Luka

1 Upatmi Theofilas, lungthin dihlak in kan zumhmi a konglam hna kha mi tampi nih ṭial an rak i zuam cio. 2 An ṭialmi kong hna cu an mit in a hmu taktakmi hna le Pathian bia a chimtu hna sinin kan theihmi a kong hna he aa tlak. 3 Kei zong nih mah a konglam vialte kha a hramthawk tein a dikthliar in ka hlathlai dih caah na sinah aa tlai thliahmah tein rak ṭial awkah bia ka khiah. 4 Mah lawng ah an rak in cawnpiak cangmi a konglam hna cu a hmaan hrimhrim ti kha na hngalh lai.

5 Judea siangpahrang Herod* chan ah Abijah phu chung ah Zekhariah tiah auhmi tlangbawi pakhat a um. A nupi cu Aaron hrinsor a si i a min cu Elizabeth a si. 6 An pahnih in Pathian hmaiah miding an si. Jehovah* nawlbia le phunglam vialte kha soi awk um loin a zulmi an si. 7 Asinain Elizabeth cu a cing i fa an ngei lo, an pahnih in an tar ngaingai cang.

8 Zekhariah cu anmah phu ṭuan caan a si caah Pathian hmaiah tlangbawi rian a ṭuan. 9 Tlangbawi hna nih an tuah tawn ning in rimhmui khangh awkah camcawhfung a zuh caah Jehovah* biakinn chung ah a lut. 10 Rimhmui khangh lioah mizapi cu biakinn leng ah thla an cam. 11 Jehovah* vancungmi cu a sinah a lang i rimhmui khanghnak biakṭheng orhlei kam ah a dir. 12 Zekhariah nih a hmuh tikah a lau i a ṭih tuk. 13 Asinain vancungmi nih “Zekhariah, ṭih hlah. Thla na cammi kha Pathian nih a theih cang. Na nupi Elizabeth nih fapa aan hrinpiak lai i Johan tiah min na sak lai. 14 A chuah tikah naa lawm tuk lai i mi tampi zong an i lawm tuk ve lai. 15 Zeicahtiah amah cu Jehovah* hmaiah mingan a si lai. A nu paw chung a um lio hmanh ah thiang thlarau in a khat lai. Mitsur zu siseh, zu siseh a ding lai lo. 16 Cun Israel mi tampi kha an Pathian Jehovah* sinah a kirpi hna lai. 17 Mah leng ah Elijah bantuk lungput le ṭhawnnak he hmaiah a kal lai. Pale lungthin kha fale lungthin bantuk a si nakhnga a thlen lai,* nawlngai lomi kha miding mi bantuk in fimnak he thil an tuah nakhnga a bawmh hna lai. Cuticun mi kha Jehovah* caah timhcia in a ummi miphun a siter hna lai” tiah a ti.

18 Zekhariah nih “Mah cu zeitindah a si khawh lai? Kei cu ka tar cang i ka nupi zong a upa cang” tiah a ti. 19 Vancungmi nih “Kei cu Pathian hmaiah a dirmi Gabriel ka si, nangmah sinah hi thawngṭha hi chim ding in Pathian nih a ka thlahmi ka si. 20 Asinain a caan a cut tikah a tling dingmi hi bia hna hi na zumh lo caah ka chimmi bia a tlin hlan tiang na holh kho lai lo i bia na chim kho lai lo” tiah a ti. 21 Mah lioah mizapi nih Zekhariah kha a leng in an hngah, biakinn chung ah sau tuk a rauh caah an khuaruah a har. 22 A hun chuah tikah bia a chim khawh ti lo caah biakinn chung ah langhnak a hmuh ti kha an hngalh. Zekhariah nih bia a chim khawh lo caah kut zaoh in a chawnh hna. 23 Biakinn ah rian a ṭuan caan aa liim tikah Zekhariah cu a inn ah a ṭin.

