Johan sin pekmi Biathlam

2 “Efesa Khrihfabu i lamkal sinah hitin ṭial tuah: A orhlei kut in arfi pasarih aa put i sui mei vannak tung pasarih lakah aa chawkmi nih hitin a ti: 2 ‘Na tuahsernak, naa zuamnak le na inkhawhnak kha ka hngalh. Miṭhalo na in khawh lomi hna le lamkaltu an si lo nain kan si tiah aa timi kha na hneksak hna i mi lihchim an si kha na langhtermi zong ka hngalh. 3 Inkhawhnak na langhter, ka min ruang ah harnak tampi na in i na lung a dong lo. 4 Asinain mawhchiat awk pakhat kaan ngei, a hmasa i na rak ngeihmi dawtnak kha na ngei ti lo.

5 “‘Cucaah zeitluk in dah na ṭumchuk kha i cinken law i ngaichih. A hmasa i na rak tuah tawnmi kha tuah ṭhan. Cutin a si lo ahcun na sinah ka ra lai. Naa ngaihchih lo ahcun na mei vannak tung kha a umnak hmun in ka ṭhial lai. 6 Asinain na ṭhatnak pakhat cu ka huatmi Nikolas phu hna tuahsernak na huat vemi hi a si. 7 Khrihfabu hna sinah thiang thlarau chimmi kha hna a ngeimi nih thei ko hna seh: Teitu a simi cu Pathian paradis chung ah a ummi nunnak thingkung i a thei kha einak nawl ka pek lai.’

8 “Samarna Khrihfabu i lamkal sinah hitin ṭial tuah: ‘Hmasa Bik le Hmanung Bik’ a simi, a rak thi nain a nung ṭhanmi nih hitin a ti: 9 ‘Na harnak le na sifahnak kha ka hngalh, asinain na rum ko. Judah mi an si lo nain anmahle anmah Judah mi kan si tiah aa timi hna nih an in thangchiatmi zong ka hngalh. Annih cu Satan ta a simi phu an si. 10 Na in laimi sifah harnak kha ṭih hlah. Zoh hmanh! Satan nih nan lak i cheukhat kha thong ah a thlak lengmang hna lai. Cuticun tling tein hneksak nan si lai i sifah harnak kha nihra chung nan in lai. Thih tiang in zumhawktlak tein um law nunnak bawiluchin kha kaan pek lai. 11 Khrihfabu hna sinah thiang thlarau chimmi kha hna a ngeimi nih thei ko hna seh: Teitu a simi cu thih voihnihnak a tong hrimhrim lai lo.’

12 “Pergamum Khrihfabu i lamkal sinah hitin ṭial tuah: Kaphnih haar vainam sau a ngeimi nih hitin a ti: 13 ‘Na umnak hmun kha ka hngalh, mah cu Satan bawiṭhutdan a umnak hmun kha a si. Asinain ka min kha fek tein naa tlaih peng. Satan umnak, na umnak hmun ah thah a simi zumhawktlak ka tehte Antipas chan lio hmanh ah ka cung i na zumhnak kha na hlaw lo ti zong ka hngalh.

14 “‘Asinain mawhchiat awk tlawmpal kaan ngei, nan lakah Balaam cawnpiaknak a zulmi cheukhat an um. Balaam nih siasal sin pekchanhmi rawl ei awk le nupa sualnak* tuah awkah Israel mi kha leem ding in Balak cu a rak cawnpiak. 15 Cu bantuk in nan lakah Nikolas phu cawnpiaknak a zulmi zong an um. 16 Cucaah i ngaichih u. Cutin a si lo ahcun na sinah khulrang in ka ra lai. Ka kaa in a chuakmi vainam sau in annih cu ka doh hna lai.

17 “‘Khrihfabu hna sinah thiang thlarau chimmi kha hna a ngeimi nih thei ko hna seh: Teitu a simi cu thuhmi manna changreu tlawmpal ka pek lai. Lungraang pakhat zong ka pek lai. Lungraang cung ah a cotu dah ti lo nih cun ahohmanh nih hngalh lomi min thar pakhat aa ṭial.’

18 “Tiatira Khrihfabu i lamkal sinah hitin ṭial tuah: A mit cu mei alh bantuk a si i a ke cu dar sen bantuk in a tleumi Pathian Fapa nih hitin a ti: 19 ‘Na tuahsernak, na dawtnak, na zumhnak, Pathian rian na ṭuannak le na inkhawhnak kha ka hngalh. Atu i na tuahmi cu a hmasa i na rak tuahmi nakin a ṭha deuh ti zong ka hngalh.

20 “‘Asinain mawhchiat awk pakhat kaan ngei, amahle amah profet tiah aa timi Jezebel kha na in sawhsawh ko. Anih nih ka salle kha nupa sualnak* tuah awk le siasal sin pekchanhmi rawl ei awkah a cawnpiak hna i lam a pialter hna. 21 I ngaihchih awkah caan ka pek nain nupa sualnak* tuahnak in i ngaihchih duhnak a ngei lo. 22 Amah cu ka zawtter lai i ihkhun ah ka rilhter lai. Amah he a zuangzammi hna zong amah bantuk in thil an tuahmi kha an i ngaihchih lo ahcun fakpi in harnak ka tonter hna lai. 23 A fale zong thihnak a chuahtermi rai in ka thah hna lai. Kei cu a thuk bikmi ruahnak* le lungthin a dothlattu ka si kha Khrihfabu dihlak nih an hngalh lai. Pakhat cio kha nan tuahsernak ning in kaan cham hna lai.

24 “‘Asinain Jezebel cawnpiaknak a zul lo i “Satan biathli” tiah timi a hngal lomi, Tiatira khua i a taangmi nan sinah hihi chim ka duh: Nan cung ah a dang thilrit khinh ka duh lo. 25 Atu i nan ngeihmi thilṭha kha ka rat tiang fek tein i tlaih u. 26 A dongh tiang ka lam a zul i teitu a simi cu miphun hna cung ah nawlngeihnak ka pek lai. 27 Ka Pa sinin ka hmuhmi nawlngeihnak phun kha a si. Anih nih mi kha thir fung in a uk hna lai. Mi cu tlak um bantuk in an kuai dih cikcek lai. 28 Cun amah cu deirel arfi ka pek lai. 29 Khrihfabu hna sinah thiang thlarau chimmi kha hna a ngeimi nih thei ko hna seh.’