»

5 Dachi Akõreba mau ãnimaramaa ara ichi chi aude mechiu nii a jarai ida kabisii mauɗe Dachi Akõre chi biawãe nii a jaramera. Mauɗe 42 jeɗakoɗaa nau iujãaɗebenarã ichi juaɗe ua ɓuai ida kabisii. 6 Mauɗe mauba Dachi Akõre ʉ̃rʉbena kachirua jarabachii, mauɗe ichi trʉ̃ ʉ̃rʉbena, chi ichi ɓuumaabena ʉ̃rʉbena, mauɗe joma bajãaɗe duanuu ʉ̃rʉbena siɗa. 7 Mauɗe Dachi Akõreba mau ãnimaramaa ara ichi ẽbẽrarã ome chĩobii ida kabisii maarã poyaamera. Ẽbẽrarã didiwaraa joma, puuru joma, beɗea didiwaraa joma mauɗe chi druarã joma ichi juaɗe ua ɓuabisii. 8 Mauɗe joma nau iujãaɗebenarãba chi ãnimaramaa biꞌia berreasiɗau. Iujãa joma waukuai naeɗe maarã trʉ̃ chi Oeja Kaebe Nii kartaɗe wãꞌãe basii. Mau kartaɗe chi ẽbẽrarã joma biuɗaabai panuu trʉ̃ ɓʉ kuɓuu. 9 Chi kʉʉrʉ bara niiba ũrise:

10 «Chi jʉ̃aɗai panuu, mau jʉ̃aɗai.

Chi espadaba biuɗai panuu, mau espadaba biuɗai».*

Mauɗeeba ẽbẽrarã Dachi Akõreɗerã ãrea ijãaɗapeɗa ãrea dauchia jãadua panaɗai panuu.

Chi ãnimara ioroɗebena awara neeɗa

11 Mau maaɗakare mʉʉba ãnimara june ioroɗebena awara neeruu unusii. Mau ãnimara oeja kaebeu kĩra kachu ome inibasmina, dragón kĩra berreabachii. 12 Chi ãnimara ioroɗebena awara neeɗa joma chi nau iujãaɗebenarã chibari ɓeesii, chi nabena ãnimara kĩra. Ichi poyaaɗeeba ẽbẽrarãmaa chi nabena ãnimaramaa biꞌia berreabiabachii. Mau tõoɗaba biui ɓuasmina, wabiɗa chokae ɓuasii. 13 Ãnimara ioroɗebena neeɗaba ẽbẽrarãba ne poyaa wauɗakau mechiurã waukuabachii. Ẽbẽrarãba ichiamaa panasiiɗe bajãaɗebena aoko nau iujãaɗe ɓaebisii. 14 Dachi Akõreba mau ãnimara ioroɗebena awara neeɗamaa chi mau ẽbẽrarãba ne poyaa wauɗakau wauyu ida kabisii chi ãnimara marɗebena awara neeɗa trʉ̃ɗe.* Maka chi ioroɗebena awara neeɗaba nau iujãaɗebenarã setaa kũruasii. Maka chi ãnimara kuenda juaba ne kapeɗaaɗa waubiasii, chi mau espadaba tõopeɗa mauɗe wabiɗa chokae nii kĩra.* Maka waupeɗaaɗakare jomaurãba mau ãrea kʉ̃riaɗai panuu asii. 15 Mau ioroɗebena awara neeɗamaa ida kabisii chi ãnimara kuenda juaba ne kapeɗaaɗa ʉ̃yaba deamera mauɗe berreabimera.* Maabae chi ioroɗebena awara neeɗaba chi ãnimara kuenda juaba ne kapeɗaaɗa ãrea kʉ̃riaɗawẽerã beabiasii. 16 Mau awara chi ioroɗebena awara neeɗaba jomaurãmaa jua biare maebʉrã dauɓʉʉrʉɗe seña ɓubiasii. Chi aude mechiurãmaa, chi kaebeurã, chi nejarra barau nuree, chi nejarr barauwãe nuree, chi chibari baita bari trajabadaurã mauɗe chi chibariswãe nuree mau seña ɓubiasii. 17 Mau seña uru nuréburu nedoɗai panasiɗau mauɗe poyaa nedobʉiɗai panuu. Mau seña chi ãnimara marɗebena awara neeɗa trʉ̃ basii maebʉrã ichi trʉ̃ número basii. 18 Mau numeroba kai ʉ̃rʉbena jara ɓuu kuitaaɗai baita chi kuitaa ãrea nibai ɓuu. Chi kʉ̃risia kuitaa niiba poyaa kuitaai chi kai ʉ̃rʉbena jara ɓuu. Mau número ẽbẽra trʉ̃ basii. Nau chi trʉ̃bʉ: 666.

144.000 ẽbẽrarã karipeɗaaɗa

14 Mau maaɗakare mʉʉba chi Oeja Kaebe Nii Sión eaɗe ʉkʉ nuɓuu unusii. Chi mau baara 144.000 ẽbẽrarã panasii. Ãchi dauɓʉʉrʉɗe chi Oeja Kaebe Nii trʉ̃ mauɗe ãchi Akõre trʉ̃ ɓʉ uru panasii. 2 Maabae mʉʉba bajãaɗe do ʉrʉrʉa kĩra ũrisii, bã ʉrʉrʉa kĩra. Chi mʉʉba ũrisii, arpa chaamaa panuuɗe jĩwabarii kĩra ɓuasii. 3 Mauɗe chi Dachi Akõre chi rey ãkau daaɗe kari wiɗi karimaa panasiɗau, chi kimare chokae nuree daaɗe, mauɗe 24 chõrarã mechiurã daaɗe. Aɓau biɗa poyaa kuitaabasii mau kari karii baita. Bari chi 144.000 Dachi Akõreba nau iujãaɗebena karibakuaɗáburu kariɗai kuitaa panasii. 4 Maarã ẽbẽrarã wẽra auɗua nureasii. Dachi Akõre baita maarã ɓaꞌãra biɗa kachiruaswãe nureasii. Maarã chi Oeja Kaebe Nii baara chi wãaruumaa wãbadau. Dachi Akõreba nau iujãaɗebena chi maarã ichi baita karibakuasii, ichi baita mauɗe chi Oeja Kaebe Nii baita biɗa panaɗamera chi nabena chauɗa ichimaa dearuu kĩra. 5 Maarãba ɓes aɓa biɗa setaa jaraɗakau. Bari kachiruaswãe nuree.

Chi angelerã õbea panuurãba jarapeɗaaɗa

6 Mau maaɗakare mʉʉba ángel aɓa bajãaɗe ũuɓari nii unusii. Mauba chi beɗea bia uru ɓuasii chi nau iujãaɗebena jomaurãmaa jarai baita: puuruɗebenarãcha, druaɗebenarãcha, ẽbẽrarã didiwaraacha mauɗe beɗea didiwaraacha. Mau beɗea ewaricha maka ɓuai. 7 Mauba jĩwa naka jarasii: «¡Dachi Akõre wapeásturu! Ichíturu chi mechiu nii ásturu, ichiba kastikai ewari neesiiɗeeba. Bajãa, iujãa, mar mauɗe bania ioroɗe bumadrubarii wauɗaɗeeba, mau biꞌia berreásturu».

