Gabrielba María ochiaɗe wãsia

María awẽra nibasii, Nazaretɗe ɓoobachii, jãu puuru Galileaɗe ɓoosia, ichi Elisabet ome deɗabena basia. María José ome kimabaraai basii, ichi bakuru waukapeɗa traja nibabarii basia. Elisabet ɓi baraa nibaɗa seis mes ba ɓooɗa, chi ángel Gabriel Mariamaa neepeɗa naka jarasia: “María, Jeowaba bichi biʼia unu ɓuu, ichi bichi ome ɓuu”. Ichia kawawẽe basia Gabrielba jara ɓuu, mauɗeeba ichia Mariamaa naka jarasia: “Bichi, warr baraa ɓeeyua maabae warr adauyua. Jesús trʉ̃ayua. Ichi rey bayua, ichi Gobierno apii koɓeeyua”.

Mariaba naka asia: “Mʉ, mukĩra ome kãi ɓeewẽa ɓuuɗe. ¿Mʉ saka warr baraaima?”. Gabrielba naka panausii: “Jeowaba mʉa poyaa asewẽe akaa. Dachi Akõre Jauri bichimaa neepeɗa, bichiba warr adauruu. Bichi deɗabena, Elisabet siɗa ɓiɗe warr aa nia”. Mariaba naka panausia: “Mʉa Jeowa baita bari trajabariibʉ. Bichiba jaraɗa kĩraka maka pasayubʉ”.

Mariaba Elisabet ochiaɗe wãsii puuru modeɗe koɓoosiiɗaa. Neesiiɗe, biaka aɗa baɗa, Elisabet ɓiɗe kiruu ʉtʉ jĩdru koɓeeɗa basia. Ichi Dachi Akõre Jauri ɓeepeɗa naka jarasia: “María, Jeowaba bichi biʼia aiɗa ɓuu. Mʉ kaima mʉ Mechiu naweba naka ochiaɗe neesma”. Mariaba naka panausia: “Sõɗeeba mʉʉba jaraaruu Jeowa chi Mechiubʉ”. Mes õbea Elisabet baara ɓeesia maaɗakare wãsii ichi de, Nazaretɗe kuɓuuɗaa.

Joseba kawasiiɗe María ɓi baraa nii, ichi ome kimabaraa kʉ̃riawẽe basii. José kãi noɓoosiimisa komakaraaɗe ángel neepeɗa maabae naka jarasia: “Jãu wẽra ome kimabaraai baita perarã́ba. Ichia kachirua asewẽe basii”. Maabea José María ome kimabaraapeɗa mauɗe ichi deeɗaa odoesia.