Daniel jiratasiɗau imama duanuu tãeɗe

Darióturu chi rey Babiloniaɗebena koɓeeɗa. Ichia Daniel ẽbẽra bia ãrĩã nii unuɗa baɗa, mauɗéburu kuɓuɗa mukĩra importante ãrĩã nii paisɗebena ua koɓooi baita. Cha naarã mukĩrarãba envidia u nibasiɗau Daniel, mauɗéburu ichi bea kʉ̃ria panasii. Ãchia kuitaa nibachiɗau Daniel õbea ʉtaa wiɗibachia chi diaɗe Jeowamaa, mauɗéburu Dariomaa naka asiɗau: “Rey, ley barai ɓoosii joma chi ẽbẽra bichimaaburu wiɗi nibai baita. Chi niiba jãu ley ũriwẽebʉrã, ioro koro nuɓuu imama duanuuɗe eɗa jiratai ɓua”. Darioba jãu bustapeɗa maabea chi ley firmaɗa baɗa.

Danielba ley chi wiɗi ʉ̃rʉbena kawasiiɗe, ichi deemaa wãɗa baɗa. Aria baɗakare, õdarrɗe koɓeepeɗa Jeowamaa ʉtaa wiɗi koɓeesia ventana ewa nuɓuuɗe. Chi mukĩrarã envidia ãrĩã nuree eteuɗe iuduu neesiɗau ichi deemaa mauɗe Daniel ʉtaa wiɗimaa ɓuu unusiɗau. Maabae pira wãsiɗau Dariomaa naka jaraɗayua: “Danielba ũriibasia bichia jaraɗa baɗa. Diaɗe õbea ichi Diosmaa wiɗibaria”. Darío baita Daniel biʼia nibasii mauɗéburu ida beabi kʉ̃riabasii. Chi día joma kʉ̃risia koɓeeɗa saka karebayua, maka ɓumina chi ley cambiabai basii firma koɓeeɗakare. Mauɗeeba Daniel ioro koro nuɓuuɗaa jiratabi ɓoosii chi imama miosia duanasiimare.

Jãu ẽsabuɗe, Darío ãrĩã kʉ̃risia koɓeepeɗa Daniel kakua, mauba poyaa kãi ɓeebasii. Norema dapeɗeeɗa, pira wãɗa baɗa ioro choɓea nuɓuuɗaa, neepeɗa ɓiasii: “¡Daniel! ¿Bichi Diosba kareba ɓoosẽe?”.

Darioba ũriɗa baɗa Danielba naka jaraɗa: “Chi ángel Jeowaɗeba chi imama i jʉ̃ataɗa baɗa, mauɗeeba koɗaabaɗa ɓoosii”. Darío kĩrajʉʉ ãrĩã ɓeepeɗa maabea awara adaubiɗa basia. Daniel akawa kurutaɗaabasii. Maabae, chi reyba naka asii: “¡Chi mukĩrarã Daniel ʉ̃rʉbena kachirua jarapeɗaaɗa baɗa ioro koro nuɓuuɗaa jiratásturu!”. Eɗaa jiratasiɗauɗe, chi imama ɓee ara mauɗe kotasiɗau.

Darioba ẽbẽrarãmaa naka jarasia: “Jomaurãba Dios Danielɗe respeta nureaɗayua. Ichiaburu imama ɓee ichi koɗaamaaba karebaɗa basii baerã”.

¿Bichi siɗa noremaacha wiɗibarẽe Jeowamaa, ara jari Danielba ase nibaɗa kĩra?