David Goliat ome

Jeowaba Samuelmaa naka jaraɗa basia: “Jesé deemaa wãba. Ichi warrarãɗebena aɓa rey Israelɗebena bayua”. Maabea Samuel araa wãsia, ichia chi warr dawara nii unusiiɗe, naka kʉ̃risiaɗa basia: “Cha nau kũudrãa níturu jʉrʉ adaupeɗaaɗabʉ”. Maka ɓumina Jeowaba Samuelmaa mauwẽma a jaraɗa basia, maabae naka asii: “Mʉa akawa unubaria ẽbẽrarã eɗare kuɓuu saka nuree, bari ʉ̃rʉbenadu unukau”.

Jeseba Samuelmaa seis warrarãɗebena unubisii. Maka ɓumina, Samuelba naka asii: “Jeowaba naarãɗebena aɓa biɗa jʉrʉ adauwẽe. ¿Bichi warrarã maucha bara ɓuka?”. Jeseba naka panausii: “Chi kaaɗebena níturu wãʼãema, mau trʉ̃ David, ichia oejarã ochia ua kuɓuu”. David neesiiɗe, Jeowaba Samuelmaa naka asii: “¡Cha niidu nii!”. Mauɗeeba Samuelba David boro ʉ̃rʉ aceite ea bʉesii. Makaburu jʉrʉ adauɗa baɗa ichi chi kaaɗebena rey Israelɗebena bayua.

Maaɗakare, israelitarã filisteorã ome chĩomaa duanasii, ãchia unibasiɗau soldao mechibena ɓuu chi trʉ̃ Goliat. Noremaacha, israelitarã kakua ʉibachia mauɗe naka ɓia koɓeesia: “Mukĩra aɓa mʉ ome chĩoyua bʉésturu. Ichia mʉ choroaburuubʉrã, dai machi baita bari traja paneeɗayua. Maka ɓumina, mʉaburu choroaburuubʉrã, machíturu dai baita bari traja paneeɗayua”.

David soldaorã kãibadaumaa wãɗa baɗa ichi ãbarã baita chiko odoeyua, ãchi soldao nureeɗeeba. Aria ũriɗa baɗa Goliatba ɓiaruu, mauɗéburu naka asia: “¡Mʉ ichi ome chĩoburua!”. Chi rey Saulba naka asia ichimaa: “Bichi ʉ̃rãburu kũudrãa cheke niiɗe”. Davidba naka asia: “Jeowaburu mʉ aiɗayua”.

Maabae, Saulba ichi chĩoruuɗe jʉ̃barii deaɗauɗa baɗa Davidmaa, maka ɓumina ichia naka asia: “Mʉ chĩobai nau jʉ̃ ɓuu”. Mauɗéburu Davidba eeɓaripeɗa ɓatabarii adauɗa baɗa. Maabae do chekeɗaa wãpeɗa, jʉrʉ adausii cinco mo kakayaa ɓee, ichi ũbisaɗe eɗa kuɓuɗa. Maabae Goliatmaa pira wãɗa baɗa. Chi ẽbẽra choroma nii naka ɓiasii: “¡Bichi, warr, yaa neese kãare pasai kawayua! Mʉa bichi ibana chiko baita wautayua mauɗe ãnimara modeɗebenarã baita biɗa”. Davidba perawẽa naka jaraɗa: “Bichi chĩoɗe neeburuu neko mauɗe chi miasu baara, mʉra Jeowa trʉ̃ɗéburu chĩoburua. Dai omerã chĩowẽe, bari Dachi Akõre omeburu chĩoburua. Joma cha bara ɓuuba unuɗayua Jeowara aude chaarea nii neko maebʉrã ɓatabariiɗeebiɗa. Ichia machi dai juaɗe kuɓuyua”.

Maabae, Davidba mo kuɓusia ichi eeɓaripeɗa ɓatabariiɗe, maabae ɓata ɓuisii ichi chaarea koɓeepeɗa. Jeowaba aiɗaburuuɗeeba, chi mo jĩya ɓata wãsia maabae Goliat dauɓʉʉrʉ ʉyapetasia. Chi ẽbẽra choroma nibaɗa jeeɗa biu ɓaeɗa basia. Mauɗe chi filisteorã miru wãurisiɗau ãchi siɗa beabiɗaamaaba. ¿Bichia biɗa ijãabarẽe ara jari Davidba Jeowaɗe ijãa nibabachii kĩraka?