Korin Pakhatnak

11 Kei nih Khrih kaa zohchunh bantuk in nannih zong nih rak ka zohchunh ve u.

2 Zeizong kip ah nan ka philh lo i kaan cawnpiak hna ning in nan zulh peng caah kaan thangṭhat hna. 3 Asinain hngalhter kaan duhmi hna cu pa lu cu Khrih a si; nu lu cu pa a si i Khrih lu cu Pathian a si. 4 Pa nih a lu aa khuh buin thla a cam asiloah profet bia a chim ahcun a lu cung ah ningzahnak a tluntermi a si. 5 Asinain nu nih a lu khuh loin thla a cam asiloah profet bia a chim ahcun a lu cung ah ningzahnak a tluntermi a si. Cutin a tuahmi nu cu a lu a kongmi* nu he an i khat ko. 6 Nu nih a lu aa khuh lo ahcun a sam i tan ko seh. Asinain sam tan le lu kongh cu a caah ningzak a si ahcun a lu i khuh ko seh.

7 Pa cu Pathian muikeng le Pathian sunparnak a si caah a lu aa khuh a herh lo. Asinain nu cu pa sunparnak a si. 8 Zeicahtiah pa cu nu in sermi a si lo, nu tu pa in sermi a si. 9 Mah leng ah pa cu nu caah sermi a si lo, nu tu pa caah sermi a si. 10 Mah ruang ah le vancungmi hna ruang ah nu nih nawlngaihnak langhternak in a lu aa khuh awk a si.

11 Mah leng ah Bawipa Khrihfabu ah nu le pa cu pakhat le pakhat an i herh veve. 12 Zeicahtiah nu cu pa in sermi a si bantuk in pa zong nu in hrinmi a si ve. Asinain zeizong vialte cu Pathian sermi a si. 13 Nu nih lu khuh loin Pathian sinah thlacam cu aa tlak maw, tlak lo ti kha nanmah tein ruat ko u. 14 Sam sau cu pa caah ningzak a si i a phung zong a si lo, a si ko lo maw? 15 Asinain nu caah sam sau cu aa dawh, a si ko lo maw? Zeicahtiah sam cu a lu khuhnak caah pei pek a si cu. 16 Asinain pakhatkhat nih a dang phung zulh duh ah mah kong hi al a duh ahcun kanmah nih siseh, Pathian Khrihfabu nih siseh a dang phung kan ngei lo.

17 Asinain mah lamhruainak kaan pek hna lioah hin thangṭhat kaan duh hna lo. Zeicahtiah hmunkhat ah nan i pumhnak nih ṭhatnak nakin ṭhatlonak a chuahter deuh. 18 A hmasa bik ah, Khrihfabu i nan i pumh tikah nan lakah ṭhencheunak a um tiah ka theih. Mah cu ka zumh pah ve ko. 19 Asinain nan lakah bu ṭhencheunak cu a um hrimhrim ko lai. Mah nih ahodah Pathian cohlanmi a si ti kha a langhter lai.

20 Bawipa Zanriah ei awkah hmunkhat i nan i pumh tikah ningcang tein nan tuah lo. 21 Ei caan a phanh tikah a cheu cu nan rak eicia cang, a cheu cu nan paw a ṭam i a cheu cu nan ri. 22 Einak le dinnak caah inn nan ngei lo maw? Asiloah Pathian Khrihfabu kha zawmhtaih in a si a fakmi kha maw an ning nan zahter hna? Zeitindah kaan ti hna lai? Kaan thangṭhat hna lai maw? Mah kong ah hin cun kaan thangṭhat hna lai lo.

23 Bawipa sinin ka hngalhmi kong hna hi kaan chimh chin hna lai: Bawipa Jesuh nih rawi a si zan ah changreu kha a lak i, 24 lawmhnak bia a chim hnuah a cheu. Cun “Mah hi nanmah caah ka pekmi, ka pum a aiawhmi a si. Keimah philhlonak ah hitin rak tuah zungzal u” tiah a ti. 25 Zanriah an ei dih hnuah hrai zong kha a lak i cu bantuk ṭhiamṭhiam in a tuah, cun “Mah hrai nih ka thi kha a aiawh, hihi nan caah ka thlet dingmi ka thi in sermi biakamnak thar a si. Hi hrai nan din fatin keimah philhlonak ah hitin rak tuah zungzal u” tiah a ti. 26 Cucaah hi changreu nan ei i hi hrai nan din fatin Bawipa a thihnak kong kha a rat hlan tiang nan thanhmi a si.

27 Cucaah i tlak lo buin Bawipa changreu a ei i a hrai a dingmi paoh cu Bawipa pum le thi cung ah sualnak a tuah a si. 28 Amahle amah kha ṭha tein i dothlat hmasa seh law mah hnu lawng ah changreu kha ei seh, hrai kha ding seh. 29 A eimi le a dinmi nih Bawipa pum a aiawh ti kha hngalh loin a ei, a din ahcun a cung ah biaceihnak a tluntermi a si. 30 Cucaah nan lak i mi tampi cu nan derthawm i nan zaw, a cheu cu nan thi.* 31 Asinain kanmahle kanmah ṭha tein kan i dothlat ahcun biaceih kan si lai lo. 32 Biaceih kan si hmanh ah vawlei he sualphawt chih kan si nakhnga lo Jehovah* nih a kan chimhhrinhmi a si. 33 Cucaah unau hna, Bawipa Zanriah ei awkah nan i pumh tikah pakhat le pakhat i hngak u. 34 A paw a ṭammi cu inn ah ei ta ko seh, cuticun hmunkhat i nan i pumh tikah biaceihnak nan i huah lai lo. A dang kong tu cu ka rak phanh tikah ka tawnghtham te lai.