Bariwẽe nibaɗayua chi kaaɗebena diarã akababuruuɗaa

1. ¿Saka kuitaa panaa dachia chi kaaɗebena diarãɗe duanuu?

DACHI 1914 tõpe waa nacepeɗaaɗabʉrã ɗĩika kiruuɗeeɗabena waa iɗiiɗaa chi kaaɗebena diarã duanuu (2 Tim. 3:​1). Jomaurãba ũripeɗaaɗa baɗa noticiarãɗe Jesús jaraɗa baɗa dachi diarãɗe pasaburuu ʉ̃rʉbena: Puuru puuru ome peleaɗapeɗa, ẽbẽrarã ãrĩã jarbisia baraapeɗa, de uribia baraai, ẽpermabiabadaurã ãrĩã baraai, ẽbẽrarãba aude ãrĩã kachirua asebadaa, Jeowa baita traja nureerã kaaɗe ãdaɗayua biʼiawẽe panaɗai baita (Mat. 24:​3, 7-9, 12; Luc. 21:​10-12). Mauɗeebiɗa Pabloba jara ɓoosii kĩra duanaɗai (ochiábaɗa chi recuadro “Saka duanuu ẽbẽrarã iɗi”). Jeowa baita trajabadaurãba kuitaa panuu chi kaaɗebena diarãɗe duanuu (Miq. 4:​1).

2. ¿kãareɗebena beɗeabudaa?

² Año 1914 tõpe waa año ãrea basii bẽrã chi kaaɗebena diarã acabaiɗea ira ɓuu. Mauɗe ɗaarãawẽeɗe chi ẽbẽrarã kachirua acababudau mauɗeeburu jãu ʉ̃rʉbena kawaɗaika. ¿kãare pasaiba chi kaaɗebena diarã acabaiɗea ira ɓuuɗe? Mauɗe ¿Jeowaba kãare kʉ̃ria ɓua dachiba aseɗai baita jãu pasai naeɗe?

KÃARE SAKA UNUƊAIBA CHI KAAƊEBENA DIARÃ ACABAIƊEA IRA ƁUUƊE

3. 1 Tesalonicenses 5:1-3ɗe pasaiɗebena jarasiichaa, ¿kãare jara ɓeeiba chi gobiernorãba?

³ ( Leas 1 Tesalonicenses 5:​1-3). Pabloba beɗea ɓoosii “Jeowaba ẽbẽrarã kachirua asebudau kastikakuaburuu diaɗebena”. Jãu empezayua puuru Babilonia mechia ɓuu atacabudauɗe, jãarã chi religión setaa jarabadaurã joma, mauɗeeba acabayua Armagedonɗe (Apoc. 16:​14, 16; 17:​5). Jãu “día” empezai naeɗe, chi gobiernoba jaraɗayua joma “kĩrukaraayuwẽa panuu, peraɗawẽa panuu” abudau. Chi charraba ara mau kĩra jarabadau ãchi chiya biʼia duanaɗai baita.b Bibliaba jara ɓuudu ara maduwẽe. Bibliaba jara ɓuu biawãra cumpliburuuɗe chi gobiernorãba jaraɗai kĩrukaraayuwẽa nureaɗai mauɗe peraɗawẽa nureaɗai ara jãka sentiɗai, maka ɓumina jãu tõpe waa ẽbẽrarã ãrea mia mechibena sufriɗapeɗa kawaɗawẽeɗe kenakuayua (Mat. 24:21).

4. 1) ¿kãare adua duanua dachia chi gobiernorãba “jomaurã kĩrukaraayuwẽa panuu, peraɗawẽa panuu” abudauɗebenaɗe?  2) ¿Kãare kuitaa panuura mau ʉ̃rʉbena?

⁴ Dachia kuitaa panuu chi gobiernorãba aɗayua “jomaurã kĩrukaraayuwẽa panuu mauɗe peraɗawẽa panuu”. Maamina adua panuu mau saka pasai mauɗe saka asebudau. Mauɗeebiɗa adua panuu mau aɓa ɓesburu jaraɗai maebʉrã ãrea ɓes jaraɗayua. Barikiau neeburumina, dachia kuitaabudau ida engañabiɗaabai gobiernorãba jarabudauɗe “jomaurã kĩrukaraayuwẽa panuu, peraɗawẽa panuu”, jãu biawãrawẽe ɓuuɗeeba. Bari jãu tõpe waa Jeowaba ẽbẽrarã kachirua ɓee kastikakuaburuu día neeiɗea kuɓuu.

