Ãchi õdarrare kopaneeɗaabasia

Chi rey Nabucodonosorba imagen mechia nuɓuu komakaraaɗakare, ichia imagen choroma neeba waubiɗa. Chi korii Dura abadauɗe kuɓuɗa mau kĩrapeta chibʉrʉbiɗa baɗa jomaurã ẽbẽra mechia nureerã mau paisɗebena, Sadrac, Mesac, Abednego baara mama aria panasiɗau. Chi reyba naka asia: “Chi chaabudau ũribudauɗe, imagen kĩrapeta õdarrare kopaneeyua. Chi õdarrɗeeba koɓeewẽe odoeɗapeɗa chi aoko nuɓuuɗe eɗa jirataɗe wãɗayua”. Makarã, ¿chi jãarã kũudrãarã jãu imagen kĩrapeta õdarrare kopaneesaaka? ¿Bari Jeowáturu kʉ̃ria nibasiɗaaka?

Maabae, chi reyba chaabisia. Jomaurã õdarrare kopaneesiɗaa chi imagen kĩrapeta maabea jãumaa wiɗi bara ɓeesia. Sadrac, Mesac Abednego õdarrare kopaneeɗaabasii. Chi nuree mukĩrarãba unuɗapeɗa maabae chi reymaa naka jarasiɗaa: “Cha naarã kũudrãarã chi imagen kĩrapeta õdarrare panuuwãe”. Nabucodonosorba kũudrãarã õbea niɗau iu bʉepeɗa naka asia: “Mʉa maucha jaraarua õdarrare kopaneeɗayua chi imagen kĩrapeta. Aseɗawẽebʉrã, mʉa aoko kuɓuuɗe jirakuayua. Dios wãʼãe bayua mauba machi karebai baita”. Ãchia ichimaa naka asiɗau: “Bichia daimaa maucha jarai baita nesitaɗawẽma. Dai Diosburu dai karebai ɓua. Bariarã, ichia dai karebawẽe adua, dai imagen kĩrapeta õdarrare kopaneeɗaabayua”.

Nabucodonosor ãrĩã kĩru koɓeesia. Mauɗe ichi baara nureerãmaa naka asia: “¡Chi aoko kuɓuu wãsiabísturu siete ɓes wãsia kuɓuu aude!”. Maabae ichi soldaorãmaa naka asia: “Naarã mukĩrarã jʉ̃kuaɗapeɗa araa jirataiba”. Chi aoko kuɓuu ãrĩã wãsia kuɓuu baerã, chi soldaorã aria neebudauɗe biupeɗaaɗa basia. Chi kũudrãarã õbea chi aoko kuɓuuɗe ɓaepeɗaaɗa. Maaɗakare, chi Nabucodonosor aoko kuɓuuɗaa ochiaɗe wãɗa baɗa, õbea nibaɗai baɗa, eɗare ẽbẽrarã kimare niɗau tʉa kãriɗau unusii. Ichi ãrĩã perapeɗa maabae ichi aiɗabadaurãmaa naka wiɗiɗa baɗa: “¿Mukĩrarã õbea niɗaúturu jiratapeɗaaɗawãe? Kimare unuurua, ¡aɓa ángel kĩra niiɗe!”.

Nabucodonosor chi aoko kuɓuu kaita wãpeɗa ɓiasia: “¡Awara wã́sturu, Dios Ʉtarebena baita trajabadaurã!”. Sadrac, Mesac Abednego baara aoko kuɓuuɗebena neesiɗauɗe waabenarã perasiɗau. Chi e, chi buɗa, chi ropa siɗa akawa baaɗaabasii, nari ũsia biɗa ũuɗaabasia.

Nabucodonosorba naka asia: “¡Chi Dios Sadrac, Mesac Abednegoɗe mia mechibena nia! Ichia ángel karebakuayua bʉeɗa ɓoosii. Junebena Dios ichi kĩraka wãʼãema”.

Chi kũudrãarã õbea niɗauba bari Jeowa omeburu nibai kʉ̃riasiɗau biubudau adua. ¿Bichi siɗa jãarã kĩra Jeowa baareburu nibai kʉ̃ria nika?