Chi beɗea ɓʉ koɓoosii pareemaa

Maaɗakare, Belsasar rey Babiloniaɗebena baɗaa. Ẽsebuɗe, ichia iukuaɗa baɗa mil ẽbẽrarã chiko kobiai baita. Maarã chi ẽbẽrarã mechia nuree chi puuru choromaɗebena baɗa. Ichia ichi baita traja nureabarii bʉikaɗa adaubiyua chi pocillo neeba wau ɓee Nabucodonosorba odoeɗa baɗa templo Jeowaɗebenaɗe. Belsasarba ichia iukuaɗa baɗa baarauba adaupeɗaaɗa mau pocilloɗe uva ɓaa doɗayua maabae ãchi diosɗebenarã biʼia beɗeakuasiɗau. Kawawẽeɗe, mukĩra jua unusiɗau, maabae ɓʉ koɓeeɗa baɗa beɗea kawaabai ɓee chi pareemaa kobadauɗebenamare.

Belsasar ãrĩã peraɗa baɗa. Ichia jaibanarã iukuapeɗa maabae naka asia: “Mʉʉmaa jarabudaubʉrã kãareɗebena jara ɓuu chi jãarã beɗea, mʉa chi õbeauɗebena aude importante ãrĩã nii koɓooyua Babiloniaɗebena”. Maabae berekasiɗamina, wãʼãe basii kaiba jarayu chi maarã beɗeaɗebena. Maabae chi rey wẽra neepeɗa ichia naka asia: “Mukĩra Daniel adabadauba chi Nabucodonosorba komakaraaɗa baɗa biʼia jarabachii. Mauburu jarayua jãarã beɗea jara ɓuu”.

Danielba chi rey ochiaɗe wãsii. Ichi neesiiɗe, Belsasarba naka jarasia: “Leapeɗa jarai ɓuubʉrã cha naarã beɗea, osorrɗe ataubarii neeba wauɗa deayua, maabae mʉa koɓooyua õbeauɗebena mukĩra importante ãrĩã nii Babiloniaɗebena”. Danielba naka jarasia: “Mʉa jãka ɓuu adau kʉ̃riawẽma. Maka ɓumina jarayua saka jara ɓuu jãarã beɗea. Bichi akõre, Nabucodonosor, ne juakaya ãrĩã nibaɗa, mauɗe Jeowaba kastikaɗa baɗa barikia nibabii baita. Bichia kuitaa ɓoosia joma kãare ichimaa pasaɗa baɗa, maka ɓumina, bichia Jeowa respetaabasia. Chi pocillo neeba wau ɓee bichia adausia ichi temploɗebena baɗa uva ɓaa do nibai baita. Mauɗéburu Dachi Akõreba nau beɗea ɓʉɗa basia: MENÉ, MENÉ, TEQUEL mauɗe PARSÍN. Jãu jara ɓuu chi puuru Mediaɗebenarãba mauɗe chi Persiaɗebenarãba Babilonia adauɗayu, mauɗe bichi maabera rey baabayua”.

Chi puuru poyaa adauɗaabai ɓoosii jãu aɗu paree mechia ɓoosiiɗeeba mauɗe chi do choroma ɓuu koɓoosiiɗeeba. Ara mau ẽsebuɗe, chi Mediaɗebenarã mauɗe chi Persiaɗebenarã baara chi Babiloniaɗebenarã ome chĩoɗe neepeɗaaɗa. Chi rey Persiaɗebena Ciro abadauba, chi do baɗa jaya ɓuisia chi soldaorã neebiɗai baita chi poroa puuruɗaa. Aria neesiɗauɗe, ¡chi poroa ewa noɓoosii! Ara mauɗe soldaorã chĩo bara ɓeesia, chi puuru adauɗapeɗa mauɗe chi rey siɗa beapeɗaaɗa basia. Mauɗe Ciro jãabaera gobernante Babiloniaɗebena basia.

Ciro año baburuu ichia goberna kuɓuu, naka jarasia: “Jeowaba mʉʉmaa jarasii chi templo Jerusalenɗe wauyu. Chi judiorãba aiɗa kʉ̃ria nuree wãɗai ɓua”. Mauɗéburu, ãrĩã wãuchiɗau ãchi druaɗaa 70 año Jerusalén ãritapeɗaaɗakare. Makaburu cumpliɗa basia Jeowaba jaraɗa. Maabáeburu, Ciroba waya deasia chi pocillo neeba mauɗe plataba wau ɓeerã, mauɗe junebenarã siɗa Nabucodonosorba temploɗebena odoeɗa baɗa. ¿Unu ɓuẽ saka Jeowaba israelitarã aiɗasii Ciroɗeeba?