Gobierno bakuru choroma kĩra ɓuu

Ẽsebuɗe, Nabucodonosor komakaraasii mau mechibena peraɗa baɗa. Ichia chi kuitaa nureerã iusii maarãba jaraɗai baita kãare basii ichia komakaraaɗa baɗa, maka ɓumina akawa wãʼãe basia ichimaa jaraɗayu. Maabae, chi rey Daniel ome beɗeaɗa.

Nabucodonosorba Danielmaa naka asia: “Mʉa komakaraasiiɗe unusii bakuru choroma akawa bajãamaa neeɗa. Jãu unui ɓoosii nau iujãa jomauɗebenaɗe. Kiɗua mipitaa ɓee ãrĩã ɓoapeɗa chi jõ ãrĩã baraasii. Chi ãnimararã ichi ekare duanasii, chi ibanarã ichi juaɗe de wauka duanasii. Maabae, ángel bajãaɗeeba neesiiba jarasii: ‘¡Chi bakuru tõtaɗapeɗa mauɗe chi jua tõtábaɗa! Mauɗe chi bakuru ɓiɗĩika kuɓúbaɗa chi karr baara. Chi kʉrrɓʉʉrʉɗe paraayua chi jĩñorr cobre baara kuɓúbaɗa. Chi bakuru sõ diwara koɓeeyua. Maabera ẽbẽra sõwẽe bayua, bari chi sõ ãnimara ɓéturu. Siete tiempoɗe maka koɓooyua. Jomaurãba kawaɗayua Dachi Akõredu chi Gobernante, ichia kʉ̃riaburuumaa ichi gobierno deayuaʼ”.

Jeowaba Danielmaa jaraɗa baɗa jãu komakaraaɗa kãare basii. Danielba jãu komakaraaɗa kawasiiɗe, ãrĩã peraɗa baɗa. Maabae chi reymaa naka asii: “Nau bichi iadaa nureerãmaa maka pasarã ara ɓosma, maka ɓumina bichíturu maka pasayua. Chi bakuru choroma tõsiɗau jãu bichi basia. Bichi jãabera gobernaabayua maabae chi kiɗua koyua ãnimara modeɗebena kĩra. Maka ɓumina chi angelba jaraɗa ɓiɗĩika kuɓúbaɗa chi bakuru chi karr baara. Mau jara ɓuu bichi waya rey bayu”.

Año baɗakare, Nabucodonosor tʉa kãrii basii ichi de ʉ̃rʉ, maabae ochia kãribasii chi puuru Babilonia mipitaa ãrĩã ɓuu. Maabae naka asia: “¡Cha nau puuru mʉa mipitaa wausia!”. Maka jara kuɓuumisa, bajãaɗeeba naka beɗeasia: “¡Nabucodonosor! Bichi jãabera poyaa gobernaabayua”.

Ara mauɗe, Nabucodonosor loco diɗisia maabae ãnimara modeɗebena kĩrakaburu koɓeesia. Mauɗéburu ichi deɗabena jʉretasiɗau, maabae ãnimara modeɗebena baaraburu nibaɗe wãɗaa. Chi buɗa ãrĩã chepeɗa papari kara kĩra ɓeeɗa, pisii baɗa mechibena deseroa chepeɗa ibana pisii kĩra.

Siete año baɗakare, Nabucodonosor waya ichi naa nibaɗaka ɓeesia, Jeowaba waya rey Babiloniaɗebena babisia. Maabae Nabucodonosorba naka asii: “Jeowa ʉ̃rʉbena biʼia beɗeayua, ichítu chi Rey ʉtʉ bajãaɗebena. Ichia ẽbẽra nejuakaya ãrĩã nuree kĩrakayabiayua. Jãabaeburu kuitaaruu Jeowadu chi Gobernante, ichia kʉ̃riaburuumaa ichi gobierno deayua”.