5. ¿1 Tesalonicenses 5:​4-6ɗaa jara ɓuuɗeebara “Jeowaba kastikakuaburu día” neeruuɗe kãare aseɗaiba ʉ̃rʉma duanuka panaɗai baita?

⁵ ( Leas 1 Tesalonicenses 5:​4-6). Pabloba jara ɓuu dachia kãare aseɗai ɓua chi “Jeowaba kastikai día” neeruuɗe ʉ̃rʉma duanuu kĩra panaɗai baita. Dachi kãi duanuuwãema “waabenarã kãi duanuu kĩra”, kãiɗawẽaburu duanai, dau omeemea nureaɗai ɓua. Biʼia kʉ̃risiaɗai chi política nau iujãaɗe asebadauɗaa duanaɗaabai bari chi Dachi Akõre Gobiernodu ijãaɗai. Makaburu dachi “nau iujãaɗebenawẽe” nureaɗai (Juan 15:19). Dachi Akõre Gobiernoburu kĩrukaraaɗawẽa duanabi iujãa jomauɗe.

6. ¿Saka dachia aiɗaɗaiba ẽbẽrarã, mauɗe sakayua?

⁶ Dachia kʉ̃ria panuu ẽbẽrarã aiɗaɗai ʉ̃rʉma duanuu kĩraka duanabi baita mauɗe Bibliaɗebena kawabiɗai kãare pasaburuu nau iujãaɗe. kʉ̃risiábaɗa jãu diaɗe ẽbẽrarã ãrĩã supriiduuɗe Dachi Akõre ome amiko poyaa nibaɗaabayua mauɗeburu jaradeaɗe wãi aude importante ɓuu.c

BARIWẼE ƊUANAƊAYUA WAABENARÃMAA JARADEABUDAUƊE

7. ¿Jeowaba kãare kʉ̃ria ɓua dachia aseɗai?

⁷ Ara nauɗe chi día ɓiɗĩikaburu ɓee ɓuu “Jeowaba kastikai día” neeruu bẽrã, Jeowaba kʉ̃ria ɓuu dachia bariwẽa duanaɗai ẽbẽrarãmaa jaradeaɗai baita. Biʼia kʉ̃risiábaɗa “Dachi Akõre baitaburu traja duanaɗai” (1 Cor. 15:58). Jesús chi kaaɗebena diarãɗe beɗea ɓoosii mauɗe naka jarasii: “mauɗe naaburu jara deɗekaɗayua chi beɗea kĩrawãrea ɓee jomaurã puuruɗe” (Mar. 13:​4, 8, 10; Mat. 24:14). Makarã nauɗe kʉ̃risiábaɗa dachia jaradeaɗe wãbudauɗe Jesusba jaraɗa baɗa cumplimaa panuu.

8. ¿Saka kuitaa panaa noremaacha chi Dachi Akõre kobierno ʉ̃rʉbena waaburu jaradea panuu wari kãrii?

⁸ Año añocha ẽbẽrarã ãrĩãba ũrimaa panuu Dachi Akõre Gobierno ʉ̃rʉbena. Ochiaɗaika saka warimaa ɓuu nau iujãaɗe joma Jeowaɗebena jara nureerã. Chi año 1914ɗe, 5.155 publicadorna duanasii 43 paisɗe. Iɗibea dachi duanuu 8.500.000 publicadorna 240 paisɗe mauɗe chi druaɗe biɗa. Maka ɓumina waaburu jaradeaɗai Dachi Akõre Gobiernoburu ne kachirua ɓee acabayua (Sal. 145:​11-13).

9. ¿Sakaẽra waaburu jaradeaɗaiba Dachi Akõre Gobierno ʉ̃rʉbena?

