Luka

6 Sabbath ni ah lo chung in an kal lioah Jesuh le a zultu pawl nih favui kha an zun, an kut in an hnuai i an ei. 2 Mah tikah Farasi mi cheukhat nih “Sabbath ni ah tuahnak nawl a um lomi kha zeicah nan tuah?” tiah an hal hna. 3 Jesuh nih “David le a mi pawl an paw a ṭam tikah David nih zeidah a rak tuah ti kha nan rel bal lo maw? 4 Pathian innchung ah a lut i tlangbawi hna dah ti lo nih cun ahohmanh einak nawl an ngeih lomi Pathian hunhmi changreu* kha a ei, cun a mi pawl zong a dangh hna” tiah a leh hna. 5 Cun “Mi Fapa cu Sabbath Bawi a si” tiah a ti.

6 Mah hnu a dang Sabbath ni ah Jesuh cu pumhnak inn ah a lut i a cawnpiak hna. Cuka ah a kut orhlei a zengmi pa pakhat a rak um. 7 Phungbia cawnpiaktu hna le Farasi mi hna nih Jesuh kha sualphawt an duh caah Sabbath ni ah mah pa hi a damter hnga maw tiah ṭha tein an ngiat. 8 Jesuh nih an ruahnak kha a hngalh caah a kut pakhat a zengmi pa kha “Tho law hika a lai ah hin rak dir” tiah a ti i mah pa cu a rak dir. 9 Mah tikah Jesuh nih “Bia kaan hal hna lai, Sabbath ni ah zeidah tuah awk a si? Ṭhatnak maw, ṭhatlonak dah? Minung nunnak khamh maw, minung nunnak thah dah?” tiah a hal hna. 10 A pawngkam ah a ummi vialte kha a zoh hna hnuah mah pa cu “Na kut kha samh” tiah a ti i a samh tikah a dam ṭhan. 11 Mah tikah phungbia cawnpiaktu hna le Farasi mi hna cu an thin a hung tuk i Jesuh kha zeitindah kan tuah ah a ṭhat lai tiah pakhat le pakhat an i ceih.

12 Nikhat cu thlacam awkah Jesuh cu tlang cung ah a kai i Pathian sinah zan khuadei thla a cam. 13 Khua a hun dei tikah a zultu pawl kha a auh hna, an lakin 12 kha a thim hna i lamkaltu tiah min a pek hna. 14 Peter tiah Jesuh nih min a sakmi Simon, a nau Andru, Jeim, Johan, Filip, Bartholomew, 15 Matthai, Thomas, Alfias fapa Jeim, “a lung a thomi” Simon, 16 Jeim fapa Judas, a hnuah Jesuh a rawitu Judas Iskariot hna an si.

17 Jesuh cu anmah he tlang cung in a rung ṭum i hmunrawn kha a phan. Cuka ah a zultu tampi an um. Jerusalem khua in le Judea ram khuazakip in, Tair le Sidon peng rilikam khua hna in a bia ngaih duh ah le an zawtnak damter duh ah a rami zong tampi an um. 18 Khuachia nih harnak a pekmi hna hmanh kha a damter hna. 19 A sinin a chuakmi ṭhawnnak nih zawtnak a damter caah mibu cu Jesuh tawngh awkah an i zuam.

20 Mah hnuah Jesuh nih a zultu pawl kha a zoh hna i hitin a ti:

“A si a fakmi hna, nannih cu mi lunglawm nan si. Pathian Pennak cu nanmah ta a si.

21 “Atu ah a paw a ṭammi hna, nannih cu mi lunglawm nan si. Khim tein nan ei te lai.

“Atu ah a ṭapmi hna, nannih cu mi lunglawm nan si. Nan ni te lai.

22 “Mi Fapa ruang ah mi nih an in huat hna, an in hlawt hna, an in serhsat hna i nan thang an in chiat hna tik paoh ah nannih cu mi lunglawm nan si. 23 Cu ni ahcun i lawm u law thanuam tein i hlok len ko u. Vancung ah nan hmuh dingmi laksawng cu a ngan tuk. An pupa hna zong nih profet pawl kha cutin an rak tuah hna.

24 “Nannih mirum mi hna, ngaihchia nan va si dah! Nannih cu nun nuamhnak kha tling tein nan co cang.

25 “Atu ah a khimmi hna, ngaihchia nan va si dah! Rawlṭam in nan um te lai.

“Atu ah a nimi hna, ngaihchia nan va si dah! Lungkuai ngai in nan ṭap te lai.

26 “Mi nih an in thangṭhat hna ahcun thil ṭhalo nan tong lai! An pupa hna nih profet deu pawl kha cutin an rak thangṭhat hna.

