Elisabetba wãwa cheke adauɗa basia

Sacerdote chi trʉ̃ Zacarías mauɗe ichi wẽra, Elisabet baara, Jerusalén kaita nureabachiɗaa. 400 año ba ɓoosii chi Jerusalén aɗu paree mooba ka kuɓuu waya waupeɗaaɗa baɗa. Zacarías Elisabet baara ãrĩã ba ɓoosii ãchi kimabaraapeɗaaɗa baɗa, maka ɓumina warr wãʼãe nibasiɗaa. Día aɓa ɓuuɗe, Zacariasba tuwaa ɓuu baa deaɗe wãsiiɗe chi templo eɗare, mama neesii chi ángel Gabriel. Zacarías ãrĩã peraɗa baɗa, maka ɓumina Gabrielba naka asia: “Perarã́ba. Mʉa nebʉrʉ ɓua biʼia ɓuu Jeowaɗebena. Bichi wẽra, Elisabet, warr adauyua, mau ichi trʉ̃ Juan bayua. Jeowaba jʉrʉɗa baɗa Juan ichi trajo biʼia ɓuu asei baita”. Zacariasba naka wiɗiɗa baɗa: “¿Mʉa saka kuitaaima bichia mʉʉmaa ariɗe jara ɓuu? Mʉ mauɗe mʉ wẽra ome, dai chõra ãrĩã paneesii warr adauɗai baita”. Gabrielba naka panausia: “Dachi Akõreba mʉ bʉeɗa baɗa bichimaa nau biʼia ɓuu jarayua. Maka ɓumina, bichia ijãabaɗa baerã, beɗeawẽa diɗiyua, aɓa bichi warr adauburuuɗaa”.

Zacarías templo eɗarebena awara neei baita ãrĩã demorasii. Ichi awara wãɗakare, ẽbẽrarãba esperamaa panasii kãare pasasii kuitaaɗayua. Maka ɓumina, Zacarías poyaa beɗeawẽa ɓeeɗa, bari juaɗéburu beɗeai ɓoosia. Makaburu ẽbẽrarãba kawa panasii ichimaa Dachi Akõreɗebena jarapeɗaaɗa baɗa.

Maaɗakare, Elisabet ɓi bara ɓeesia maabae warr adausia, ara jari angelba jaraɗa baɗa kĩraka. Elisabet amikorã deɗabenarã baarauba wãwa ochiaɗe neepeɗaaɗa, ãchi ichi kakua kĩrajʉʉ ãrĩã bara ɓeesii. Elisabetba naka aɗa baɗa: “Ichi trʉ̃ Juan bayua”. Ãchia naka asiɗaa: “Akawa wãʼãe jãka trʉ̃a nii bichi deɗabena. Ara jari chi akõre kĩra Zacariasdu trʉ̃ jarase”. Maka ɓumina Zacariasba ɓʉɗa basii: “Ichi trʉ̃ Juan bayua”. Ara mauɗe, Zacarías bosara nibaɗa waya beɗea nibaɗe wãsia. Joma ẽbẽrarã Judeaɗebenarãba, wãwa naceɗa ʉ̃rʉbena kawapeɗaaɗa basia maabae naka kʉ̃risia paneesiɗaa: “¿Cha nii wãwa cheke wariburuuɗe, kãare aseiba?”.

Maabea Zacarías Dachi Akõre Jauriɗeeba naka jarasii: “¡Jeowa ʉ̃rʉbena biʼia ãrĩã beɗeaɗa! Ichia Abrahanmaa jaraɗa baɗa bʉeyu chi karebabarii, chi Mesías, dachi karebai baita. Mauɗe Juan Dachi Akõre baita berreabarii aɗai ichi Mesías naa wãyua ichi o jarei baita”.

Ara jari Jeowaba ichi Jauriɗeeba Elisabet warr baraabisii kĩraka, ara jãka María siɗa biʼia ãrĩã pasabiɗa basii. Jãuɗebena kawaɗaika chi kaaɗebena leccionɗe.