24 Tlawmpal ah a nupi Elizabeth cu nau a pawi i thla nga chung innchung ah aa erh. 25 “Atu cu Jehovah* nih a ka zaangfah cang. Mi hmai i ka ningzahnak kha lakpiak awkah a ka hngalh cang” tiah a ti.

26 Nau a pawi in a thlaruknak ah Pathian nih vancungmi Gabriel kha Galili ram, Nazareth khua ah a ummi, 27 Mary tiah auhmi ngaknu thiang sinah a thlah. Mary cu David hrinsor a simi Josef he aa hammi an si. 28 Vancungmi cu Mary sinah a ra i “Na cung ah daihnak um ko seh! Pathian mithmai ṭha a hmumi nu, Jehovah* cu na sinah a um” tiah a ti. 29 Mary cu mah bia nih a lung a tuai i a bia cu zei sullam dah a si hnga tiah a ruat. 30 Vancungmi nih “Mary, na thinphang hlah. Nang cu Pathian mithmai ṭha a hmumi na si. 31 Fa na pawi lai i fapa na hrin lai, a min ah Jesuh tiah na sak lai. 32 Amah cu mi lianngan a si lai i Cung Nung Bik Fapa tiah auh a si lai. A pa David bawiṭhutdan kha Jehovah* Pathian nih a pek lai. 33 Jakob tefa kha zungzal in a uk hna lai, a Pennak cu a dong lai lo” tiah a ti.

34 Asinain Mary nih vancungmi kha “Mah cu zeitindah a si khawh lai? Kei cu ngaknu thiang ka si” tiah a ti. 35 Vancungmi nih “Thiang thlarau cu na cung ah a phan lai i Cung Nung Bik ṭhawnnak nih aan khuh lai. Cucaah a chuak dingmi naute cu a thiangmi, Pathian Fapa tiah auh a si lai. 36 A cing tiah an timi na rualchan Elizabeth zong a tar cang ko nain fapa a pawi i atu hi a thlaruknak a si cang; 37 Pathian bia cu tlin loin a um lai lo” tiah a ti. 38 Mah tikah Mary nih “Kei cu Jehovah* salnu ka si ko! Na chim ning in ka cung ah tlung ko seh” tiah a ti. Cun vancungmi nih cun a kaltak.

39 Mah tikah Mary cu tlangram ah a ummi Judah khua pakhat ah khulrang in khualtlawn aa thawh. 40 Zekhariah inn ah a lut i Elizabeth kha a chawnh. 41 Mary aw kha Elizabeth nih a theih tikah a paw chung i naute cu a hung cawl. Elizabeth cu thiang thlarau in a khat i, 42 lunglawm thanuam tein “Nang cu nu hna lakah thluachuakmi na si, na paw chung i naute zong thluachuakmi a si. 43 Ka Bawipa nu nih na rak ka lenmi cu ka caah a sunglawi tuk. 44 Zoh hmanh! Na ka chawnhmi ka theihle cangka ka paw chung i naute cu aa lawm tuk i a cawl len ko. 45 Jehovah* Pathian chimmi bia cu a tlin hrimhrim lai caah mah bia a zummi nu cu lunglawmmi a si” tiah a ti.

46 Mah tikah Mary nih “Jehovah* Pathian kha ka thangṭhat, 47 a ka Khamhtu Pathian ruang ah ka lungthin cu lawmhnak in a khat. 48 Pathian nih a salnu i a nautami ka sining kha a hmuh cang. Atu thawk in hmailei chan vialte nih lunglawmmi nu tiah an ka auh cang lai. 49 A ṭhawngmi Pathian nih ka caah thil lianngan a tuah, a min cu a thiang. 50 Pathian nih amah a ṭihmi hna cung ah chan khat hnu chan khat in zaangfahnak a langhter. 51 A ban in ṭhawnnak a langhter; porhlawtnak lungthin he khua a khangmi hna kha cu a ṭhek hna. 52 Bawi pawl kha an bawiṭhutdan cung in a ṭhumh hna i mi nauta kha a cawisan hna. 53 Rawlṭam mi kha thilṭha in a khimter hna i mirum mi kha kut ro in a thlah hna. 54 Pathian nih pupa hna sinah a rak chimmi ning in a sal Israel miphun kha a bawmh hna. 55 Abraham le a tefa cung ah zaangfahnak ka langhter zungzal lai tiah bia a rak i kam bantuk in a biakam a philh lo kha a langhter ko” tiah a ti. 56 Mary cu Elizabeth sinah thla thum chung a um hnuah a inn ah a tlung.

