Peter Pahnihnak

3 Ka dawtle hna, hi ca hi nan sinah a voihnihnak cakuat ka rak ṭialmi a si. A voikhatnak ka cakuat bantuk in a fiangmi nan khuaruah khawhnak kha hman awkah forh kaan duh hna caah a kong cheukhat kha ka rak ṭial ṭhan. 2 A thiangmi profet hna nih hlanlio ah an rak chimmi bia hna le lamkaltu hna sinin nan theihmi Khamhtu Bawipa i nawl peknak kha philh hlah u. 3 Pakhatnak ah hihi hngal u, ni hmanung bik caan ah thilṭha a nihsawhtu an chuak lai. An pumsa duhnak ning in an tuah lai i, 4 “Khrih a ra ṭhan lai timi biakam cu khuazei ah dah a um? Kan pupa hna thihnak ah an i hngilh ni thawk in zeihmanh aa thlen ṭung lo. Pathian nih minung a rak ser caan thawk in thil vialte cu amah ning in a si peng ko” tiah an ti lai.

5 Annih nih hramhram in an i hngalhter duh lomi cu Pathian bia thawng in hlanliopi ah van cu a rak um cang, vawlei cu ti chung in a hung lang i ti le ti karlak ah a um. 6 Cu thil hna nih mah lio chan i mi kha a hrawh hna. Ti nih vawlei pumpi kha a khuh dih tikah cutin a rak si. 7 Pathian bia ṭhiamṭhiam in atu ah a ummi van le vawlei zong mei in hrawh awkah zuah an si. Pathian zei i a rel lomi hna biaceih an si lai ni le hrawh an si lai ni tiang an hmun lai.

8 Ka dawtle hna, Jehovah* caah nikhat cu kum thongkhat bantuk a si i kum thongkhat cu nikhat bantuk a si ti kha philh hlah u. 9 Mi cheukhat nih a khul a nuar tiah an ruah bang in Jehovah* cu a biakam tlinter awkah a khul a nuar lo. Ahohmanh hrawh a duh hna lo i mi vialte nih sual ngaihchihnak ngei hna seh ti a duh caah a lung a saumi a si. 10 Jehovah* ni cu mifir bantuk in a ra lai. Cu ni ah cun van cu awn cukmak in a lo lai. Van le vawlei ah a ummi thil hna cu a linh tuknak ah an ti dih lai. Vawlei le a chung ah a ummi thil hna cu an kang lai.*

11 Cu thil vialte cu cutin an tit dih lai caah zei bantuk mi dah kan si awk a si ti kha ruat u. A thiangmi tuahsernak kha tuah u law Pathian lei ah i pechan u. 12 Jehovah* ni cu a ra lai ti kha lungthin pe in hngak ko u. Mah ni ah van cu mei in hrawh a si lai i van le vawlei ah a ummi thil hna cu a linh tuknak ah an ti dih lai. 13 Asinain kannih cu Pathian nih a kan kamhmi, dinnak a umnak hmun van thar le vawlei thar kha kan hngak.

14 Cucaah ka dawtle hna, cu thil hna cu nan hngah caah soisel awk a um lomi le a thurhnawm lomi in a donghnak ah Pathian nih aan hmuh hna nakhnga le daihnak a um nakhnga fakpi in i zuam u. 15 Pathian lungsaunak ruang ah khamhnak kan hmu tiin ruat ko u. Kan dawtmi unaupa Paul zong nih Pathian pekmi fimnak in nan sinah cutin a rak ṭial. 16 Paul nih a cakuat vialte ah mah kong hna kha a rak chim. Asinain a kong cheukhat cu hngalhthiam awkah a har. Ṭha tein a hngalthiam lomi* le lungrep a ngei lomi hna nih mah kha a sullam an merh. A dang Cathiang a sullam zong kha an merh i mah nih anmah rawhralnak tu a chuahter.

17 Cucaah ka dawtle hna, hihi nan rak hngalh chung caah nawlngai lomi hna i an sualnak lam kha zulh lo awk le a hmaanmi lam ah fek tein dir khawh awkah i ralring u. 18 Kan Bawipa le Khamhtu Jesuh Khrih vel kha hmu chin u law a kong hngalhnak lei ah ṭhang chin ko u. Jesuh cu atu in zungzal tiang sunparnak hmu ko seh. Amen.