Chi chĩobarii nii mauɗe chi kau cheke

Chi iujãa Siria abadauɗe, kau cheke Israelɗebena nibasii, mau kaitawẽe ãrĩã ɓoabachii ichi deɗebena. Chi soldaorã Siriaɗebenaba ichi odoepeɗaaɗa, jãabae traja nibaɗa Naamán wẽra baita. Jãu mukĩraba soldaorã ua koɓoobachii. Chi kau chekeba Jeowadu kʉ̃ria nibaɗaa, bariara chi ẽbẽrarã ichi baara nureasii Jeowa kʉ̃riaɗaabasmina.

Naamán ẽperma koɓeeɗa baɗa, ichi kakua e chau ɓoosii mau chi puʼua ãrĩã ɓooɗa. Chi kau chekeba ichi aiɗa kʉ̃ria ɓoosia, mauɗeeba chi Naamán wẽramaa naka jaraɗa: “Mʉa unubarii mukĩra aɓa bichi kima biʼia aribiabii ɓua. Israelɗe profeta nii, mau chi trʉ̃ Eliseobʉ. Jãuba bichi kima aribiabii ɓua”.

Chi Naamán wẽraba kimamaa jarasii chi kau chekeba jaraɗa baɗa. Ichia joma asebachii ichimaa jarabudau mauba aribiai baita, mauɗéburu Israelɗaa wãɗa Eliseo deeɗaa. Naamanba kʉ̃risia ɓoosii Eliseoba ichi diuɗu biʼia adaui baɗa. Ichi ome awara beɗea neei kãyabãra, Eliseoba bʉeɗa baɗa ichi baita traja nibabariidu, mauba ichi ome beɗeapeɗa naka jarai baita: “Siete ɓes do Jordanɗe eɗa wãba. Makaburu bichi biʼia aribiayua” aɗa.

Naamanba mau bustaabasii maabae naka jaraɗa: “Mʉa kʉ̃risia ɓooɗa cha nii profetaba aribiai baɗa ichi Diosmaa wiɗipeɗa mauɗe ichi jua siɗa dodomia koɓeeburuuba.a Mau ichia mʉʉmaa jarasiira do Israelɗaa wã́baɗa a ɓoosii biɗa. Maka ɓumina Siriaɗe do aude biʼia ãrĩã ɓee barauɗe. ¿Sakãera wãabaiba jãarã doɗaa?”. Naamán ãrĩã kĩrupeɗa maabae chi Eliseo deɗebena wãɗa.

Chi Naamán baita traja nureerãba ichimaa biʼia kʉ̃risiabisiɗaa. Naka jarasiɗau: “¿Bichia aseebai ɓuẽ bichi aribiayu baita? Chi jãu profetaba jaraɗa baɗa mau fácil asei ɓuu. ¿Jãka biɗa asewẽeba?”. Naamanba ũripeɗa maabae siete ɓes chi Jordán do eɗa wãɗa. Siete ɓesɗe, Naamán doiɗeɗabena neesiiɗe akawa alẽta neesia. Kĩrajʉʉ ãrĩã ɓeesii, maabae Eliseomaa wãɗa ara kiruma ai baita. Ichimaa naka asii: “Jãabaeburu kawasii Jeowáturu Dios ariɗe nii”. Naamán ichi deeɗaa waya biʼia ãrĩã neeɗa baɗa. ¿Bichimaa saka sentiɗa baɗa chi kau cheke Israelɗebena Naamán unusiiɗe?