Kũudrãa kimare niɗauba Jeowa ũrisiɗaa

Nabucodonosorba chi gobernador Judaɗebenarã adoeɗa Babiloniaɗaa maabae ãchi ua koɓooi baita mukĩra chi trʉ̃ Aspenaz kuɓuɗa baɗa, ichi rey baare traja nibabarii basii. Nabucodonosorba mau mukĩramaa jaraɗa baɗa jʉrʉ́baɗa chi gobernadorɗebenarã kũudrãarã kakua biʼia nuree mauɗe ãrĩã kuitaabadau a ɓoosii. Tres año cha naarã kũudrãarãmaa biʼia kawabiayu aɗa baɗa trajaɗai baita chi rey Babiloniaɗebena ome. Ãchi biʼia leaɗapeɗa, ɓʉɗapeɗa mauɗe beɗea kawaɗayu chi Babiloniaɗebenáturu. Mauɗe koɗai basii chi chiko reymaa deabadauɗebenáturu. Chi kimarebena kũudrãarã chi trʉ̃ Daniel, Hananías, Misael mauɗe Azarías. Mauɗe Aspenazba chi trʉ̃ Babiloniaɗebenáturu kuɓuɗa basia: Beltsasar, Sadrac, Mesac mauɗe Abednego. ¿Bichimaa chi jãu kawabisiɗauba Jeowa ɓuiɗai ɓoosii?

Naarã kũudrãarã kimare niɗauba Jeowadu ũri kʉ̃ria nibabachiɗau. Ãchia kuitaa nibasiɗau adauɗaabayu chiko reyba kobarii, chi Ley Jeowaɗeeba chi ɓee jãarã chikoɗebenarã koobai aɗa baɗa baerã. Mauɗéburu ãchia Aspenazmaa naka jarasiɗau: “Muchuburia, jãu chiko reyba kobarii, daimaa kobirã́baɗa”. Maka ɓumina Aspenazba ãchimaa naka asia: “Biʼia koɗawẽebʉrã, mauɗe reyba unuuruubʉrã machi kĩadarr ẽpermo panuu, mʉ beayua”.

Danielba kʉ̃risiaɗa baɗa biʼia aseyúturu. Chi guardiamaa jarasii: “Daimaa diez diáturu bari verdura, ne taa bania baaraburu kobiábaɗa asii. Maabae ochiaba dai saka paneeɗai mauɗe chi kũudrãarã chiko reyɗe kobadau kãyabãra”. Maabae chi guardiaba jarasii ara jãka aseɗaika aɗa baɗa asii.

10 días baɗakare, Daniel chi õbea amikorã baara biʼia ãrĩã nibasiɗau waabenarã kũudrãarã kãyabãra. Jeowa ãrĩã kĩrajʉʉ ɓoosia ãchi ome mau ichíturu ũrisiɗauɗeeba. Jeowaba Danielmaa biʼia ãrĩã kawabisia chi komakaraaɗe unuɗa baɗa, mauɗe Jeowaba daumaa unubibarii biʼia ãrĩã kawai baita.

Chi kũudrãarãmaa tres año kawabiapeɗaaɗakare, Aspenazba Nabucodonosor daaɗe uaɗosii. Chi rey ãchi ome beɗeapeɗa kawasii Daniel, Hananías, Misael mauɗe Azarías ãchíturu ãrĩã kuitaa nureasii junebena kũudrãarã kãyabãra. Mauɗéburu jʉrʉ adauɗa baɗa ichi ome trajaɗayua. Maaɗakare, chi reyba ichi kãare asei adua basiiɗeeba, ãchirãmaaburu wiɗibachii. Jeowaba ãchi aude kuitaarã nibabiasii junebenarã kuitaa nureerã mauɗe jaibana reyɗebenarã kãyabãra.

Daniel, Hananías, Misael mauɗe Azarías ãchi puuruɗe duanawẽe basia, maka ɓumina ãchia kuitaa duanasii ãchirã Jeowaɗebenadu nureasii. ¿Bichi akõre bichi dana bichi ãbua wãʼãeɗe Jeowaba jaraburuu ũriñuẽ?