Chi Jerusalén aɗu paree mooba kapeɗaaɗa

Jãabae beɗeaɗaika chi pasaɗaɗebena chi Jerusalén aɗu paree mooba kaɗai naeɗe. Israelita chi trʉ̃ Nehemías Susaɗe nibabachii, chi puuru Persiaɗe. Ichi chi rey Artajerjes baita traja nibasia. Día aɓa ɓuuɗe, neeɗa baɗa chi Nehemías ãba neepeɗa maabae nau kachirua ɓuuɗebena jara neesii: “Israelitarã waya neepeɗaaɗa Jerusalenɗaa biʼia ãrĩã mera nureewãema. Chi Jerusalén aɗu paree mooba kapeɗaaɗa mauɗe chi poroa chi puuruɗebena Babiloniaɗebenarãba ãritapeɗaaɗa baɗa waya karaaɗawẽa panuu”. Nehemías ãrĩã́turu nomaaɗa baɗa. Aiɗa kʉ̃ria ɓoosiiɗeeba, Dachi Akõremaa wiɗiɗa baɗa chi reyba ida wãbiyua Jerusalenɗaa.

Maaɗakare, chi reyba unuɗa baɗa Nehemías nomaa ɓuu. Ichimaa naka asia: “Mʉa bichi jãka ɓuu unukaa. ¿Sãasma bichi?”. Nehemiasba naka panausia: “Mʉ puuru, Jerusalenɗebena, akawa ãri kuɓua, ¿sakãera mʉ nomaabaiba?”. Chi reyba wiɗisii: “¿Mʉ kãare aseiba bichi aiɗai baita?”. Ara nauɗe, Nehemías chõpea ʉtaa wiɗisia. Maabae, jarasia: “Muchuburia, mʉ ida bʉes Jerusalenɗaa chi aɗu paree mooba kapeɗaaɗa waya karaayua”. Chi rey Artajerjesba wã́baɗa aɗa basii. Maabae deaɗa baɗa ichia nesitaburuu akawa pasabiimaaba ichi oɗe wãburuuɗe. Ichi gobernador Judaɗebena babisia maabae bakuru deakuaɗa baɗa chi poroa puuruɗebena asebikuayua.

Chi Nehemías Jerusalenɗaa neesiiɗe, ochiaɗe wãsii saka kuɓuu chi aɗu paree mooba ka ɓoobarii. Maabae, ãbua chibʉrʉbiasii chi gobernante mauɗe sacerdoterã baara, maabae naka asia: “Cha nau biʼiwãe kuɓua. Jãabaera traja adauɗayua”. Chi ẽbẽrarãba makaɗayu ɓuu aɗapeɗa maabae karaa kopaneesia.

Chi nuree israelitarã iadaa nureerãba naka asiɗaa: “Nau chi usa modeɗebena barau biɗa ãritaiɗe kuɓua machia cha waumaa duanuu”. Maka ɓumina chi trajabadauba ũriɗaabasii maabea waaburu traja kopaneeɗa. Chi aɗu paree mooba kapeɗaaɗa akawa ʉtaa wari ʉ̃rʉ kopaneeɗa chaarea ãrĩã.

Kawawẽeɗe chi nuree junebena puuruɗebenarãba iadaa ãrĩã nureasiirãba Jerusalenɗaa judiorã ome chĩoɗe imisiɗaa. Ãchia mau kawaɗapeɗa, maabae perasiɗaa. Mauɗe Nehemiasba naka jarasia: “Perarã́baɗa. Jeowa dachirã baara kuɓua”. Mauɗe chi guardiarã kuɓusii chi traja bara ɓuurã cuidabiyua. Mauɗeeba, chi iadaa duanuuba poyaa chĩoɗe neeɗaabasia.

Chi aɗu paree mooba kapeɗaaɗa mauɗe chi poroa baara wautasiɗau 52 diaɗe. Nehemiasba uaneesii chi levitarã Jerusalenɗebena fiesta ase adauɗayua. Omeeɗe bʉekasii chi karibadaurã. Esdras junebenarã baara wãpeɗa, mauɗe Nehemías junebenarã baara wãsii. Chi nuree chi puuru aɗu paree mooba kapeɗaaɗa iikaa tʉa wãusiɗaa mauɗe chi waabenarã aɗuɗe wãsiɗau. Trompeta, címbalo mauɗe arpa baara, cha wãurimaa duanasia Jeowamaa karibudau, chi temploɗe chibʉrʉbudauɗaa. Mukĩrarã, mauɗe wẽrarã warra chekerã baarauba ãnimararã Jeowamaa deasiɗaa baakuaɗayua maabae fiesta asesiɗau. Ãrĩã́turu kĩrajʉʉ bara ɓuuba ãchi ɓiabudau mau kaitawẽeba ũripeɗaaɗa basia.