8 Mau ángel kaaɗe neepeɗa naka jĩkua jarasii: «Babilonia puuru mechiu ãrisii. Biawãra joma ãrikuasii. Chi mau puuruɗebenarãba ãrea mia kĩra nejasia wau panuuɗeeba drua aꞌawaraabenamaa ara mau kĩra kachirua waubiasiɗau uva ɓaa asia doobai panuuɗe dobiaduu kĩra».

9 Mau ángel wãɗakare kaaɗe june aɓa ũuɓari neesii. Mauba naka jarasii: «Aɓauba chi mau ãnimaramaa biꞌia berrearuubʉrã mauɗe chi ara ichi kĩra juaba ne kapeɗaaɗamaa biꞌia berrearuubʉrã, mauɗe chi seña dauɓʉʉrʉɗe maebʉrã juaɗe ida waubiiruubʉrã, 10 Dachi Akõreba ichi kĩruuruuba mau ẽbẽra kachirua ãrea ɓui uva ɓaa asia dobiiruu kĩra. Mau ẽbẽra chi ángel biꞌia nuree daaɗe, mauɗe Oeja Kaebe Nii daaɗe azufre aoko nuɓuuba ãrea biꞌiwãe ɓuai. 11 Mau ẽbẽra ãrea biꞌiwãe ɓuumaa aoko nuɓuu iɗi kiikau, bari ewaricha boɗiu nuɓuabarii. Aɓauba chi ãnimara mauɗe chi ara ichi kĩra juaba ne kapeɗaaɗa ãrea kʉ̃riaruubʉrã, kʉrrjĩruswãe ɓuai. Chi mau ãnimara seña juaɗe waubipeɗaaɗa maebʉrã dauɓʉʉrʉɗe ãyadaa mauɗe ẽsabuɗe kʉrrjĩruswãe ɓuai». 12 Mauɗeeba ẽbẽrarã Dachi Akõreɗerã ãrea dauchia jãadua panaɗai panuu. Jesusɗe ãrea ijãaɗapeɗa, ichiba waubi ɓuu beɗea ũribaba panaɗai panuu.

13 Mau maaɗakare mʉʉba bajãaɗe aɓaba jaraaruu ũrisii: «Chi kartaɗe naka ɓʉse: “Iɗiiɗeeba chi Dachi Mechiuɗe ijãa biubadaurã biꞌia panaɗai”».

Mauɗe Dachi Akõreba naka jarasii: «Biawãra biꞌia panaɗai. Maarã biꞌiwãe panaɗaɗebena kʉrrjĩru panaɗai, maarãba biꞌia waupeɗaaɗa waa chau kãriiɗeeba».*

Dachi Akõreba ẽbẽrarã kastikai ʉ̃rʉbena

14 Mau maaɗakare mʉ bajãaɗaa ichiasiiɗe jʉ̃rʉara torr unusii. Mʉʉba chi Ẽbẽra Ba Ɓuaɗa kĩra mau jʉ̃rʉara ʉ̃rʉ akʉ ɓuu unusii.* Boro jũra nee wauɗa jʉ̃ ɓuasii. Ichi juaɗe neko peeɗea jũria ɓuu uru ɓuasii. 15 Mauɗe Dachi Akõre de mechiu bajãaɗe kuɓuareeba ángel aɓa awara neesii. Chi mauba jʉ̃rʉara ʉ̃rʉ akʉ ɓuasiimaa naka jĩwa ɓia jarasii: «Iujãaɗe uuɗa joma waraa kuɓuu. Bichi neko jũria ɓuuba tarise chi tarii ewari basiiɗeeba». 16 Ara makʉɗe chi jʉ̃rʉara ʉ̃rʉ akʉ ɓuaɗaba neko jũria ɓuuba ara jua aɓa tuuruba joma nau iujãaɗe tarisii.

17 Maabae Dachi Akõre de mechiu bajãaɗe kuɓuuɗebena ángel aɓa maucha awara neesii. Mau biɗa neko peeɗea jũria ɓuu aɓa uru ɓuasii. 18 Maabae chi Dachi Akõre baita bajãaɗe kera baa deabadaumarebena june aɓa ángel awara neesii. Mauɗeeba chi tʉbʉchia aoko uru ɓuabarii chi kera baai baita. Naka jĩwa jarasii chi neko peeɗea jũria uru ɓuumaa: «Chi iujãaɗebena uva waraa kuɓuuɗeeba, bichi neko jũria ɓuuba joma tuukuase». 19 Ara makʉɗe chi angelba chi neko jũria ɓuuba jua aɓa tuupeɗa chi uva ɓʉʉrʉcha araa pesii. Maabae chi uva biraduabadaumare bʉikasii biraduaɗamera chi ɓaa adauɗai baita. Mau jara ɓuu Dachi Akõreba kastikai. 20 Chi uva Jerusalén puuru awara biraduasiɗau. Biraduasiɗauɗe mamabena oa ãrea chesii.* Mau oa chi iɗubena ʉtʉ mura okarrɗe jʉ̃badaumaa ba ɓuasii.

Chi 7 angelerãba biꞌiwãe paneebiaɗai ʉ̃rʉbena

15 Maabae mʉʉba waya maucha ne makai biꞌia ɓuu bajãaɗe unusii. Mau kakua ẽbẽrarãba kãare kʉ̃risiaɗai adua paneesii. Angelerã 7 duanasii. Ãchi aɓaaɓaa chi kaaɗearebena ne kachirua uru panasiɗau mauba biꞌiwãe paneebiaɗai baita. Dachi Akõreba maka kastikapeɗa, chi kĩrubi wãꞌãe.

2 Mau awara mʉʉba mar biirio kĩra doɗaa aoko nuɓuu unusii. Mau jãkaa joma chi ãnimara poyaapeɗaaɗa ʉkʉ nuɓeasii. Maarãba mau ãnimara mauɗe chi ara ichi kĩra juaba ne kapeɗaaɗa kʉ̃riaɗakabasii, mauɗe chi trʉ̃ número ɓʉbiaɗaabasii. Arpa Dachi Akõreba deaɗa uru panasii. 3 Chi arpa chaamaa panuuɗe Moisés chi Dachi Akõre baita bari trajabarii kari, mauɗe chi Oeja Kaebe Nii kari karimaa panasii. Naka karisiɗau:

5 Mau maaɗakare mʉʉba ʉtaa bajãaɗaa ichiasiiɗe unusii Dachi Akõre de mechiuɗe eɗa kẽsa paru jiranuu ewa jiranasii. 6 Mau deɗebena 7 ángel awara neesiɗau. Maarãba 7 ne kachirua uru panasiɗau mauba biꞌiwãe paneebiaɗai baita. Maarãba paru torroa teɗechoa lino wauɗa ɓuu jʉ̃ panasiɗau, mauɗe nee wauɗa aɓa odeaɓari jʉ̃ panasiɗau. 7 Mauɗe chi kimare chokae nureeɗebena aɓaba ángel 7 panuurãmaa aɓaaɓaa sãu nee wauɗa deaɗakasii. Mau sãu Dachi Akõre kĩru ɓuuba waabiru ɓuasii. 8 Dachi Akõre deɗe nari ãrea basii ichi teɗechoaɗeeba mauɗe poyaabariiɗeeba. Mauɗeeba aɓa biɗa mau deɗe poyaa wãabasii, chi 7 angelerãba ne kachirua uru panuu biꞌiwãe paneebiai baita wãꞌãeruuɗaa.