⁹ Daiba waaburu jaradeaɗayua aɓa Jeowaba waa jaradearã́baɗa aburuuɗaa. ¿Sãabe día ɓee ɓua chi ẽbẽrarã Jeowa Jesús ʉ̃rʉbena kawaɗai baita? (Juan 17:​3). Mau dachia adua. Maamina dachia kuitaa panuurã chi día ẽbẽrarã ãrĩã sufri duanaɗai wabiɗa jãka pasawẽeɗeeba “chi ẽbẽrarã chi sõ biʼia kirureerã biuɗai kʉ̃riaɗakaa” wabiɗa ũriɗai ɓua chi beɗea biʼia ɓeeɗebena (Hech. 13:48). ¿Jãarãmaa saka aiɗaɗai ɓua chi día neei naeɗe?

10. ¿Dachimaa Jeowaba saka aiɗa ɓuu ẽbẽrarãmaa biʼia jaradeaɗai baita?

¹⁰ Jeowaba aiɗa ɓuu ichi organizacionɗeeba biawãra ɓuuɗebena kawabi baita ẽbẽrarãmaa. Semanacha kawabibadau chi reunión entre semanaɗebenaɗeeba, jãma kawabadau chi ɓes aɓabena, omebena jaradea baɗa mauɗe curso Bibliaɗeɓena kawabibadaa. Mauɗeebiɗa chi organizacionba dea ɓuu chi kit de enseñanza abadau. Jãuba biʼia kawabi baita:

• nabena ɓes beɗeaɗai baita ẽbẽrarã ome,

• ẽbẽramaa biʼia kʉ̃risiabii ichi ome waa beɗeaɗai baita,

• ẽbẽra aude kawa kʉ̃riabii baita biawãraɗebena,

• chi kawa kuɓuumaa chi biawãraɗebenadu jaradeai mauɗe

• imibiɗai chi kʉ̃ria nureerãmaa dachi página internetɗe ochiai baita mauɗe Jeowaɗebena Jara nuree Deeɗaa wãɗai baita.

Maubapeɗa, dachia karta video kit de enseñanzaɗebenaɗeeba kawabiɗai.d Chi ẽbẽra kawai kʉ̃ria ɓuu ome biʼia beɗea panuubʉrã tratao maebʉrã karta deaɗai ɓua, ichia leai ɓua chi kartaɗebena aɓa nii ichi ome beɗeaɗe wãburuumisa. Aɓaaɓaa dachirãɗebena bariwẽa nibaamaaba mescha jaradeaɗe wãbaraaɗai.

11. ¿Sakãera internetɗe Bibliaɗebena estudiai ɓua?

¹¹ Mauɗeebiɗa Jeowaba aiɗabarii internetɗeeba kawabi baita chi biawãraɗebena.  jw.org^® ɗe ochiaba saka ɓuu kawayua Bibliaɗebena internetɗeeba.e ¿Sakayua jãu ase panua? Ẽbẽrarã kabanaa nau iujãaɗebenaba jʉrʉbadau mescha Bibliaɗebena kawaɗayua internetɗeeba. Dachi página internetɗe ochiabariiba ichia biawãra ɓuu kawai ɓua Dachi Akõre beɗea. Ẽbẽrarãba dachia ãchia ome beɗeabudauɗe ãchia bustabadaa maka ɓumina ãrĩã comprometeɗakaa Bibliaɗebena kawaɗai baita. Maka pasa ɓuubʉrã beɗeaɗaika chi  ­página internetɗebena maebʉrã chi enlace paginaɗebena ãchi idiomaɗe mandaɗai ɓua.

12. ¿kãare kawaɗai ɓua Bibliaɗebena internetɗeeba estudiaburuuɗe?

¹² Nau cursoɗeeba chi Biblia ʉ̃rʉbena mauɗe chi Biblia ɓʉbiɗa baɗa ʉ̃rʉbena kawaɗai ɓua, Bibliaba nebʉrʉ ɓuu ʉ̃rʉbena chi ẽbẽrarã yataɗeeɗa trajapeɗaaɗa baɗa Dios baita mauɗe ne bia neeburuu ʉ̃rʉbena siɗa. Chi ẽbẽra nau ʉ̃rʉbena kawaaruuba aude entendeyua:

• Bibliaba saka aiɗaɗai ɓua,

• kairãba Jeowa, Jesús mauɗe angelerã,

• sakayua Jeowaba ẽbẽrarã waukaɗaa mauɗe

• sakayua supribadaa mauɗe kachirua ɓee unubadaa.