57 Elizabeth cu a nithla a hung tling i fapa a hrin. 58 Jehovah* nih Elizabeth cung ah a hleiin zaangfahnak a langhter ti kha innpa le rualchan pawl nih an theih tikah an lawmhpi tuk. 59 A niriatnak ni ah ngakchia kha a cuarpar tanpiak awkah an ra, cun ngakchia kha a pa min in Zekhariah tiah sak an timh. 60 Asinain Elizabeth nih “A si lo! Johan tiah auh a si lai” tiah a ti tikah, 61 annih nih “Nan rualchan lakah cu bantuk min a ngeimi cu an um ṭung lo” tiah an ti. 62 Cucaah a pa kha zei min dah sak na duh tiah kut zaoh in an hal. 63 Caṭialnak kha a hal hna i “A min cu Johan a si” tiah a ṭial tikah an dihlak in an khuaruah a har tuk. 64 Cu caan te ah cun bia a chim ṭhan khawh caah Pathian kha a thangṭhat. 65 An pawngkam i a ummi vialte cu ṭihnak in an khat. Judah tlangram ah a ummi vialte nih mah kong kha an i ceih. 66 Mah kong a theimi vialte kha an lung a suk hna i “Mah fa hi zei bantuk mi dah a si te hnga?” tiah an ti. Jehovah* kut cu ngakchia cung ah a um.

67 A pa Zekhariah cu thiang thlarau in a khat i hitin a chimchung: 68 “Israel mi hna Pathian, Jehovah* kha thangṭhat u, a miphun kha a zaangfah hna caah a luatter cang hna. 69 Kan caah a ṭhawngmi khamhtu* kha a sal David tefa chung in a chuahter cang. 70 Hlanlio a thiangmi a profet hna sinin a rak chim bantuk in, 71 kan ral hna le a kan huatu hna kut in a kan khamh cang; 72 mah cu kan pupa hna cung ah zaangfahnak a langhtermi a si i a thiangmi a biakamnak zong a philh lo ti kha a langhtermi a si. 73 Mah biakamnak cu kan pupa Abraham sinah Pathian nih chiatserh in bia a rak i kammi a si. 74 Mah chiatserhnak ning in kan ral hna kut in a kan khamh hnuah Pathian nih amah kha ralṭha tein biaknak tinvo sung a kan pek lai. 75 Cucaah kannih cu a hmaiah a zungzal in zumhawktlak tein le ding tein kan um kho lai. 76 Asinain ka fapa, nang tu cu Cung Nung Bik i profet tiah auh na si lai. Jehovah* a lam timhtuah awkah hmaiah na kal chung lai. 77 A miphun kha an sualnak ngaihthiamnak thawng in khamhnak an hmu lai timi bia kha na hngalhter hna lai. 78 Mah cu Pathian zaangfahnak thawng in a si. Cunglei in a rami mah zaangfahnak cu zinglei niceu bantuk in kan cung ah a tlang lai. 79 Muihnak le thihnak thladem tang ah a ṭhumi hna kha ceunak a pek hna lai i daihnak lam ah a kan hruai lai.”

80 Mah ngakchiapa cu a ṭhang i patling a hung si, Israel mi sinah phungchim caan a phanh hlan tiang ramcar ah cun a um ko.