Hebru

11 Zumhnak timi cu kan i ruahchanmi thil a tling hrimhrim lai ti zumh le hmuh khawh a si lomi thil a um taktak ko ti zumh* kha a si. 2 Hlanlio mi hna nih cu bantuk zumhnak an ngeih caah Pathian nih a lung an ton kha tehte a khaan.

3 Pathian bia thawng in van le vawlei ah a ummi thil* cu ningcang tein chiah an si ti kha zumhnak in kan hngalh. Hmuh khawhmi thil cu hmuh khawh lomi thil in a hung ummi an si.

4 Zumhnak thawng in Abel nih Kain nakin a ṭha deuhmi raithawinak kha Pathian a pek. Mah zumhnak thawng in miding a si timi tehte khaannak kha a hmuh. Pathian nih a laksawng kha a cohlanpiak. A thi cang ko nain zumhnak thawng in bia a chim rih ko.

5 Zumhnak thawng in Enok cu ṭhial a rak si i a thih lioah fahnak a ing lo. Pathian nih a ṭhial caah khoika hmanh ah hmuh khawh a si ti lo. Ṭhial a si hlanah Pathian lung a ton timi tehte khaannak kha a hmuh. 6 Zumhnak loin cun Pathian lungton khawh a si lo. Zeicahtiah Pathian biak a duhmi nih cun Pathian a um ti le Pathian cu lungtak tein amah a kawlmi laksawng petu a si ti kha an zumh a hau.

7 Noah cu a hmuh rih lomi thil kong ah Pathian sinin ralrin peknak a hmuh tikah zumhnak thawng in Pathian ṭihnak kha a langhter i a innchungkhar khamh awkah lawng a sak. A zumhnak thawng in vawlei cu sualphawt a si i zumhnak ruang ah miding tiah ti a si.

8 Abraham cu ro ah a co lainak hmun i kal ding in Pathian nih a auh tikah zumhnak thawng in nawl a ngai; khuazei ah kal ding ti a hngal lo nain a ram in a chuak. 9 Zumhnak thawng in Abraham cu biakammi ram ah ramdang mi bantuk in a va um. Amah he biakam a coṭi dingmi Isak le Jakob he thlam ah khua an sa. 10 Abraham nih hram taktak a ngeimi, Pathian nih a dirh i a sakmi khua kha a hngah.

11 Sarah zong a kum a luan cang ko nain zumhnak thawng in fa a pawi.* Bia a kamhtu cu zumhtlak a si tiah a ruah caah a si. 12 Cucaah Abraham zong mithi bantuk a si cang ko nain a sinin van i arfi zat le rilikam i relcawk lomi thetse zat in tefa an chuak.

13 An dihlak in biakamnak a tlinmi kha an hmu lo nain zumhnak ngeih bu tein an thi; mah biakamnak cu hmailei ah a tling dingmi a si nain an caah hmuh cangmi bantuk a si i lunglawm tein an cohlan. Cuka ram ah mising le ramdang mi an si kha zapi hmaiah an chim. 14 Cutin a chimtu hna nih an umnak ding hmun pakhat lungtho tein an kawl kha an langhter. 15 An chuahtak cangmi hmun kha ruat peng hna seh law cu kir ṭhan awkah caanṭha an ngei ko hnga. 16 Asinain annih cu van he aa tlaimi, a ṭha deuhmi hmun kha hmuh awkah an i zuam. Cucaah Pathian cu an Pathian tiah auh a simi kha a ning a zak lo. An caah khua pakhat hmanh a timhpiak hna.

17 Abraham cu hneksak a si tikah a zumhnak thawng in Isak kha raithawinak ah a rak pek hnik taktak. Biakamnak kha lunglawm tein a hmumi a si ko nain a fapa ngeihchunhte kha pek a timh. 18 “Na tefa tiah auh dingmi cu Isak chung in a chuak lai” tiah Pathian nih a ti ko nain cutin a timh. 19 A fapa kha Pathian nih a thawhter ṭhan khawh ti a zumh. A fapa kha thihnak in a hmuh ṭhan taktakmi bantuk a si. Mah nih hmailei ah a cang dingmi kha a langhter.

