Salomonba Israelɗe goberna koɓeeɗakare, Jeowaba ichimaa naka wiɗiɗa basia: “¿Kãare kʉ̃ria ɓua mʉa bichimaa deai baita?”. Salomonba naka jaraɗa: “Mʉ kũudrãa ãrĩã nii bẽrã, mʉa adua kãare aseyu. Muchuburia, mʉʉmaa ãrĩã kawabiba bichi ẽbẽrarã ochia ua nibai baita”. Jeowaba naka jarasia: “Bichia mʉʉmaa ãrĩã kawabíbaɗa wiɗiɗa baɗa bẽrã, makarã bichíturu bayua chi ẽbẽra aude kuitaa ɓuu nii joma iujãaɗebena. Mauɗe chi nejarra siɗa deayua, bichia mʉ biʼia ũriiruubʉrã, atea biuwẽe bayua”.

Salomonba chi templo karaa koɓeesia. Ne, plata, bakuru, mauɗe mo baarauba karaaɗa baɗa. Joma mau chi biʼia ɓéturu wau koɓeesia. Ãrĩã mukĩrarã wẽrarã baara kuitaa ãrĩã nureerãba aiɗa waupeɗaaɗa basia. Chi templo siete añoɗe waukapeɗaaɗaa. Mau de Jeowamaa deasiɗau diaɗe, chi ãnimara baa bʉekabadau ʉ̃rʉ ãnimara kuɓupeɗaaɗa. Mau kĩrapeta Salomón õdarrare koɓeepeɗa naka ʉtaa wiɗiɗa basia: “Jeowa, bichi baita wauɗayua templo choroma kĩrawãrea ãrĩã koɓooyu cha kuɓuu aude. Maka ɓumina, ũriba daiba wiɗibudau”. ¿Jeowaba bustasaaka jãu templo? ¿Ũrisaaka Salomonba wiɗisii? Salomonba ʉtaa wiɗiɗakare, bajãaɗeeba aoko ɓaepeɗa mauɗe chi ãnimara duanaɗa baɗa baa wãsii. Jãkaburu Jeowaba unubisii chi templo bustasii. Chi Israelitarãba jãka unusiɗauɗe kĩrajʉʉ ãrĩã bara ɓoosia.

Chi rey Salomón ʉ̃rʉbena jomaurãba kawasiɗau, Israelɗebenarãba mauɗe kaitawẽe ɓeeɗa biɗa ichi kuitaa ãrĩã niiɗeeba. Chi ẽbẽrarãba ochiaɗe wãbachiɗau ãchi problema bara ɓee biʼia duaneebiɗayua. Mauɗe reina puuru Saba abadauɗebena biɗa ochiaɗe wãɗa baɗa wiɗi ɓee poyaa panaubai ɓuu panau kuitaa nii kawayua. Ichia Salomonba panauɗa baɗa ũrisiiɗe, naka asia: “Mʉa ijãabasia mʉʉmaa jarapeɗaaɗa bichi ʉ̃rʉbena, jãabaera kawaaruu bichi aude kuitaa nii mʉʉmaa jarapeɗaaɗa kãyabãra. Bichi Dios, Jeowaba, bichi bendeciɗa baɗa”. Chi ẽbẽra Israelɗebena dauchia duanaɗa basia, kĩrajʉʉ ãrĩã. Maaɗakare jãkawẽe basia.

Salomonba Jeowa ũripeɗa kʉ̃ria nibasiimisa, Israelɗe ãbua nureapeɗaaɗa. Maka ɓumina Salomón wẽrarã junebena puuruɗebenarã ome kimabaraaɗa baɗa, ãchia imagendu kʉ̃ria nureaɗa. Ɓiɗĩi ɓiɗĩia Salomón biɗa imagen kʉ̃ria nibaɗe wãɗa. Jeowa kĩrupeɗa naka jarasia: “Bichi deɗabenarã rey baɗaabayua maabea Israelɗe chi reino aɓa ɓooɗa baɗa omeerãɗe koɓeeyua. Aɓa bichi baita trajabariimaaburu chi iujãa mechibena ɓuu deayua, bichi deɗabenarãba gobernaɗayu iujãa ɓiɗĩika ɓuuɗéburu”.

Jeowaba maucha asesia biʼia kawabiyua ichia jaraɗa baɗaɗebena. Chi mukĩra Salomón baita trajabarii, chi trʉ̃ Jeroboán, ichi oɗe kãriiɗe unuɗa baɗa chi profeta Ahíya ome. Chi profetaba ẽetasii ichi ʉ̃rʉ aa nibaɗa, maabae jãuɗebena 12 kõekuatapeɗa Jeroboanmaa naka jarasii: “Jeowaba ẽebariiruu chi reino Salomón deɗabenarãmaa maabae reino aɓa ɓooɗa baɗa omeerãɗe koɓeeyua. Mʉ ʉ̃rʉ aa nibabarii 10ɗe kõekuaɗa baɗa adauba, bichi chi rey bayu 10 triburãɗebena”. Chi rey Salomonba chi pasapeɗaaɗa baɗa kawasiiɗe, Jeroboán bea kʉ̃riaɗa basii. Mauɗeeba Jeroboán Egiptoɗaa miru wãɗa. Salomón biuɗakare, ichi warr Rehoboam goberna koɓeesii. Maabae Jeroboanba kʉ̃risiaɗa baɗa mʉ beaɗaabai apeɗa Israelɗaa waya wãsii.

Chi dawaraurã Israelɗebenarãba Rehoboammaa naka jarasiɗau: “Ẽbẽrarã biʼia ua nibaaruubʉrã, bichi ũriɗapeɗa bichi baareburu nureayua”. Maka ɓumina ichi amiko kũudrãarãba naka jarasiɗau: “Ẽbẽrarã chaarea ãrĩã ua nibayua mauɗe aude trajabiyua”. Rehoboamba chi amikorãba jarapeɗaaɗa ũrisia. Mauɗéburu ẽbẽrarã kachirua ãrĩã ua nibasia. Chi ẽbẽrarã kĩruɗapeɗa Jeroboán kuɓusiɗau chi 10 triburã gobernabiɗayua. Chi reino 10 tribuɗebena reino Israelɗebena jarabachiɗau. Mauɗe chi reino tribu omeɗebena, reino Judaɗebena jarabachiɗaa. Ẽbẽrarã jãma nureabadaurã Rehoboam baaraburu duaneesia. Makaburu 12 tribuɗebena omeɗe bapeɗaaɗaa.

Jerusalén reino Rehoboamɗe ɓeeɗaa. Jeroboanba bustaabasii chi ẽbẽrarã araa wãɗayu Jeowa kʉ̃riaɗai baita. ¿Mau sakãera? Ichi peraɗa baɗa ẽbẽrarãba ichi ɓuiɗapeɗa maabea Rehoboam kaaɗeburu nureaɗai ɓuuɗeeba. Mauɗéburu paka warr ome neeba waubiɗa basia, maabae ẽbẽrarãmaa naka jarasia: “Jerusalén kaitawẽe ãrĩã ɓua. Bari nama duanésturu cha nau paka warrdu kʉ̃riaɗai baita”. Chi ẽbẽraba ũriɗapeɗa maabae Jeowa waya ida ɓuipeɗaaɗaa.