Dachi Akõreba 7 kaaɗeare biꞌiwãe paneebiai ʉ̃rʉbena

16 Mauɗe mʉʉba Dachi Akõre de bajãaɗe kuɓuareeba aɓaba jĩwa berrearuu ũrisii. 7 angelerãmaa nau jarakuasii: «Chi sãu Dachi Akõre kĩru kuɓuuba waabiru nuɓuu iujãaɗe eakoaɗe wã́sturu». 2 Ara makʉɗe ángel aɓa wãpeɗa ichi sãuɗe uru ɓuaɗa iujãaɗe eabʉisii. Mauba chi ãnimara trʉ̃ dauɓʉʉrʉɗe maebʉrã juaɗe uru nuree mauɗe joma chi ara ichi kĩra juaba ne kapeɗaaɗa ãrea kʉ̃riabadaurã chaumia kachirua kakuaɗe posiɗau.

3 Mau maaɗakare june aɓa angelba ichi sãuɗe uru ɓuaɗa marɗe eabʉisii. Mauba chi mar oa ba diɗisii. Ẽbẽra aɓa biuɗa oa kĩra nuɓeesii. Maabae chi marɗe chokae nureaɗa joma kinisiɗau.

4 Mau maaɗakare june aɓa angelba ichi sãuɗe uru ɓuaɗa docha mauɗe ioroɗe bania bumadrubariicha eabʉikasii. Maabae mauba chi doorã joma oa ba diɗikuasii. 5 Mauɗe mʉʉba ũrisii chi bania nubarii angelba Dachi Akõremaa naka jaraaruu:

7 Mau maaɗakare mʉʉba ũrisii kera baa deabadau bajãaɗe ɓuareeba aɓauba naka berrearuu: «Dai Akõre Mechiu chi Joma Poyaabarii, bichi biawãra niiɗeeba arakʉɗe ẽbẽrarã kastikabarii».

8 Mau maaɗakare june aɓa angelba ichi sãuɗe uru ɓuaɗa ʉmada ʉ̃rʉ eabʉisii. Mauba chi ʉmada aude koabisii ẽbẽrarã baamera. 9 Dachi Akõre ʉ̃rʉbena kachirua berrea panasii pisiaba ãrea baa panasiiɗeeba, ichiaburu maka ãrea biꞌiwãe panabia ɓuuɗeeba. Maamina ãchi kachirua waubadau ida ɓuɗaabasii mauɗe Dachi Akõre chi Mechiu nii aɗaabasii.

10 Mau maaɗakare june aɓa angelba ichi sãuɗe uru ɓuaɗa chi ãnimara chi rey ãkau ʉ̃rʉ eabʉisii. Ara makʉɗe chi mau ewari pãriusii chi mau ãnimaraba juaɗe ua ɓuaɗamare. Maabae chi ichiɗirã puaba ãchi kẽrame kaabachiɗau. 11 Chi puaba mauɗe kakua chausiiɗeeba Dachi Akõre bajãaɗe ɓuu ʉ̃rʉbena kachirua berrea panasii. Maamina ãrea biꞌiwãe panasmina chi kachirua wau panuu ida ɓuɗaabasii.

12 Mau maaɗakare june aɓa angelba ichi sãuɗe uru ɓuaɗa Éufrates do mechiuɗe eabʉisii. Ara makʉɗe mau do poasii chi ʉmada neebariareɗebena reyrã chĩoɗe needuuɗe do põasãaɗe kĩaraa wãɗamera.

13 Mauɗe õbea chi jai kachirua nureerã unusii. Aɓa dragón okarrɗebena neesii. Aɓa ãnimara okarrɗebena neesii. Mauɗe aɓa Dachi Akõre baita berreabarii chi biawãrawãe okarrɗebena siɗa neesii.* 14 Maarã chi jai kachirua nuree jaurirãba ẽbẽrarãba ne poyaa wauɗakau ãrea wausiɗau. Mauɗe joma druachaɗebena reyrãmaa jarakuaɗe wãsiɗau Dachi Mechiu ome chĩoɗe wãɗamera chi Dachi Akõre Joma Poyaabarii kastikai ewariɗe. 15 Maarãba hebreo beɗeaɗe Armagedón abadau druaɗaa chi reyrã chĩoɗe uaɗosiɗau.

«¡Ũrísturu! Mʉ nechiru kĩra neei.* Biꞌia panaɗai chi mʉ neeruu eseɗau panuu mauɗe paru uru nuree. Maka mʉ neeruuɗe maarã ewaraa panaɗaabai mauɗe kĩra nejasia panaɗaabai». 16 —.

17 Mau maaɗakare june aɓa kaaɗearebena angelba ichi sãuɗe uru ɓuaɗa ʉtʉ eɗaa eabʉisii. Ara mauɗe Dachi Akõre de bajãaɗe kuɓuumare chi rey ãkau kuɓuareeba jĩwa naka jarasii: «Jãabae ara basma». 18 Ara makʉɗe bã puri chebi koɓeesii, bã beɗea baraa ãrea to koɓeesii, mauɗe ioromia siɗa ãrea neesii. Dachi Akõreba ẽbẽra wausiiɗeeɗebena iɗi jãka ioromia urikabasii. 19 Mau ioromiaba puuru mechiu aɓa nau iujãaɗebena kõapeɗa, maabae aꞌawaraa puuru õbea kĩra ɓusii. Mauɗe nau iujãaɗebena puururã siɗa joma ãrikuasii. Ara mauɗe Dachi Akõreba Babilonia puuru mechiu kastikai kʉde uru ɓuai ida ɓuubasii. Uva ɓaa asia dobiiruu kĩra ichi kĩru kuɓuuɗeeba mau puuru ãrea kastikasii. 20 Mau ioromiaba mar kẽsa islarã koɓeaɗa mauɗe ea joma wãꞌãebisii. 21 Bajãaɗebena ẽbẽrarã ʉ̃rʉ hielo mo mechiu kĩra ɓaesiɗau. Mau hielo beraa 40 kilos chikʉa ɓeasii.* Mau hielo ɓaesiɗauba biꞌiwãe panasiɗauɗeeba, maarãba Dachi Akõre ʉ̃rʉbena kachirua berreasiɗau.

Wẽra auɗuabarii Juanba unuɗa

17 Jua aɓa ome angelerãɗebena sãu 7 uru ɓuaɗa aɓa mʉ ɓuumaa neepeɗa mʉʉmaa naka jarasii: «Wãuríduru. Mʉʉba unubii Dachi Akõreba saka wẽra auɗuabarii trʉ̃ poa ɓuu kastikaaruu. Mau wẽra bania ãrea tãeɗe akʉ ɓuu.* 2 Nau iujãaɗebena reyrã mau wẽra ome kachirua waubachiɗau. Mauɗe mau wẽraba ichi kakuaba barikiu kachirua wauruu unubachiiɗeeba joma nau iujãaɗebenarã biɗa ara mau kĩra waubachiɗau ituaba biu panuu kĩra».

