Jeowaba bʉesii Jeremías ichi ʉ̃rʉbena beɗeayua

Jeowaba Jeremías jʉrʉ adauɗa baɗa ichiɗebena beɗeabiyua Judá iujãaɗe. Ichi bʉesii ẽbẽrarã aria duanabariirãmaa jarabiyua ãchia kachirua asebadau ida ɓuiɗayua. Maka ɓumina Jeremiasba Jeowamaa naka asia: “Mʉ abiɗa kũudrãa cheke niiɗe. Ẽbẽrarã daaɗe beɗea adua nia”. Jeowaba naka jarasia: “Pera nibarã́ba. Mʉa bichi aiɗapeɗa jarayua waabenarãmaa kãare jarayuɗebena”.

Jeowaba Jeremiasmaa jaraɗa baɗa joma dawaraurã puuruɗebena chibʉrʉbiayua maabae ãchi daaɗe chi ʉ ãritabipeɗa naka jarayu: “Ara jari mʉa nau ʉ ãritaɗa kĩraka, araɓau pasayua chi Jerusalén”. Jeremiasba maka asesiiɗe, chi dawaraurã ãrĩã kĩru kopaneesiɗau. Sacerdote Pasjur abadauba, Jeremías sĩpeɗa maabae chi cepoɗe jʉ̃asia, chi jʉ̃rʉ ãbua kuɓupeɗa mauɗe jua siɗa chi tablaba kaatʉ kuɓuɗa basia. Jeremías akawa ẽsabuɗe poyaa dodomiabasiaa. Pasjurba mau dapeɗeeɗa ena bʉeɗa baɗa. Maabae Jeremiasba naka asia: “Mʉa maka ãwatawẽa. Bari ida ɓui ɓuu jaradea nibaɗa”. ¿Maka asesbaaka? Makawãema. Jeremiasba kauwa kʉ̃risiapeɗa naka asia: “Jeowa beɗea aoko kuɓuu kĩra ɓua mʉ kakua eɗare. Mʉa ida ɓuwẽe bayua jaradeai baita”. Maabae Jeremiasba waaburu jaradea koɓeeɗa ẽbẽrarãmaa.

Año ãrĩã baburuuɗe, chi rey chi wiɗi niiba Judaɗe goberna koɓeeɗa. Chi sacerdoterã chi profeta setaa jara nureerã baarauba bustaɗawẽe basii Jeremiasba beɗeaburuu. Mauɗéburu chi gobernadorãmaa naka jarasiɗaa: “Cha nii mukĩra biui baraa”. Jeremiasba jarasia: “Mʉ beabudaubʉrã, mukĩra akawa kachirua asewẽa níturu beaɗayua. Mʉa jarabarii Jeowaba jarabiburúturu, mʉ kʉ̃risiaɗebenáturu jarakau”. Chi gobernanterãba jãu ũrisiɗauɗe, naka asiɗaa: “Cha nii mukĩra biubai ɓua”.

Jeremías waaburu jaradea koɓeeɗa, chi gobernanterã ãrĩã kĩruɗapeɗa maabae chi reymaa jarasiɗau beatábaɗa aɗapeɗa. Chi reyba jarasii machia ase kʉ̃riabudau asébaɗa asia. Maabae jidauɗapeɗa chi ioro koro nuɓuuɗe eɗa ioro ɓaa tãeɗe biui baita jiratasiɗaa. Jeremías bikãa bikãa chi ioro ɓaaɗe eɗa taa wãsii.

Maabae rey baita traja nibabarii Ébed-Mélec abadauba chi reymaa naka jarasii: “Chi gobernanterãba Jeremías chi ioro koro nuɓuuɗe eɗa jiratasiɗaa. Jãma ida kuɓuuduubʉrã, biuyua”. Chi reyba Ébed-Melecmaa jarasii 30 mukĩrarã odoepeɗa Jeremías chi ioro koro nuɓuuɗebena awara ertai aɗa baɗa. Jeremiasba akawa ida kuɓuuwẽe baɗa basia jaradeai baita. ¿Bichi siɗa jãu kĩra niba kʉ̃ria ɓuẽ?