Jerusalén joma ãritapeɗaaɗa basia

Chi ẽbẽrarã Judaɗebenarãba ãrĩã Jeowa ɓuipeɗaaɗa basia maabae junebena diosrã́turu kʉ̃riakuapeɗaaɗa. Joma maarã añoɗe, Jeowaba aiɗa kʉ̃riaɗa basii mauɗéburu profetarã bʉebachia. Maka ɓumina chi ẽbẽrarãba ũriɗakabasia maabae ãchiɗebena atua jarabachiɗaa. Jeowaba kʉ̃riabasii jãarã diosrã waaburu kʉ̃riaɗai baita. Makarã, ¿ichia kãare asei basaa?

Chi rey Babiloniaɗebena, chi trʉ̃ Nabucodonosor, ichia puuru koɓee adau kãribaɗe wãɗa basia. Jerusalénturu naa adauɗa baɗa, chi rey Joaquín siɗa jidaubiɗa basia, chi gobernador nureerã, chi chĩobadaurã mauɗe ne kabadaurã, maabae Babiloniaɗaa uaɗosii. Maabea chi ne templo Jeowaɗebena siɗa odoekuasii. Maaɗakare Nabucodonosorba jaraɗa baɗa chi Sedequías Judaɗe rey nibai baita.

Naeɗera Sedequiasba Nabucodonosor ũribachia. Maka ɓumina chi profetarã setaa jarabadaurã mauɗe chi ẽbẽrarã puuru kaita ɓeerãba jarapeɗaaɗa maucha ũrirã́baɗa chi rey Babiloniaɗebena asiɗau. Jeremiasba naka jaraɗa basia Sedequiasmaa: “Bichia chi rey Babilonia ũriwẽa ɓeeruubʉrã, ẽbẽra ãrĩã biuɗapeɗa, jarrbisia ãrĩã wauɗapeɗa mauɗe ẽbẽrarã Judaɗebena ẽpermakuaɗayua”.

Ocho año baɗakare, chi rey Sedequiasba ũriwẽa ɓeeɗa basia chi rey Babiloniaɗebena, maabae chuburia wiɗisii chi soldaorã Egiptoɗebenarãmaa. Chi rey Nabucodonosorba soldaorã bʉekasii Jerusalén ome chĩobiaɗe. Ãchirã puuru aɗu duaneesiɗaa. Jeremiasba naka jaraɗa Sedequiasmaa: “Jeowaba naka jaraɗa, bichia chi Babiloniorã choroawẽebʉrã, bichi mauɗe chi ẽbẽrarã siɗa biuɗaabayua. Mauɗe choroaruubʉrã, ãchia chi puuru baataɗapeɗa mauɗe jidau odoeɗayua”. Sedequiasba panauɗa basia: “¡Mʉa choroayua!”.

Año y medio baɗakare, chi Babiloniorãba ɓaʼãra chi Jerusalén aɗu jʉ̃kaa kuɓuuɗebena ãritapeɗaaɗa. Jãmare puuruɗaa neeɗapeɗa baatasiɗaa. Mauɗe chi templo siɗa baatapeɗaaɗa, ãrĩã ẽbẽrarã beaɗapeɗa mauɗe ãrĩã jidauɗapeɗa uaɗosiɗau.

Sedequías miru wãɗa basia Jerusalenɗebena, maabae chi Babiloniorãba kaaɗe jʉrʉɗapeɗa, Jericó kaita jidauɗapeɗa Sedequías adoepeɗaaɗa baɗa chi Nabucodonosormaa. Chi Sedequías warrarã beakuasiɗauɗe chi reyba ichimaa ida ochiabisii. Maabae ichi dau pãriu ɓeebipeɗa chi carcelɗe eɗa jʉabiɗa basii. Sedequías aria biuɗa basia. Maka ɓumina Jeowaba naka jaraɗa baɗa chi ẽbẽrarã Judaɗebenamaa: “Chi 70 año baɗakare, mʉa waya uaɗoyua machi de Jerusalenɗebenaɗaa”.

¿Kãare pasaɗaba chi kũudrãarã adoepeɗaaɗa Babiloniaɗaa? ¿Ãchia waaburu Jeowa ũri nibaɗai basaaka?