Esterba karebasia ichi puuruɗebenarã

Ester awẽra judía nibaɗa. Ichi, puuru Persiaɗebena Susa abadauɗe nibabachii. Año ãrĩã basii naeɗe, chi rey Nabucodonosorba Ester deɗabenarã Jerusalenɗebena Persiaɗaa odoeɗa baɗa. Ichi primo Mardoqueo chi rey Persiaɗebena Asuero abadau baita traja nibaɗa basia. Ichiaburu Ester waribiɗa baɗa.

Chi rey Asueroba junebena reina adau kʉ̃ria nibasia. Mauɗeeba ichi baita trajabadaurãba wẽrarã kĩrawãrea nureerã chi paisɗebenáturu ichimaa odoesiɗaa, mauɗe Ester maarãɗebena basia. Jomaurã wẽrarãɗebena, chi reyba Estérturu jʉrʉ adauɗa reina bai baita. Mardoqueoba Estermaa jaraɗa junebenamaa jararã́ba bichi judía nii, aɗa baɗa.

Mukĩra ne juakaya ãrĩã nii Hamán abadau, ichia chi gobernador nureerã ua koɓoobachii. Ichia kʉ̃ria nibasia jomaurã ichi kĩrapeta õdarrɗe kopaneeɗayua. Maka ɓumina Mardoqueora ichi kĩrapeta õdarrɗe koɓeekabachii. Hamán ãrĩã kĩru koɓeeɗa baerã, Mardoqueo bea kʉ̃ria nibasii. Hamanba kuitaasiiɗe Mardoqueo judío nibaɗa, kʉ̃risiasii judío jomaurã puuruɗebena beakua nibai baita. Ichia chi reymaa naka aɗa baɗa: “Judiorã mia mechia nurea. Jomaurã beakuayua”. Asueroba naka asia: “Bichimaa biʼia ɓuudu aseba”. Maabae ichia idaarabisii ley asebii baita. Chi leyba jaraɗa baɗa chi día 13 chi mes adarɗe chi ẽbẽrarãba judiorã beakuaɗai basia. Maka ɓumina Jeowaba joma unu koɓooɗa.

Esterba adua basii jãu leyɗebena. Mauɗéburu Mardoqueoba Estermaa copia deebʉepeɗa naka jarasia: “Bichíturu chi rey ome beɗeayua”. Esterba naka asii: “Chi reyba mʉʉmaa urúbaɗa awẽeɗe wãaruu, mara biuyua. 30 día basii chi reyba jarawẽa ɓuu mʉʉmaa urúbaɗa apeɗa. Mau adua mʉ wãi ɓuu. Ichia chi duma mʉ ʉ̃rʉ kuɓuuruubʉrã, makarã mʉ nibayua. Makawãebʉrã, biuyua”.

Maabae chi Ester rey duɗa wãsia. Chi reyba ichi unusiiɗe, ichi duma Ester ʉ̃rʉ kuɓusii. Ester ichi kaita wãpeɗa, mauɗe chi reyba wiɗisii: “¿Ester, kãare kʉ̃ria ɓua?”. Ichia naka jarasia: “Mʉa kʉ̃ria ɓuu bichi Hamán baara chiko mʉa wauruu koɗe uruɗai baita”. Ãchi komaa panuumisa, Esterba jaraɗa jãaɗakare mʉa maucha iuima chiko wauburuuɗaa ko neeɗai baita aɗa baɗa. Maaɗakare Esterba maucha iusii chiko kobiayua. Maabae chi reyba maucha wiɗiɗa Estermaa: “¿Kãare kʉ̃ria ɓua?”. Ichia naka jarasia: “Chi niiba mʉ bea kʉ̃riapeɗa mauɗe mʉ puuruɗebenarã siɗa bea kʉ̃ria ɓuu. Muchuburia, dai karebas”. Chi reyba naka wiɗisia: “¿Kaiba bichi bea kʉ̃ria kuɓua?”. Ichia naka jaraɗa: “Cha nii mukĩra Hamán, kachirua ãrĩã niiba”. Asuero ãrĩã kĩrupeɗa maabae Hamán beatabisii.

Maka ɓumina wãʼãe basia aɓau biɗa jaretai baita chi Hamanba ɓʉɗa baɗa, mauɗe chi rey biɗa poyaabasii. Chi reyba Mardoqueo gobernador nureerã ua koɓoi baita kuɓubisii maabae idaarabisii junebena ley asebii baita. Jãu leyɗe jara koɓooɗa judiorãba ãchi beaɗe neebudauɗe choroaɗai ɓoosii. Día 13 mes adarɗebenaɗe, chi judiorãba ãchi iadaa nureerã choroasiɗaa. Mau diaɗeeɗebena, chi judiorãba añocha acorda paneesiɗaa jãka choroapeɗaaɗa baɗa.