Maubapeɗa kawaɗayua nau ʉ̃rʉbena:

• kãare aseerua Jeowaba chi supribibadau mauɗeeba chi biubibadaurã siɗa acabai baita

• saka chokaebiaiba ẽbẽrarã biupeɗaaɗarãmaa mauɗeeba

• Jeowaba saka acabaiba chi gobierno iujãaɗebena mauɗeeba ichi Gobiernodu ɓeebiburua nau iujãaɗe.

13. Ẽbẽrarã internetɗeeba Bibliaɗebena estudia panumina, ¿sakaẽra ãchimaa jaradeɗekaɗe wãɗaiba?, biʼia jaradease.

¹³ Ẽbẽra aɓa nii internetɗeburu Bibliaɗebena kawaabai bari dachia jaradeaɗe wãɗai ɓuu ichimaa. Jesusba jara ɓoosia jaradeaɗe wã́baɗa mʉ kaaɗe ãda duanabi baita. Kʉ̃ria panuu chi ẽbẽrarã internetɗeeba Bibliaɗebena estudia panuurã leaɗapeɗa maucha kawa kʉ̃riaɗai, Maka pasa ɓuubʉrã, aɓa publicador ome estudiai ɓua. Chi lea kuɓuuba chi lección aɓaaɓaa terminaɗakare wiɗibadaa chi ẽbẽra junebenaba jaradea ɓoi ɓue aude kawabi baita. Noremaacha, ẽbẽrarã joma iujãaɗebenaba 230 waa wiɗibadaa internetɗeeba Bibliaɗebena kawaɗai baita. Ãrĩã importante ɓuu ẽbẽrarãmaa aɓaaɓaa jaradeaɗe wãɗai.

WAABURU BEREKAƊAIKA ẼBẼRARÃ JESÚS KAAƊE TɄA DUANABARIIBAYUA

14. Jesusba jara ɓoosiiɗeebara Mateo 28:19, 20ɗe, ¿kãare bereka aseɗaiba, mauɗe sakaẽra?

¹⁴ ( Leas Mateo 28:​19, 20). Ẽbẽrarãmaa  kawabibudauɗe berekaɗai ãchirã Jesús kaaɗe tʉa duanabi baita mauɗe Jesús jaraɗa baɗa akawa ũriɗai baita. Ãchimaa kawabibaraaɗai Dachi Akõre Gobierno omeburu nibaɗeapeda mauɗe Jeowa jʉ̃ka nibaɗeai, nadu aude importante ɓuu. Aiɗaɗai ɓua ãchirãmaa ãchia kawapeɗaaɗa kĩra aseɗai baita mauɗe Jeowa ome comprometeɗapeɗa bautizaɗai ɓua. Maarãdu Jeowaba kastikai día neeruuɗe chokae duanaɗai (1 Ped. 3:21).

15. Ẽbẽraba Jesús kaaɗe tʉa nibai kʉ̃riawẽebʉrã ¿kãare aseɗaiba mauɗe sakayua?

¹⁵ Dachia ara kuitaa panuu chi iujãaɗe kachirua asebadaurã acabaiɗea ira ɓuu. Wãʼãe tiempo chi ẽbẽrarã Jesús kaaɗe tʉa duanakaurãmaa jaradeaɗai baita (1 Cor. 9:26). Ãrĩã importante ɓuu isa jaradeayu, wabiɗa ãrĩã ẽbẽrarã barau Dachi Akõre Gobierno ʉ̃rʉbena kawaɗai baita chi Jeowaba kastikai día neei naeɗe.