3 Ara makʉɗe Dachi Akõre Jauriɗeeba angelba mʉ drua sirua wãꞌãe ɓuuɗaa adoesii. Aria mʉʉba wẽra aɓa ãnimara kachirua ʉ̃rʉ akʉ ɓuu unusii. Puria nibasii mauɗe ichi kakuaɗe trʉ̃ ãrea Dachi Akõre ʉ̃rʉbena kachirua jaraaruu ɓʉ inibasii. Boro 7 mauɗe kachu 10 inibasii. 4 Mau wẽra paru pãaraa mauɗe puria jʉ̃ nibasii. Nee, mo doɗaa mipitaa mauɗe perla jʉ̃ nibasii. Ichi juaɗe sãu nee wauɗa uru ɓuasii. Mau sãuɗe barikia ne joma Dachi Akõreba kʉ̃riakau duanasii mauɗe mau wẽraba mia kĩra nejasia wau ɓuaɗa. 5 Ichi dauɓʉʉrʉɗe trʉ̃ aɓa ẽbẽrarãba kauwa ũriɗakau ɓʉ inibasii. Naka ɓʉ inibasii:

«Mʉ Babilonia chi puuru mechiubʉ. Mʉ wẽrarã auɗuabadaurã nawebʉ, mauɗe ne joma Dachi Akõreba nau iujãaɗe kʉ̃riakau nawebʉ».

6 Mʉʉba ichiasiiɗe kuitaasii mau wẽra ẽbẽrarã Dachi Akõreɗerã oaba itua biu ɓuasii, chi Jesusɗe ijãabadaurã mauɗe chi ichi ʉ̃rʉbena jarabadaurã beapeɗaaɗa oaba.

Mau wẽra unuɗakare kãare kʉ̃risiai adua basii. 7 Mauɗe angelba mʉʉmaa nau iɗisii: «¿Sakãe kãare kʉ̃risiai aduama? Mau wẽra ʉ̃rʉbena aɓauba kauwa ũrii ɓuu mauɗe chi ãnimara ʉ̃rʉ mau wẽra wãaruu akʉ ɓuu mʉʉba mau kauwa jarai. Mauɗe chi ãnimara boro 7 inii, mauɗe ichiba kachu 10 inii ʉ̃rʉbena biꞌia jarai. 8 Chi bichiba unuɗa ãnimara naeɗe chokae nibaɗa iɗibae wãꞌãe. Maamina ewari aɓaɗe eakarr eɗaa choɓeaɗebena ʉtaa neeruuɗe, Cristoba mau ewaricha kastikai. Nau iujãaɗebenarãba chi naeɗe nibaɗa mauɗe iɗibae wãꞌãe waya neeruu unuuduuɗe kãare kʉ̃risiaɗai adua panaɗai. Nau iujãa waui naeɗe ãchi trʉ̃ chi ewaricha chokae duanabarii kartaɗe ɓʉwẽa ɓuasii.

9 »Chi bichiba unuɗa kauwa ũrii baita chi kuitaa ãrea nibai. Chi 7 boro, 7 ea jara ɓuu. Chi wẽra auɗuabarii mau 7 ea ʉ̃rʉ akʉ ɓuu. 10 Mauɗe chi 7 boro, 7 rey jara ɓuu. Maarã 7 reyrãɗebena, jua aɓa biusiɗau. Chi maarãɗebenaba ẽbẽrarã wabiɗa ichi juaɗe ua ɓuu. Mauɗe wabiɗa maarãɗebenarã aɓa awara neewẽa ɓuu, maamina chi mau neeruuɗe ẽbẽrarã rey baarumina ãrea ɓuabai. 11 Chi ãnimara chi naeɗe nibaɗa mauɗe iɗibae wãꞌãe, mau chi jua aɓa õbea reybʉ. Mau chi 7 reyrãɗebenabʉ. Cristoba mau ewaricha kastikai.

12 »Chi bichiba unuɗa kachurã 10 panuu, 10 reyrã baɗai panuu jara ɓuu; wabiɗa reyrã baɗawẽa panuu. Maamina chi ãnimara rey baaruuɗe ãchi siɗa rey baɗai, ewari ãrea panaɗaabai ɓumina.* 13 Maarã 10 reyrã kʉ̃risia araɓauɗe panuu. Mauɗeeba chi poyaabarii chi ãnimaramaa deaɗai mauɗe ãchi puuru ichi juaɗe ɓuɗai. 14 Maabae chi maarã Oeja Kaebe Nii ome chĩoɗai. Maamina chi Oeja Kaebe Niiba chi maarã poyaakuai, ichi Jomaurã Reyrã Audeara Chi Aude Mechiu Nii mauɗe Joma Chi Mechiurã Audeara Chi Aude Mechiu Niiɗeeba. Poyaakuaɗakare chi ichiɗe ãrea ijãabadaurã ichi baara paneeɗai. Ichiba chi maarã iukuapeɗa jʉrʉ adaukuasii».

15 Maabae chi angelba naka jarasii: «Bichiba chi mau wẽra akʉ ɓuumare doorã ãrea unusii. Chi mau doorã ãrea puuru didiwaraa, beɗea didiwaraa mauɗe drua didiwaraa jara ɓuu. 16 Chi bichiba unuɗaba kachurã 10 panuurãba mauɗe chi ãnimaraba wẽra auɗuabarii kĩramaa panaɗai. Mauɗeeba chi mauba uru ɓuu joma juakaa adauɗai. Joma ewaraa ɓuɗai. Maarãba ichi kiuru koɗapeɗa maabae chi ɓeeruu baataɗai. 17 Dachi Akõreba maarã 10 reyrã sõɗe ɓusii ichiba kʉ̃ria ɓuu wauɗamera. Mauɗeeba maarãba kʉ̃risia araɓauɗe uru panaɗai mauɗe chi ãnimaraba jaraaruu joma ijãaɗai Dachi Akõreba jaraɗa makaaruuɗaa. 18 Chi bichiba unuɗa wẽra auɗuabarii puuru mechiu jara ɓuu. Mau puuruɗebena reyba drua jomaɗebena reyrã ichi juaɗe ua ɓuu».

Dachi Akõreba Babilonia kastikai ʉ̃rʉbena

18 Mau maaɗakare mʉʉba june aɓa ángel bajãaɗebena eɗaa uruu unusii. Mau chi mechiu nibasii. Ichi teɗechoaba nau iujãa ʉ̃ɗaasii. 2 Naka jĩwa jarasii:

11 Nau druaɗebena ne kaebea nedobʉibadaurã jẽaɗai mau puuru kakua ãchiba nedobʉi panuu kaiba nedoɗai wãꞌãe baiɗeeba. 12 Mau puuruɗe ne joma nedobʉibachiɗau: Nee, parata, mo doɗaa mipitaa mauɗe perla chi nejarr ãrea iɗibadau, lino mauɗe seda paru chi aude chi bia, paru pupuchia, paru purr, bakuru tuwaa ɓee, ne elefante kiɗa wauɗa, ne bakuru chi nejarr ãrea iɗibadau wauɗa, bronce wauɗa, ne jiorr wauɗa mauɗe ne mármol mokara wauɗa.* 13 Canela, joma barikiu ne tuwaa, incienso ne tuwaa, mirra ne tuwaa, kera, uva ɓaa, olivo drabirua, harina biꞌia ɓaɗa, trigo, pakarã, oejarã, murarã mauɗe karretarã nedobʉibachiɗau. Mauɗe mau puuruɗe ẽbẽrarã siɗa nedobʉibachiɗau chibari baita bari trajabadaurã nureaɗamera. 14 Joma mau nedobʉibadaurãba naka jaraɗai:

«Joma mau puuruɗebenarãba kʉ̃ria panaɗa jãabae wãꞌãesii. Chi nejarra ãrea uru panaɗa mauɗe chi ne bia nuree ãrea uru panaɗa joma wãꞌãesii. Waa makaa adauɗaabai».

