Angelerãba jarapeɗaaɗa Jesús naceɗa

Chi gobernador Romaɗebena, César Augusto, ichia jarasii joma judiorãmaa registraɗe wãɗayua ãchi nacepeɗaaɗamaa. Mauɗéburu José María baara Belenɗaa wãpeɗaaɗa basia, José deɗabenarã mamabena basii baerã. María jãabaera ichi wãwa adauiɗe nibasia.

Belenɗaa neesiɗauɗe, sama kãi panaɗayu wãʼãe basia mauɗéburu ãnimara kãibadaumare kãi paneesii. Aria Jesús naceɗa baɗa. Mariaba chi wãwa paru namia ɓuuba bʉraɗa baɗa. Maabae ãnimara kobadaumaa bikãa jira kunuɗa basia.

Belén kaita, pastorna chi druaɗe ewaribachiɗau chi oeja ochia panuu. Kawaɗawẽeɗe, chi ángel neeɗa basii, mauɗe Jeowa kĩrawãrea teɗechoa ãchi jʉ̃kaa ãrĩã ʉ̃ɗaa nuɓeesii. Chi pastorna perasiɗau, mauɗe chi angelba jarasia: “Perarã́baɗa. Mʉʉba beɗea bia machimaa jaraɗe neeruu. Iɗi chi Mesías Belenɗe nacesia”. Ara mauɗe, angelerã ãrĩã bajãaɗe neeɗapeɗa jarasiɗaa: “Dachi Akõre ʉtʉ bajãaɗe ɓuu, ãrĩã biʼia nii, Dachi Akõreba biʼia unu ɓuu ẽbẽrarã nau druaɗe kĩrukaraayuwãe panaɗai”. Maabae chi angelerã wãsiɗaa. ¿Kãare asesiɗaa chi pastorna?

Chi pastornaba ãchi chiya jarasiɗau: “Ara eteuɗe Belenɗaa wãuríduru”. Ara mauɗe wãsiɗau maabea mama chi ãnimara chiko kobadaumare María José chi wãwa baara jeeɗa ɓari panuu unuɗe wãsiɗau.

Joma chi ũripeɗaaɗaba angelba pastornamaa jaraburuu kawaɗayuwãe bara ɓeeɗa basia. Mariaba kʉ̃risiasii chi angelba jaraɗa baɗa, mau akawa ichia adua ɓeebasia. Chi pastorna waya chi oeja baara ãchi duanabariimaa wãsiɗaa, maabae ara kiruma asiɗau Jeowamaa joma unuɗapeɗa ũripeɗaaɗa baɗa kakua.