27 “Nannih ka bia a ngaimi hna, kaan chimh hna lai: Nan ral kha daw peng hna u, aan huatu hna cung ah ṭhatnak tuah peng u. 28 Chiat aan serhtu hna caah thluachuah halpiak peng hna u, aan serhsattu hna caah thla campiak peng hna u. 29 Nan biang ah an in bengh hna ahcun khattalei biang zong chit hna u. Nan angki leng aan chuttu kha nan angki chung zong pe hna u. 30 Aan haltu paoh kha pe hna u, nan thil aa lakmi kha va hal ṭhan ti hna hlah u.

31 “Mi nih kan cung ah tuah hna seh ti nan duhmi ning in midang cung ah va tuah ve u.

32 “Aan dawtu hna lawng nan dawt hna ahcun zeidah aa hlei lai? Misual mi hmanh nih anmah a dawtu hna cu an dawt ve ko hna. 33 Nan cung ah ṭhatnak a tuahmi hna cung lawng ah ṭhatnak nan tuah ahcun zeidah aa hlei lai? Misual mi hmanh nih cutin an tuah tawn ko. 34 Kan hmuh ṭhan lai timi ruahchannak he nan cawih* hna ahcun zeidah aa hlei lai? Misual mi hmanh nih hmuh ṭhan duh ah anmahle anmah an i cawih tawn ko. 35 Nannih nih cun nan ral kha daw peng hna u, an cung ah ṭhatnak tuah peng u. Kan hmuh ṭhan lai timi ruahchannak ngei loin cawih peng hna u. Cutin nan tuah ahcun laksawng nganpi nan hmuh lai. Cung Nung Bik fale* nan si lai. Zeicahtiah Pathian cu lawmh a hngal lomi le misual mi hna cung ah ṭhatnak a tuahtu a si. 36 Nan Pa cu zaangfah a thiammi a si bantuk in nannih zong zaangfahnak langhter peng u.

37 “Midang kha va soi ti hna hlah law nangmah zong soi na si ve lai lo. Midang kha sual va phaw ti hna hlah law nangmah zong sualphawt na si ve lai lo. Midang kha va ngaithiam peng hna law nangmah zong ngaihthiam na si ve lai. 38 Midang thil pekṭhenh kha nan zia ah canter u law nanmah zong pekṭhenh nan si ve lai. Nan angki zal chung ah siang ngai in an in rawnpiak hna lai leng ah benh chih, hninh chih le liam thluahmah in pek nan si lai. Midang nan tah hna ning in tah nan si ve lai.”

39 Mah hnuah Jesuh nih tahchunhnak hna hmang in hitin a ti: “Mitcaw nih mitcaw kha lam a hruai kho lai maw? Lam a hruai ahcun an pahnih ning in khor chung ah an tla ko lai. 40 Siangngakchia cu a saya cung ah a um kho lo. Asinain ṭha tein cawnpiakmi paoh cu saya bantuk a si kho. 41 Na mit chung ah a ummi thingtan hmanh kha zoh loin na unau mit chung i a ummi hmunthur hmete kha zeicah na zoh? 42 Na mit chung ah thingtan a um ko buin na unau cu ‘Na mit chung i hmunthur kha in chuahpiak ning’ tiah zeitindah na ti khawh lai? Mi depde hna, nan mit chung i thingtan kha chuah hmasa u, mah lawng ah fiang tein nan hmuh khawh lai i nan unau mit chung i hmunthur hmete kha nan chuah khawh lai.

43 “A ṭhami kung in thei ṭhalo a tlai lo i a ṭhalomi kung zong in thei ṭha a tlai lo. 44 A thei zohnak in a kung kha hngalh khawh a si. Saihmurhling kung in theipi lawh khawh a si lo. Theihmung kung zong in mitsur lawh khawh a si lo. 45 Miṭha nih cun a lungthin chung i thilṭha kha a chuah tawn. Miṭhalo nih cun a lungthin chung i thil ṭhalo kha a chuah tawn. Zeicahtiah lungthin chung i a khatmi kha kaa in a chuak tawn.

46 “Ka chimmi ning in tuah ṭung loin zeicah ‘Bawipa! Bawipa!’ tiah nan ka auh? 47 Ka sinah a ra i ka chimmi vialte kha a ngai i a tuahmi cu aho he dah an i lawh ti kha kaan hmuhsak hna lai: 48 Inn a sak tikah thukpi in a cawh i lung cung ah a hram a bunhmi pa he an i lo. Ti a lianh tikah ti nih fakpi in a den ko nain mah inn cu fek tein sakmi a si caah a hnin kho lo. 49 Asinain ka chimmi kha a thei i a zul lomi cu inn hram bunh loin vawlei cung ah inn a sami pa he an i lo. Tilian nih a den tikah inn cu chikkhat te ah a tlu colh i a rawk dih.”