15 Biawãra mau puuruɗaa ne kaebea nedobʉiɗe wãpeɗaaɗa ãrea barau paneesii. Chi maarã wapea panaɗai Dachi Akõreba mau puuru kastikaɗa kĩra ãchi siɗa kastikaiɗeeba. Mauɗeeba kaitawẽeba ichia kopanuuba naka biuchaa jẽasiɗau:

Joma chi jãba adoebadaurã, jãbaɗe wãbadaurã, jãbaɗe trajabadaurã mauɗe mau marɗe trajabadaurãba kaitawẽeba ichia duanaɗai. 18 Mau puuru baa nuɓuu nari unuuduuɗe jĩwa naka jaraɗai: «¿Sãu puuru jãu puuru kĩra ɓuasma?» 19 Nomaaba ãchi boro ʉ̃rʉ ioro jora kuikuaɗai maabae jĩwa naka jẽaɗai:

21 Maabae ángel mechiuba mo mechiu kũruma kĩra ɓuu marɗe jiratasii. Makamaa ɓuuɗe naka jarasii:

Bajãaɗe duanuurãba Dachi Akõremaa biꞌia jarabadau

19 Mau maaɗakare mʉʉba bajãaɗe ãrea naka berrea duanuu kĩra ũrisii:

4 Mauɗe chi 24 chõrarã mechiu mauɗe chi kimare chokae nuree õdarrɗe kopaneesiɗau Dachi Akõremaa biꞌia berreaɗai baita. Dachi Akõre ichi rey ãkauɗe akʉ ɓuuɗe ãchiba naka jarasiɗau:

«¡Biꞌia ɓuu maka ɓuai!* ¡Dachi Mechiumaa biꞌia jaráduru!»

5 Mauɗe mʉʉba ũrisii Dachi Akõre rey ãkau ɓuareeba aɓauba naka jĩwa berrearuu:

Oeja Cheke miakãiduu ewari

6 Maabae mʉʉba ãrearã jĩwa berrea duanuu ũrisii. Mau do ʉrʉrʉa kĩra mauɗe bã ãrea ɓaemaa ɓuu kĩra ɓuasii. Naka jara duanasiɗau:

(Mau paru lino wauɗaba jara ɓuu ẽbẽrarã Dachi Akõreɗerãba jipa waubadau).

9 Mauɗe angelba mʉʉmaa jarasii: «Kartaɗe naka ɓʉse: “¡Biꞌia ãrea duanaɗai chi Oeja Kaebe Nii miakãipeɗaaɗa chiko kooduumaa iupeɗaaɗarã!”» Mauɗe jarasii: «Mau biawãra beɗea Dachi Akõreba jaraɗabʉ».

10 Ara makʉɗe mʉ chi ángel jʉ̃rʉ kaita õdarrɗe koɓeesii biꞌia berreai baita. Maamina mauba mʉʉmaa jarasii: «Mau waurã́se, Dachi Akõréturu biꞌia kʉ̃riáse. Bari mʉ Dachi Akõre baita bari trajabariibʉ bichi kĩra, mauɗe ãbarã Jesusba jaradeaɗa ijãabadaurã kĩra».

Jesusba jaradeaɗa Dachi Akõre Jauriba chi ichi baita berreabadaurãmaa berreabiabarii.*

Mura torr ʉ̃rʉ neeɗa

11 Maaɗakare mʉʉba bajãaɗe poraa ewa nuɓuu unusii. Ara makʉɗe mura torr neesii. Mau mura ʉ̃rʉ akʉ ɓuu trʉ̃ jarabadau Chi Jaraɗa Kĩra Waubarii mauɗe Chi Biawãra abadau. Mauba ẽbẽrarã jipa ichiabarii mauɗe jipa wau ɓuuɗeeba chi kĩramaa panabadau ome chĩobarii. 12 Ichi dau tʉbʉ aoko nuɓuu kĩra koa ɓuasii. Ichi boroɗe boro jũra ãrea jʉ̃ ɓuasii. Ichi boroɗe trʉ̃ ɓʉ inibasii maamina aɓau biɗa mau trʉ̃ adua basii; ichiaburu mau kuitaa ɓuasii. 13 Ichi paru oaɗe ũraɗa ɓuu jʉ̃ nibasii. Ichi trʉ̃ «Dachi Akõre Beɗea» abadau.* 14 Ichi kaaɗe bajãaɗebena kokoroarã mura torroa nuree ʉ̃rʉ imisiɗau. Maarãba paru chi aude chi bia ãrea lino wauɗa torroa ɓee jʉ̃ nureasii. Ɓistĩika biɗa ãichorroaɗawẽa nureasii. 15 Dachi Akõre Beɗea abadau okarrɗeeba chĩobarii neko peeɗea ɓuu nee ɓuasii druachabenarã poyaai baita. Ichi kĩra chuburiayuwãe joma nau iujãaɗebenamaa ichiɗe ijãabia ɓuai.* Uva biraduaruu kĩra, ãchi maka kastikai, Dachi Akõre Joma Poyaabarii kĩru kuɓuuɗeeba. 16 Ichiba paru jʉ̃ ɓuumaa ɓakara ʉ̃rʉ nau trʉ̃ ɓʉ inii: «Jomaurã Reyrã Audeara Chi Aude Mechiu Nii» mauɗe «Joma Chi Mechiurã Audeara Chi Aude Mechiu Nii».

17 Maabae mʉʉba ángel aɓa ʉmada ʉ̃rʉ akʉ nuɓuu unusii. Ichiba joma kiuru mikia kobadaurã ʉtʉ ũuɓaribadaurãmaa naka jĩwa jarasii: «Nésturu. Araa ãbua joma imísturu chiko ãrea Dachi Akõreba wau ɓuumaa. 18 Aria reyrã kiuru koɗe wãɗai, kokoroarã karrarã kiuru, mechiurã nuree kiuru, mura kiuru mauɗe mura ʉ̃rʉ ataubadau kiuru siɗa koɗai. Joma ẽbẽrarã kiuru koɗai: chi chibari baita bari trajabadaurã kiuru, chi chibariswãe nuree kiuru, chi kaebeu nuree kiuru, mauɗe chi aude mechiurã kiuru koɗai».

