Marka

8 Cu caan ah cun mibupi cu an rak chuak ṭhan. Ei awk zeihmanh an ngeih lo caah Jesuh nih a zultu pawl kha a auh hna i, 2 “Hi mibu hi ka zaang an fak, nithum chung ka sinah an um cang i ei awk an ngei ti lo. 3 Rawl ṭam buin ka tlunter hna ahcun lampi ah an buhri sual lai, a cheu cu lam hlapi in a rami an si” tiah a ti. 4 Asinain a zultu pawl nih “Mi hi vialte khim lakin ei dingmi rawl cu hi hmunking ah hin khoika ah dah kan lak lai?” tiah an ti. 5 Jesuh nih “Changreu hlum zeizat dah nan ngeih?” tiah a hal hna tikah “Hlum sarih” tiah an ti. 6 Mah tikah mibu kha vawlei ah a ṭhutter hna. Cun changreu hlum sarih kha a lak i lunglawmhnak thla a cam hnuah a cheu i a zultu pawl kha a pek hna. A zultu pawl nih mibu kha an phawt hna. 7 Mah leng ah nga hme tete tlawmpal zong an ngeih caah lunglawmhnak thla a cam hnuah a phawtter hna. 8 Khim tein an ei dih hnuah a hleimi kha an khawmh tikah sei ngan pasarih a khat. 9 Cuka ah pa 4,000 hrawng an um. Mah hnuah mibu kha inn ah a ṭinter hna.

10 Jesuh zong a zultu hna he lawng cung ah an kai colh i Dalmanutha peng ah an phan. 11 Farasi mi pawl an rak phan i Jesuh kha bia an al. Amah kha hneksak duh ah van in a rami khuaruahhar thil pakhat in hmuhsak awkah an hal. 12 Jesuh cu a thaw fakpi in a chuah i “Tuchan mi nih zeicah khuaruahhar thil kha hmuh nan duh? Biatak kaan chimh hna lai, tuchan mi nih zei bantuk khuaruahhar thil hmanh nan hmu lai lo” tiah a ti hna. 13 An sinin a chuah hnuah lawng aa cit i tiva ral lei ah a kal ṭhan.

14 A zultu pawl nih changreu phorh an philh caah lawng cung ah changreu pakhat lawng an ngei. 15 Jesuh nih “Nan mit fim tein chia u law Farasi mi thilnu le Herod thilnu kha i ralring u” tiah ralrin a pek hna. 16 A zultu pawl cu changreu an ngeih lonak kong he aa tlaiin pakhat le pakhat bia an i al. 17 Mah kha Jesuh nih a hngalh tikah “Changreu nan i ken lonak kong cu zeicah nan i ceih? Atu tiang nan hngal rih lo maw, nan theithiam rih lo maw, nan i fiang rih lo maw? 18 ‘Mit nan ngei ko nain nan hmu lo maw? Hna nan ngei ko nain nan thei lo maw?’ 19 Changreu hlum nga kha pa 5,000 ka dangh hna lioah a hleimi kha sei zeizat dah khat lakin nan khawmh, nan i cinken lo maw?” tiah a hal hna tikah “Sei hleihnih” tiah an leh. 20 “Changreu hlum sarih kha pa 4,000 ka dangh hna lioah tah a hleimi kha sei zeizat dah khat lakin nan khawmh?” tiah a hal hna tikah “Sei sarih” tiah an leh. 21 Mah tikah Jesuh nih “Ka chim duhmi hi atu tiang nan hngalthiam rih lo hi ta” tiah a ti hna.

22 Bethsaida khua a phanh tikah mi nih a mit a cawmi pa pakhat kha Jesuh sinah an ratpi i damter ding in an nawl. 23 Jesuh nih mitcaw pa cu a kut in a hruai i khua leng ah a chuahpi. A mit ah a cil a chak hnuah a cung ah a kut a chuan i “Pakhatkhat na hmu maw?” tiah a hal. 24 Mah pa nih khua a hun zoh i “Mi kha ka hmuh hna, asinain thingkung lam a kalmi an lo” tiah a ti. 25 Jesuh nih a mit kha a tawngh ṭhan tikah khua a hun hmu kho i zeizong vialte kha fiang tein a hmuh. 26 A inn ah a ṭinter, asinain “Khua chung ah va lut rih hlah” tiah a ti.

27 Sisaria Filipi peng ah a ummi khuate lei an kalnak lam ah Jesuh nih a zultu hna kha “Mi nih ahodah a si, an ka ti?” tiah a hal hna. 28 “A cheu nih Tipil Petu Johan a si an in ti, a cheu nih Elijah a si, a cheu nih profet pakhatkhat a si an in ti” tiah an leh. 29 “Nannih tah ahodah a si, nan ka ti?” tiah a hal hna i Peter nih “Nang cu Khrih na si” tiah a leh. 30 Mah tikah a kong kha aho sin hmanh ah chim lo ding in fakpi in a thlauh hna. 31 Cun mi Fapa cu harnak tampi a ton lainak kong, Judah mi hruaitu hna, tlangbawi upa hna le phungbia cawnpiaktu hna nih an hlawt lainak kong le thah a si in nithum hnuah a thawh ṭhan lainak kong kha a zultu pawl a chimh hna. 32 Cuticun hlangfang tein a chimh hna. Asinain Peter nih Jesuh cu a dang tein a hei kalpi i a mawhchiat. 33 Jesuh cu aa mer i a zultu pawl kha a zoh hna. Cun Peter kha “Satan, chuak tuah!* Pathian ruah ning in si loin minung ruah ning in na ruah” tiah a sik.

34 Jesuh nih mibu le a zultu pawl kha a auh hna i “Ka hnu zulh a ka duhmi paoh nih cun mahle mah an i hlawt a hau lai. Hremnak tung* i put in ka hnu an ka zulh peng a hau lai. 35 A nunnak khamh a duhmi cu a nunnak a sung lai, asinain keimah ruang le thawngṭha ruang ah a nunnak a sungmi tu cu a nung ṭhan lai. 36 Mi pakhat nih vawlei pumpi hi ngei ko hmanh seh law a nunnak a sungh ahcun zeidah a ṭhahnem lai? 37 A nunnak cu zei in dah a cawk khawh lai? 38 Mi zuangzam* le misual mi chan chung in mi pakhatkhat cu keimah le ka bia ruang ah a ning a zah ahcun mi Fapa zong nih ka Pa sunparnak in a thiangmi vancungmi hna he ka rat tikah ka zahpi ve lai” tiah a ti.