Chi Gobierno poyaa acabaabai ɓuu

Ẽsabuɗe, chi rey Nabucodonosor, ichia akawa kawaabai ɓuu komakaraaɗa baɗa. Máturu kʉ̃risia koɓeepeɗa mauɗeeba poyaa kãi noɓeebai ɓoosii. Ichia chi jaibanarã iukuapeɗa maabae naka asia: “Machia jarásturu mʉa komakaraaɗa baɗa”. Ãchia naka asiɗau: “Rey, jarase bichia komakaraaɗa”. Maka ɓumina Nabucodonosorba naka asii: “¡Makawãema! Jarásturu machiaburu mʉa komakaraaɗa. Mʉʉmaa jarawẽebʉrã, machi beakuayua”. Ãchia mauchaburu naka jarasiɗau: “Naa jarase bichia komakaraaɗa baɗáturu, maabáeburu jaraɗayua jãu kãare jara ɓuu”. Ichia naka asii: “Machia mʉ bari engaña kʉ̃ria panua. ¡Jarásturu mʉ kãare komakaraaɗa!”. Ãchia naka asiɗau: “Nau iujãaɗe wãʼãema aseɗai baita bichia jara ɓuu. Jãka poyaabai ɓua”.

Nabucodonosor ãrĩã kĩruɗa basia mauɗéburu chi kuitaa ãrĩã nureapeɗaaɗa baɗarã beakuabisii chi puuruɗebenarã baɗa. Mauɗe Daniel, Sadrac, Mesac, Abednego baara beaɗai basii. Maabae Danielba jarasii mʉʉmaa tiempo deábaɗa asii. Maabae ichi amikorã ome ʉtaa wiɗipeɗaaɗa Jeowamaa ãchi aiɗai baita. ¿Jeowaba kãare asesaa?

Jeowaba Daniel daumaa unubiɗa baɗa chi Nabucodonosorba komakaraaɗa baɗa maabae jaraɗa chi mau kãare saka jara ɓuu. Norema, Daniel beɗeaɗe wãsii chi rey baara traja nibabarii ome, maabae naka asii: “Chi kuitaa nureerã aɓa biɗa bearã́baɗe. Mʉa jarai ɓuu chi reyba komakaraaɗa”. Chi rey baita traja nibabariiba Daniel adoesii Nabucodonosor ɓuumaa. Danielba reymaa naka asii: “Dai Akõreba bʉʉmaa kawabiɗa baɗa kãare pasaiɗebena. Bichia nakaburu komakaraaɗa: bichia imagen mechia nuɓuu unuɗa, chi boro neeɗeeba wau ɓooɗa, chi pechu chi ikia baara plataɗeeba wau ɓuu, chi ɓi chi ɓakara baara cobreba wauɗa, chi jʉ̃rʉ jĩñorrɗeeba mauɗe ioro ɓaa baare wauɗa. Maaɗakare, eaɗebena mo neesii maabae mechibena drʉ neeɗa chi jʉ̃rʉ imagenɗebenamaa. Chi imagen baɗa ãripeɗa maabae chi jora basii, maabae mechibena pũapeɗa joma odoesia. Chi mo baɗa mechibena eaɗe basii, mau ea chi iujãa jomauɗe koɓoosii”.

Mau kaaɗe, Danielba naka asii: “Bichia komakaraaɗa naka jara ɓuu: chi boro neeɗeeba wauɗa bichi gobiernodu ɓua. Chi pechu chi ikia plataba wauɗa jãu gobierno bichi kaaɗe nee ɓuu. Chi cobreba wauɗa june gobierno ɓua, mau kaaɗe neeburuu, ichiaburu nau iujãaɗe goberna koɓeeyua. Chi gobierno neeburuu chaarea ãrĩã ɓooyua jĩñorr kĩraka. Mʉ kaaɗe neeburuu chi gobierno ãbuarãa panawẽa, orrsoɓari chaarea ɓooyua jĩñorr kĩra mauɗe june orrsoɓari susua ɓooyua ioro ɓaa kĩra. Chi mokara eaɗe ba wãɗa jãu chi Dachi Akõre Gobiernoɗe, jãuba joma ãrikuatayu chi gobiernorã baɗa, máturu apii koɓeeyua”.

Nabucodonosor Daniel kĩrapeta õdarrɗe koɓeepeɗa chi kĩadarr barru koɓeepeɗa naka asia: “Bichi Diosburu bichimaa kawabiaɗa baɗa mʉa komakaraasii ʉ̃rʉbena. Wãʼãe junebena dios ichi kĩraka”. Nabucodonosorba Daniel beai baɗaɗe bari ichia junebena kuitaa nureerã ua koɓooi baita kuɓuɗa baɗa mauɗe gobernante babisii joma Babilonia druaɗebena. ¿Bʉa unusẽe saka Jeowaba aiɗaɗa baɗa Danielba ichimaa ʉtaa wiɗisiiɗe?