19 Maabae mʉʉba ãnimara kachirua, nau iujãaɗebena reyrã, mauɗe joma ãchi kokoroarã ãbua imipeɗaaɗa unusii. Ãbua panasiɗau chi mura ʉ̃rʉ akʉ ɓuu ome chĩoɗai baita mauɗe chi ichi baara panuu kokoroarã ome chĩoɗai baita. 20 Chi mura ʉ̃rʉ akʉ ɓuuba ãnimara kachirua mauɗe chi Dachi Akõre baita berreabarii chi biawãrawãe jidausii. Mauba ãnimara kachirua trʉ̃ɗeeba ẽbẽrarãba ne poyaa wauɗakau mechiu waubachii. Mauba ãnimara kachirua seña ida waubiapeɗaaɗa joma setaa kũruabachii. Mau chi ara ichi kĩra juaba ne kapeɗaaɗa ãrea kʉ̃riapeɗaaɗa setaa kũruabachii. Chi mura ʉ̃rʉ akʉ ɓuuba mau ãnimara kachirua mauɗe chi Dachi Akõre baita berreabarii chi biawãrawãe chokae panuu choɓea mar kĩra eɗa azufre aoko nuɓuuɗe jiratasii. 21 Chi neko ichi okarrɗebena awara nee ɓuuba waabenarã joma kenasii. Maabae joma chi kiuru mikiaɗa kobadau ʉtʉ ũuɓaribadaurãba mau kiuru kosiɗau jãwaaduuɗaa.

1.000 años

20 Mau maaɗakare mʉʉba ángel aɓa bajãaɗebena eɗaa uruu unusii. Mauba eakarr eɗaa choɓeabena poraa ewabarii uru ɓuasii. Mauɗe kaena borea ɓuu ichi juaɗe uru ɓuasii. 2 Chi dragón jidadaupeɗa 1.000 años jʉ̃ kuɓusii. Mau dragón nabẽraeɗebena damabʉ. Jʉbawãe nii mauɗe Satanás abadau. 3 Angelba mau eakarr eɗaa choɓeaɗe jiratasii maabae jʉ̃a kuɓusii aɓau biɗa poyaa ewarãaɗamera. Mauɗeeba jʉbawãe niiba drua jomaɗebenarã waa setaa kũruabai aɓa 1.000 años wãꞌãeruuɗaa. 1.000 años baɗakare mau enatai nau iujãaɗe ewari ɓaꞌãra ɓuamera.

4 Maabae mʉʉba rey ãkaurã ãrea unusii. Mau ʉ̃rʉ akʉ ɓeemaa Dachi Akõreba deaɗakasii ẽbẽrarãba waupeɗaaɗa ichiaɗamera. Mauɗe ẽbẽrarã boro tʉʉtapeɗaaɗa jauri unusii. Maka boro tʉʉtasiɗau Jesusba jaradeaɗa ijãa panuuɗeeba mauɗe Dachi Akõre beɗea jaradea panuuɗeeba. Ãchiba ãnimara kachirua nii mauɗe chi ara ichi kĩra juaba ne kapeɗaaɗa ãrea kʉ̃riaɗaabasii. Ichi seña ãchi dauɓʉʉrʉɗe juaɗe biɗa ida waubiɗaabasii. Ãchi chokae jiraduɗapeɗa Cristo baara karrarã 1.000 años paneesiɗau. 5 Mau chokae jiradupeɗaaɗa chi Dachi Akõreba naa chokae jiradubiaɗa basii. Waabenarã biupeɗaaɗarã chokae jiraduɗaabasii aɓa 1.000 años wãꞌãesiiɗaa. 6 Ẽbẽrarã Dachi Akõreba naa chokae jiradubiaruu ãrea biꞌia nureaɗai. Maarã waa biuɗaabai, bari Dachi Akõre mauɗe Cristo paarerã paneeɗai.* Mauɗe 1.000 años Cristo ome chi karrarã nureaɗai.

Dachi Akõreba Satanás tʉbʉchia kiikauɗe jirataɗa

7 1.000 años neeruuɗe Satanás jʉ̃ ɓuaɗa ena ɓeei. 8 Mau maaɗakare chi mauba joma druacha setaa kũruakuaɗe wãi. Gog druaɗebenarã mauɗe Magog* druaɗebenarã setaa kũruakuaɗe wãi. Mau druaɗebenarã kokoroarã mar ibu kĩra ãrea panuu uaɗoi ẽbẽrarã Dachi Akõreɗerã ome chĩoɗamera. 9 Joma nau iujãaɗe wãɗai. Maabae Dachi Akõreba kʉ̃ria ɓuu puuru mauɗe ichi ẽbẽrarã duanuumaa aɗu jũraɗai. Maamina Dachi Akõreba bajãaɗebena tʉbʉchia ɓaebiai. Mauba chi maarã joma baa kenai. 10 Mau maaɗakare Dachi Akõreba jʉbawãe nii ẽbẽrarã setaa kũrua uru ɓuaɗa choɓea mar kĩra azufre bara aoko nuɓuuɗe jiratai. Naeɗe Dachi Akõreba ãnimara kachirua ɓuu, Dachi Akõre baita berreabarii chi biawãrawãe siɗa mau tʉbʉ aokoɗe jiratasii. Chi maarã mauɗe jʉbawãe nii siɗa ewaricha ãyadaa mauɗe ẽsabuɗe ãrea biꞌiwãe panaɗai.

Rey ãkau torroa mechiu nuɓuuɗeeba nebʉra ichiakuai

11 Mau maaɗakare mʉʉba rey ãkau mechiu torroa ɓuu mauɗe chi mauɗe akʉ ɓuu unusii. Ichi daaɗe joma nau iujãa mauɗe bajãa wãꞌãesii. Aɓau biɗa waa unuɗaabasii. 12 Mauɗe mʉʉba unusii biupeɗaaɗarã chi mechiurã mauɗe chi kaebeurã Dachi Akõre rey ãkau daaɗe akʉ topanuu. Mauɗe chi ɓee karta* ewakuasii. Maabae june aɓa karta ewasii. Mau kartaɗe ẽbẽrarã ewaricha chokae nureaɗai trʉ̃ ɓʉ kuɓuasii. Dachi Akõreba chi biupeɗaaɗarã joma ichiasii ãchiba waupeɗaaɗa kĩra, chi maarã kartaɗe ɓʉ kuɓuaɗa kĩra. 13 Joma chi marɗe biupeɗaaɗarã Dachi Akõre daaɗe imisiɗau. Joma chi biupeɗaaɗa ãchi panabadaumarebena Dachi Akõre daaɗe imisiɗau.* Maabae Dachi Akõreba ãchi aɓaaɓaa ichiai ãchiba waupeɗaaɗa kĩra. 14 Dachi Akõreba chi biuɗai joma wãꞌãebisii ea choɓeaɗe azufre bara aoko nuɓuuɗe jirataaruu kĩra. Biupeɗaaɗa panabadaumarebena siɗa aria jiratasii. Mau ea choɓeaɗe azufre bara aoko nuɓuu ɓes ome biui jara ɓuu. 15 Chi ẽbẽrarã trʉ̃ chi ewaricha chokae duanabarii kartaɗe wãꞌãerã Dachi Akõreba mau ea choɓeaɗe azufre bara aoko nuɓuuɗe jiratasii.

