Peter Pakhatnak

4 Khrih nih taksa pum in sifah harnak kha a in cang. Nannih zong Khrih lungput ngeih awkah timhcia tein um u.* Zeicahtiah taksa pum in sifah harnak a ing cangmi nih cun sualnak kha a tuah ti lo. 2 Cucaah a nun chung ah minung duhnak ning in si loin Pathian duhnak ning in a nung. 3 A hlanah vawlei mi hna duhnak ning in nan rak tuahmi cu a za cang. Cu lioah cun zah hngal loin thil tuahnak,* a ṭhalomi duhnak i sum khawh lonak, zu tam tuk dinnak, aukhuang cercur in puai tuahnak, zudin i zuamnak le fihnungmi siasal biaknak hna kha nan rak tuah. 4 A ṭhalomi an nunning nan zulh ti lonak a ruang kha an hngalhthiam lo caah nan kong kha a chiatnaklei in an chim. 5 Asinain annih nih a thimi he, a nungmi he biaceih awkah timhcia a simi Khrih sinah an kong an i chim te lai. 6 Cu ruang ah cun pei mithi hna sin zong ah thawngṭha cu phuan a si cu. Annih cu minung hmuhnak in lenglei zoh in biaceih an si. Asinain Pathian hmuhnak in cun thlarau lamhruainak thawng in nunnak an hmu kho.

7 Zeizong vialte donghnak cu a nai cang. Cucaah thleidan khawhnak ngei u law thlacam awkah timhcia* tein um peng u. 8 A hleiin pakhat le pakhat lungtak tein i daw u. Zeicahtiah dawtnak nih cun sualnak tampi kha a khuh khawh. 9 Cun phunzai loin pakhat le pakhat cung ah khual dawtnak langhter u. 10 Nannih cu lam a phunphun in langhtermi Pathian velngeihnak a hmumi zohkhenhtu ṭha nan si. Cucaah pakhat cio nih nan hmuhmi laksawng kha pakhat le pakhat i bawmhnak caah hmang u. 11 Pakhatkhat nih biachim khawhnak a ngeih ahcun Pathian sinin a rami bia kha chim ko seh; midang bawmh khawhnak a ngeih ahcun Pathian pekmi ṭhawnnak in bawm ko hna seh; cuticun Jesuh Khrih thawng in zeizong vialte ah Pathian cu sunparnak a hmu lai. Sunparnak le ṭhawnnak cu zungzal in zungzal tiang Pathian ta a si. Amen.

12 Ka dawtle hna, mei bantuk a simi hneksaknak nan ton tikah aa phundangmi thil kan tong tiin khuaruahhar in um hlah u. 13 Mah canah Khrih nih a inmi sifah harnak nan i hrawmmi a si caah i lawm ko u. Cuticun Khrih sunparnak a langh tikah nannih zong lawmhnak in nan khat lai. 14 Khrih min ruang ah serhsat nan si ahcun mi lunglawm nan si. Zeicahtiah Pathian thiang thlarau sunparnak cu nan cung ah a um caah a si.

15 Asinain lainawn, fir, thil ṭhalo tuah le midang kong ah i thlak ruang ah harnak a tongmi si hlah u. 16 Khrihfa si ruang ah pakhatkhat nih temhnak a in ahcun a ningzak hlah seh. Khrihfa min he aa tlak in a nunnak thawng in Pathian kha sunparnak pe peng ko seh. 17 Biaceihnak caan cu aa thawk cang. Pathian innchungkhar mi hna cu biaceih hmasa an si lai. Kannih cu biaceih hmasa kan si ahcun Pathian thawngṭha a ngai duh lomi hna cu zeitindah an si te hnga? 18 “Miding mi hna ca hmanh ah khamhnak hmuh a har ahcun Pathian zei i a rel lomi le misual mi hna cu zeidah an hei lawh te hnga?” 19 Cucaah Pathian duhnak tuah ruang ah harnak a ingmi hna nih ṭhatnak an tuah buin zumhawk a tlakmi Sertu sinah anmahle anmah i pechan ko hna seh.