RELIGIÓN SETAA JARADEA ƁUU IDA ƁUIIƊURU

16. Apocalipsis 18:​2, 4, 5, 8 Jara ɓuuɗeebara, ¿kãare aseɗaiba jomaurãba? (Ochias chi dore ɓʉ kuɓuu).

¹⁶ ( Leas Apocalipsis 18:​2, 4, 5, 8). Naarã versiculoba jara ɓuu Jeowaba kãare kʉ̃ria ɓuu dachia aseɗai baita. Chi cristianorã ariɗe nureerã akawa chi religión setaa jarabadauɗebena awara wãɗayua. Chi Biblia estudiabadaurã kawai naeɗe chi religión setaa jarabadau baare duanasii. Ãchi ome meraaɗapeɗa mauɗe chi nejarra deabachiɗaa. Bibliaɗebena jaradeaɗe wãi naeɗe chi religión setaa jara nureeɗebena akawa ɓui, karta ɓʉɗapeɗa ɓuekai ãchi ome waa duanaɗaabai ai baita, ara mau kĩra asei ɓuu chi iglesia sea jarabadauɗebena.f

17. ¿Kãareɗe trajaɗaabaiba cristiano nuree bẽrã, mauɗe sakayua?

¹⁷ Chi Cristianorã biawãra jara nureerã trajaɗakau chi religión setaa jara nureerã baita (2 Cor. 6:​14-17). Maubapeɗa, dachia empresa traja panuuɗe jamaria chi iglesiaɗaa trajaɗe wã́ba jarasiɗarã, wãɗaabayua. Mauɗe traja panuubʉrã dachi propio negocioɗe, trajaɗaabayua mauɗe jãu trajoɗebena adauɗaabayua chi Babilonia mechia ɓuuɗebena. ¿Sakayua jãuɗebena akawa aseɗakaa? Ãbua duanaɗakaa chi religión setaa jarabadau baare, ãchia pekao mechia ase panuuɗeeba. (Is. 52:11).g

18. ¿Aɓa niiba dawaraumaa wiɗisiiɗe iglesiaɗe trajai baita, ¿saka asesaa ichia?

¹⁸ Ãrĩã año basii, chi mukĩraba wiɗisii dawarau bakuruɗeeba waukabari nibasiimaa trajai baita iglesia puuruɗebenaɗe. Chi  mukĩraba kuitaa nibasii chi dawarau trajaabai aɗa baɗa. Maka ɓumina chi mukĩraba isa nesita ɓoosii aɓa nii jãu trajo asei baita. Chi dawarauba Bibliaba jara ɓuudu ũripeɗa jãu trajo adaubasii. Warebena semanaɗe periodicoɗe foto kuɓusiɗau, fotoɗe unusii june mukĩraba bakuru waubari nii kuɓuumaa ɓuu cruz iglesiaɗe. Chi dawarauba jãu trajo aseɗa basirã periodicoɗe unuɗai basia. Kʉ̃risiábaɗa chi ãba chekeba unupeɗaaɗa basirã chi fotoɗe, saka kʉ̃risiaɗai basia chi congregacionɗe mauɗe Jeowaba saka senti basia.

¿KÃAREƊEBENA KAWASIƊAA?

19, 20. 1) ¿Kãare kawasiɗaa? 2) ¿Kãare waaburu kawaɗaiba kĩrukaraaɗawẽa mauɗe peraɗawẽa a panuuɗebenaɗe?

¹⁹ Bibliaba jara ɓuu chi gobiernoba jaraɗayua joma “kĩrukaraayuwẽa panuu, peraɗawẽa panuu” aɗayua. Maamina Jeowaba dachimaa jaraɗa baɗa gobiernoba poyaaɗaabai dachi kĩrukaraayuwẽa duanabi baita. ¿Kãare aseɗaiba jãu pasai naeɗe mauɗe kawawẽa ɓeeɗe kenakuai naeɗe? Dachi Akõreba kʉ̃ria ɓuu dachi apii koɓeeɗaabai bari dachia jaradeaɗe wãi Dachi Akõre Gobiernoɗebena mauɗe berekaɗai Jesús kaaɗe tʉa duanabi baita. Mauɗeebiɗa chi religión setaa jarabadauɗebena kaitawẽa paneeɗai ɓua. Akawa ɓuiɗai chi religión setaa jarabadauɗebenaɗe, trajaɗaabai Babilonia mechia niiɗe.

²⁰ Chi kaaɗebena día acabaiɗea ira ɓuuɗe maucha pasayua mauɗe Jeowaba kʉ̃ria ɓuu maucha asebi ¿Kãareba mau? ¿Kãare aseɗaiba joma mau pasai naeɗe? Jãuɗebena kawaɗayua warebena articuloɗe.