20 Isak zong nih zumhnak thawng in Jakob le Esau kha hmailei a cang dingmi kong he aa tlaiin thluachuah a pek hna.

21 Jakob nih a thih lai ah zumhnak thawng in Josef fapale pahnih kha thluachuah a pek hna. A ṭhiangṭhunh kha i hngauh in Pathian a biak.

22 Josef nih a thih lai ah zumhnak thawng in Israel mi Izipt ram in an chuah lainak kong kha a chim. A ruh kha kalpi ding in bia a cahtak hna.

23 Zumhnak thawng in Moses kha a nu le a pa nih a chuah hnu thla thum chung an thuh. Anih cu fadawh ngai a si kha an hmuh caah siangpahrang nawl peknak kha an ṭih lo. 24 Moses cu a hun upat tikah Faraoh fanu i fapa ti auh kha zumhnak in a al. 25 Sualnak chung ah chikkhat i nuamh nakin Pathian miphun he hremnak in tu kha aa thim. 26 A hmuh laimi laksawng kha aa zoh chih caah Chiti Thuhmi* in serhsatnak in kha Izipt ram i chawhlawn nakin a sunglawi deuhmi ah a ruah. 27 Moses cu zumhnak thawng in siangpahrang thinhunnak kha ṭih loin Izipt ram kha a chuahtak. Hmuh khawh lomi Pathian kha hmu seh law cu bang, fek tein a um peng. 28 Zumhnak in Lanhtak Puai a tuah i innka ba ah thi a thuh caah hrawktu nih an faterle kha harnak a pe kho hna lo.

29 Zumhnak thawng in Israel mi nih Rili Sen kha lei ro bantuk in an tan, asinain Izipt mi nih tan an i timh tikah ti nih a khuh dih hna.

30 Zumhnak thawng in Israel mi nih Jeriko khua kulhnak kha nisarih chung an vel hnuah a cim. 31 Zumhnak thawng in hlawhhlangnu Rahab nih mi-ngiatu kha ṭha tein a rak cohlan hna i nawlngai lomi hna sinah hrawh chih a rak si lo.

32 Aho kong dah ka chim rih lai? Gideon, Barak, Samson, Jefthah, David, Samuel le a dang profet hna kong ka chim rih ahcun caan nih a ka zo lai lo. 33 Zumhnak thawng in siangpahrang kha an tei hna, dinnak kha an chuahpi, biakamnak kha an hmuh, chiandeih kaa kha an phih, 34 mei-alh kha an hmih, vainam thahnak in an luat, derthawmnak in an hung ṭhawng, raltuknak ah an ṭhawng, dotu ralkap kha an dawi hna. 35 Nu cheukhat nih thawhṭhannak thawng in an mithi kha an hmuh ṭhan hna. Pa cheukhat nih luatnak hmuh awkah an zumhnak kha thlahdorh loin a ṭha deuhmi thawhṭhannak hmuh awkah hremnak tu kha an in. 36 A cheu cu nihsawhnak le tuknak an tong. Mah lawng hmanh si loin cikcin khihnak le thongthlaknak zong an tong. Cuticun hneksak an si. 37 Lung in an cheh hna, hneksaknak an tong, hluah in cheu hnih ah an cheu hna, vainam in an thah hna, tuu phaw le meheh phaw i hruk in an vakvai, sifak ngai in an um, harnak an tong i a ding loin an pehtlaih hna; 38 an caah vawlei cu umnak ah aa tlak lo. Ramcar le tlang cung, lungkua le vawlei kua hna ah an rak vakvai.

39 Hi mi vialte nih zumhnak thawng in Pathian mithmai ṭha an hmu timi tehte khaannak kha an hmuh, asinain Pathian biakam a tlinmi tu cu an rak hmu lo. 40 Zeicahtiah kan caah a ṭha deuhmi thil kha Pathian nih a hmuh chung caah a si. Annih cu kanmah tel loin mitling ah ser an si lai lo.