Jerusalén wiɗi

21 Mau maaɗakare mʉʉba bajãa wiɗi mauɗe iujãa wiɗi unusii. Makaeɗe nau bajãa mauɗe nau iujãa wãꞌãe basii. Mar siɗa wãꞌãe basii. 2 Mauɗe mʉʉba unusii Dachi Akõre ɓuumarebena ichi puuru wiɗi Jerusalén bajãaɗebena eɗaa uruu.* Mau puuru mipitaa ãrea ɓuasii wẽra miakãiruuɗe paru jʉ̃barii kĩra. 3 Maabae mʉʉba ũrisii aɓa Dachi Akõre rey ãkau ɓuareeba naka jĩwa berrearuu:* «¡Ũrísturu! Iɗi Dachi Akõre ẽbẽrarã tãeɗe ɓuu.* Ichi ãchi baara ɓuai. Mauɗe ãchi ichi puuruɗebenarã nureaɗai. Ichi ãchi Akõre bai mauɗe biawãra ichi ãchi baara ɓuabarii. 4 Ãchi dau ɓaa ichiba joma poabiai. Naeɗe ɓuaɗa joma wãꞌãesiiɗeeba, maarã waa biuɗaabai, jẽaɗaabai, kĩra nomaa jẽaɗaabai, mauɗe waa biꞌiwãe panaɗaabai».

5 Maabae chi rey ãkauɗe akʉ ɓuuba naka jarasii: «Mʉʉba joma chiwiɗi waumaa ɓuu». Mauɗe naka jarasii: «Chi mʉʉba jara ɓuu karta aɓaɗe ɓʉse chi biawãra beɗeaɗeeba, mauɗe biawãra makaaruu poyaa ijãaduuɗeeba».

6 Mauɗe mʉʉmaa naka jarasii: «Jãabae mau joma wau kuɓuu. Mʉ chi Alfabʉ mauɗe chi Omegabʉ.* Mau jara ɓuu mʉ chi nabenabʉ mauɗe chi kaaɗebenabʉ. Bari obisia ɓuubʉrã, mʉʉba ioroɗe bania bumadru ɓuuɗebena bari dobiai. Mau baniaba ewaricha chokae nibabiabarii. 7 Chi kachirua wauɗai poyaapeɗaaɗarãba joma nau adoeɗai, warrba chi akõreba uru ɓuuɗebena adaubarii kĩra. Mʉ ãchi Dachi Akõre bai mauɗe mʉ warrarã nureaɗai. 8 Maamina chi mʉ baara wãɗai sõ borekea nuree, chi Dachi Akõreɗe ijãaɗakaurã, chi Dachi Akõreba kʉ̃riakau waubadaurã, chi mia beabadaurã, chi dachi kakuaba barikiu kachirua waubadaurã, jaibanarã, chi Dachi Akõre kuenda juaba ne kapeɗaaɗaɗe ijãabadaurã, mauɗe chi seta iɗaa nuree choɓea mar kĩra azufre baara aoko nuɓuuɗe ãrea biꞌiwãe duanaɗai. Mau chi ɓes ome biui jara ɓuu».*

9 Maabae angelerã 7 sãu uru panaɗaɗebena aɓa mʉʉmaa neesii. Mau angelerãba ãchi paratuɗe 7 uru panaɗaba nau iujãaɗebenarã ãrea biꞌiwãe paneebiasiɗau.* Chi mʉʉmaa neeɗaba naka jarasii: «Wãɗa. Mʉʉba unubii chi wẽra Oeja Kaebe Nii ome miakãiruu».

10 Ara makʉɗe Dachi Akõre Jauriba mʉ ea mechiu ʉtʉ ɓuuɗaa adoesii. Aria bajãaɗe Dachi Akõre ɓuabariimarebena eɗaa neeruu mʉʉmaa unubisii Dachi Akõre puuru Jerusalén abadau. 11 Dachi Akõre kĩrawãreaba mau puuru ʉ̃ɗaa jẽratĩu ɓuasii. Teɗechoa ɓuasii mo mipitaa mau chi nejarr ãrea iɗibadau kĩra mauɗe jaspe mo kĩra. Mau biirio kĩra doɗaa ɓuasii. 12 Mau puuru mooba ʉtʉ, mechia aɗu pũ kuɓuasii. Poraa 12 uru ɓuasii. Poraacha ángel aɓa ɓuasii. Mau awara poraacha Israel warrarã 12 panaɗa trʉ̃ eɗa ɓʉ kuɓeasii. 13 Ʉmada neebariare poraa õbea topanasiɗau, ʉmada ɓaebariare poraa õbea topanasiɗau, norteare poraa õbea topanasiɗau mauɗe waya aɓabena suruare poraa õbea topanasiɗau. 14 Mau puuru aɗu pũ kuɓuu mo 12 ʉ̃rʉ pũ kuɓuasii. Moocha Oeja Kaebe Niiba chi 12 bʉiɗaɗebena trʉ̃ aɓa ɓʉ poebasii.

15 Chi ángel mʉ ome berrea ɓuaɗaba iujãa chaabarii nee wauɗa uru ɓuasii mau puuru, chi poraa mauɗe chi pũ koɓee chaai baita. 16 Mau chaabariiba chi puuru chaasii. Joma araɓauɗe ɓuasii. Chi deseroa mauɗe chi jõparrea siɗa araɓauɗe ɓuasii. Chi chaaɗa 2.200 kilómetros ɓuasii.* Chi deseroa, chi jõparrea mauɗe ʉtʉbena araɓauɗe ɓuasii. 17 Maabae puuru aɗu pũ koɓee siɗa chaasii. Chi chaaɗa 65 metros ɓuasii.* Angelba nau iujãaɗebenarãba chaabadau kĩra chaasii.

18 Mau puuru nee wauɗáturu ɓuasii. Mau biirio doɗaa kĩra ɓuasii. Chi mo puuru aɗu pũ kuɓuu jaspe mooba pũɗa kuɓuasii. 19 Mau 12 mo ʉ̃rʉ kuɓuasii. Mau mo joma mipitaa ɓeasii.

22 Mau puuruɗe mʉʉba Dachi Akõre de mechiu unuubasii wãꞌãeɗeeba. Ẽbẽrarãba Dachi Akõre chi Joma Poyaabarii mauɗe chi Oeja Kaebe Niimaa biꞌia berreaɗai, naeɗe ichi de mechiuɗe waubachiɗau kĩra.* 23 Ʉmadaswãe, jeɗakoswãe mau puuru ʉ̃ɗaa nuɓuabarii Dachi Akõre kĩrawãreaba mauɗe Oeja Kaebe Niiba ʉ̃ɗaa ɓuuba. 24 Chi puuru ʉ̃ɗaaba druacha joma ʉ̃ɗaa duanaɗai joma mau ʉ̃ɗaaɗe nibaɗamera. Mauɗe druachabena reyrãba ne bia uru ɓee mau ichimaa adoeɗai.* 25 Ẽsabuɗebena wãꞌãe baiɗeeba poraa chi puuruɗebena ewaricha ewa nuɓuai. 26 Joma druachabenarãba ne bia uru ɓeaɗa mamaa adoeɗai Dachi Akõremaa deaɗai baita.* 27 Maamina joma Dachi Akõreba biꞌia unukau mau puuruɗe eɗa adoeɗaabai. Ne kachirua waubadaurã, chi Dachi Akõreba kʉ̃riakau waubadaurã mauɗe chi seta iɗaa nuree eɗa wãɗaabai. Aɓa chi ewaricha chokae duanabarii kartaɗe trʉ̃ kuɓéturu poyaa eɗa wãɗai. Mau karta Oeja Kaebe Niiba uru ɓuu.

