Johan sin pekmi Biathlam

21 Cun van thar le vawlei thar kha ka hmuh hna; hlanlio van le hlanlio vawlei cu an um ti lo i rili zong a um ti lo. 2 A thiangmi khualipi, Jerusalem Thar cu a va ding ton awkah monu bantuk in aa ṭamh i Pathian sinin vancung khin a rung ṭummi zong ka hmuh. 3 Bawiṭhutdan in aw thangpi pakhat ka theih i “Zoh hmanh! Pathian thlam cu minung sinah a um cang, amah cu an sinah a um lai i annih cu a miphun an si lai. Pathian hrimhrim cu an sinah a um lai. 4 Pathian nih an mitthli vialte kha a hnawh dih hna lai, thihnak a um ti lai lo, ngaihchiatnak le ṭahnak le fahnak zong a um ti lai lo. Hlanlio thil cu an lo dih cang” tiah a ti.

5 Bawiṭhutdan cung ah a ṭhumi nih “Zoh hmanh! Thil vialte a thar in ka ser cang” tiah a ti. Cun “Hi bia cu zumhawk a tlakmi le a hmaanmi an si caah ṭial tuah” ti zong in a ti. 6 Cun hitin a ka ti: “Hi bia cu an tling cang! Keimah cu Alfa le Omega,* hramthawknak le donghnak ka si. A ti a halmi paoh kha man loin nunnak cerhti ka pek hna lai. 7 Teitu a simi nih hi thil hna hi a co lai. Kei cu a Pathian ka si lai i anih cu ka fa a si lai. 8 Asinain a ral a chiami, zumhnak a ngei lomi, a thurhnawm i fih a nungmi, lai a nawngmi, nupa sualnak* a tuahmi, khuachia thiamnak a hmangmi, siasal a biami le lih a chimmi vialte cu mei le kat in a alhmi tili ah paih an si lai. Mah cu thih voihnihnak kha a si.”

9 Hmanung bik rai pasarih in a khatmi khengkuar pasarih aa putmi, vancungmi pasarih lak i pakhat cu ka sinah a ra i “Ra hmanh, Tuufa nupi ding monu cu kaan hmuhsak lai” tiah a ka ti. 10 Cun a ngan ngaimi tlang sangpi ah thiang thlarau ṭhawnnak in a ka kaipi i Pathian sinin vancung khin a rung ṭummi, a thiangmi Jerusalem khualipi kha a ka hmuhsak. 11 Cu khua cu Pathian sunparnak in a cer. Lung mansung bik bantuk in a tleu, jasper lungvar bantuk a si i crystal lungvar bantuk in a fim. 12 A ngan ngaingai i a sang ngaingaimi khua kulhnak vanpang pakhat a ngei i kutka 12 a um. Kutka ah vancungmi 12 an um i kutka cung ah Israel phun 12 min aa ṭial. 13 Nichuahlei ah kutka pathum, chaklei ah kutka pathum, thlanglei ah kutka pathum, nitlaklei ah kutka pathum an um. 14 Khua kulhnak vanpang cu lung 12 cung ah a hram bunh a si. Cu lung cung ah cun min 12 aa ṭial, mah cu Tuufa lamkaltu 12 i an min a si.

15 A ka chawntu nih khualipi, a kutka le khua kulhnak vanpang tahnak caah sui phaikung pakhat aa put. 16 Khuapi cu tungvang palh a si i a tung le a vang cu an i can. Khuapi cu phaikung in a tah tikah stadia 12,000* a si; a tung, a vang le a san cu an i can dih. 17 Khua kulhnak vanpang zong a tah i minung tahnak in dong 144* a si, vancungmi zong nih mah tahnak kha an hman. 18 Vanpang cu jasper lungvar in sak a si, khualipi cu sui thiang bantuk a si i thlalang bantuk in a fim. 19 Khua kulhnak vanpang a hram cu lung mansung a phunphun in ṭamh a si: pakhatnak lung cu jasper lungvar, pahnihnak cu safaiar lungvar, pathumnak cu chalsidoni lungvar, palinak cu emaral lungvar, 20 panganak cu sardonis lungvar, paruknak cu sardius lungvar, pasarihnak cu krisolite lungvar, pariatnak cu beril lungvar, pakuanak cu topaz lungvar, pahranak cu krisoprase lungvar, hleikhatnak cu hyacinth lungvar, hleihnihnak cu ametist lungvar an si. 21 Cun kutka 12 cu tikep lungvar 12 in ser a si i kutka pakhat ah tikep lungvar pakhat cio a um. Khuapi chung i lam cu sui thiang in ser a si i thlalang bantuk in a thlam a lang.

22 Khuapi chung ah biakinn ka hmu lo, zeicahtiah khuapi biakinn cu A Ṭhawng Bik Jehovah* Pathian le Tuufa kha an si. 23 Khuapi nih cun nika ceunak siseh, thlapa ceunak siseh a herh lo. Zeicahtiah Pathian sunparnak nih khuapi cu a ceuh i Tuufa cu a meiinn a si. 24 Miphun hna cu khuapi ceunak thawng in an tlongleng lai, vawleicung siangpahrang hna nih an sunparnak cu khuapi chung ah an luhpi lai. 25 Cuka ah zan a um lo i chun lawng a um caah kutka hna cu zeitik hmanh ah khar an si lai lo. 26 Miphun hna an sunparnak le thangṭhatnak cu khuapi chung ah luhpi a si lai. 27 Asinain a thurhnawmmi thil siseh, fihnungmi thil a tuahmi le lih a chimmi si hna seh ahohmanh khuapi chung ah an lut kho lai lo; Tuufa nunnak cazual ah an min ṭial a simi lawng an lut kho lai.