Chi dachi chokae ɓuabiai do ʉ̃rʉbena

22 Mau maaɗakare angelba do pawãraa ɓuu mʉʉmaa unubisii. Biirio kĩra doɗaa ɓuasii. Mau baniaba ewaricha chokae ɓuai deabarii. Dachi Akõre mauɗe Oeja Kaebe Nii rey ãkau bia ɓuareeba mau do puuruɗebena o jõparrea ɓuu ẽsa eaɓari ɓuu. Mau do kĩarecha bakuru chi jõo ewaricha chokae ɓuai deabarii poe basii. Añoɗe ɓes 12 ome chaubarii, jeɗako ewaricha chaubariiɗeeba. Chi kiruu ʉrrmiɗia kĩra ɓuu, druachabenarã jaiswãe panaɗamera. 2 —. 3 Dachi Akõreba mau puuruɗe kachirua baraai a jaraɗa wãꞌãe bai. Dachi Akõre mauɗe Oeja Kaebe Nii rey ãkau mau puuruɗe panaɗai. Aria Dachi Akõre baita bari trajabadaurãba ichimaa biꞌia berreaɗai. 4 Ichi kĩedarr unuɗai mauɗe ichi trʉ̃ ãchi dauɓʉʉrʉɗe ɓʉ uru nureaɗai. 5 Ẽsabuɗebena wãꞌãe bai. Dachi Akõre Mechiuba ʉ̃ɗaa deaiɗeeba, ẽbẽrarã ʉ̃ɗaaswãe biꞌia duanaɗai mauɗe ʉmadaswãe. Ewaricha ãchi ichi ome ãbua chi karrarã nureaɗai.

Cristo kãꞌãabariwãeɗe neei ʉ̃rʉbena

6 Maabae angelba mʉʉmaa jarasii: «Joma nau beɗea biawãrabʉ mauɗe biawãra makaaruu poyaa ijãa panuu. Dachi Akõre Mechiuba ichi baita berreabadaurãmaa ichi beɗea berreabiabarii. Ichiaburu chi ángel bajãaɗebena bʉisii ichi baita bari trajabadaurãmaa kuitaabiamera kãꞌãabariwãeɗe makaaruu».

7 Jesusba jarasii: «¡Ũrísturu, mʉ kãꞌãabariwãeɗe neei! Ãrea biꞌia ɓuu joma chi Dachi Akõre baita berreabarii beɗea nau kartaɗe jara ɓuuɗe ijãa ɓuu».

8 Mʉ Juanbʉ. Joma mau unusii mauɗe ũrisii. Mau maaɗakare mʉ ángel jʉ̃rʉ kaita õdarrɗe koɓeesii biꞌia berreai baita. Makasii chi mauba mʉʉmaa unubisiiɗeeba. 9 Maamina ichiba jarasii: «Jãka waurã́se, maumaarã Dachi Akõremáturu biꞌia berreáse. Mʉ araɓauɗe bichi kĩra Dachi Akõre baita bari trajabariibʉ, ãbarã Dachi Akõre baita berreabadaurã kĩra, mauɗe joma nau kartaɗe jara ɓuu ijãabadaurã kĩra».

10 Mauɗe jarasii: «Chi Dachi Akõre baita berreabarii beɗea mirubia makarã́se kãꞌãabariwãeɗe joma makaiɗeeba. 11 Chi kachirua wau ɓuu ida ɓuse waya kachirua wau ɓuamera. Chi ne joma Dachi Akõreba kʉ̃riakau wau ɓuu ida ɓuse ichi kuitaa ne joma chi Dachi Akõreba kʉ̃riakau wau ɓuamera. Maamina chi jipa wau ɓuu chi ewaricha jipa wau ɓuai ɓuu. Mauɗe chi Dachi Akõre baita biꞌia ɓuu ewaricha Dachi Akõre baita biꞌia ɓuai ɓuu.

12 »¡Ũrísturu, mʉ kãꞌãabariwãeɗe neei! Neeruuɗe mʉʉba jomaurãmaa deaɗakai baita adooi ãchiba waupeɗaaɗa kĩra. 13 Mʉ chi Alfabʉ mauɗe chi Omegabʉ.* Mau jara ɓuu mʉ chi nabenabʉ mauɗe chi kaaɗebenabʉ.

14 »Ãrea biꞌia duanuu chi paru tõɗapeɗa jʉ̃ duanuu. Maarã puuruɗe eɗa wãɗai panuu chi jõo ewaricha chokae ɓuai deabarii koɗai baita. 15 Maamina chi kachirua waubadaurã, jaibanarã, chi dachi kakuaba barikiu kachirua waubadaurã, chi junebena ome kãi paneebadaurã, mia beabadaurã, Dachi Akõre kuenda juaba ne kapeɗaaɗa kʉ̃riabadaurã mauɗe chi setarã joma awara duaneeɗai.*

16 »Mʉ Jesusbʉ. Mʉʉba ángel aɓa bajãaɗebena bʉisii joma ãbarã nau iujãaɗe nureecha mau jarakuamera. Mʉ Davidɗebena neeɗabʉ, ichiɗebena neeɗa kĩra ɓuu.* Mʉ Dapeɗebena pusterrea ãrea koabarii abadau».

17 Dachi Akõre Jauriba mauɗe chi Oeja Kaebe Nii kima abadauba naka jara ɓuu: «¡Uche!» Chi mau kartaɗe ɓʉ kuɓuu ũriiruu biɗa jarai ɓuu «¡Uche!» Chi obisia ɓuuba bania chi ewaricha chokae ɓuai deabarii doɗe neei ɓuu. Mau bania kʉ̃ria ɓuuba bari doɗe neei ɓuu.

18 Chi Dachi Akõre baita berreabarii beɗea nau kartaɗe ɓʉ kuɓuu ũri panuurãmaa mʉʉba nau jarakuaruu: barikiuba nau kartaɗe ɓʉ kuɓuu aude ɓʉʉruubʉrã, Dachi Akõreba mau chi mau kartaɗe ãrea biꞌiwãe jara kuɓuu kĩra biꞌiwãe ɓuabii. 19 Mauɗe barikiuba nau kartaɗe ɓʉ kuɓuuɗebena beɗea aɓa awara ɓuuruubʉrã, Dachi Akõreba ichimaa jõo ewaricha chokae ɓuai deabariɗebena ida kobiibai mauɗe Dachi Akõre puuruɗe biɗa eɗa ida wãbiibai. Mau jõo ʉ̃rʉbena mauɗe mau puuru ʉ̃rʉbena nau kartaɗe ɓʉ kuɓuu.

20 Joma nau kartaɗe ɓʉ kuɓuu Jesusba biawãra a ɓuu. Ichiba naka jara ɓuu: «¡Biawãra ɓuu mʉ kãꞌãabariwãeɗe neei!»

Biꞌia ɓuu kãꞌãabariwãeɗe neei.* ¡Uche dai Mechiu Jesús!

21 Mʉʉba kʉ̃ria ɓuu Dachi Mechiu Jesusba ichi sõbiaɗeeba machi joma aiɗa ɓuai. Biꞌia ɓuu maka ɓuai.