Johan sin pekmi Biathlam

1 Pathian nih a rauhhlan ah a cang dingmi thil kha a salle sin phuan awkah Jesuh Khrih kha biathlam* a pek. Jesuh nih Pathian* sal Johan sinah vancungmi kha a thlah i mah biathlam cu hmelchunhnak in a chimh. 2 Johan nih Pathian pekmi bia le Jesuh Khrih tehte khaannak le a hmuhmi thil vialte kha tehte a khaan. 3 Hi profet bia thangpi in a relmi, a ngaimi le a chung i aa ṭialmi vialte a zulmi cu mi lunglawm an si, zeicahtiah rikhiahmi caan cu a nai cang.

4 Keimah Johan nih Asia peng ah a ummi Khrihfabu pasarih sinah cakuat ka rak ṭial:

“Hlanlio ah le atu ah le hmailei tiang zungzal in a ummi Pathian” le a bawiṭhutdan hmaiah a ummi thlarau pasarih sinin velngeihnak le daihnak hmu ko u. 5 “Zumhawktlakmi Tehte,” “thihnak in a tho hmasa bikmi fater” le “vawleicung siangpahrang hna Uktu” Jesuh Khrih sin zong in velngeihnak le daihnak hmu ko u.

A kan dawtu le a thisen in kan sualnak in a kan luattertu, 6 a Pathian le a Pa caah siangpahrang le tlangbawi ah a kan sertu Jesuh cu sunparnak le ṭhawnnak zungzal in hmu ko seh. Amen.

7 Zoh hmanh! Jesuh cu khuadawm he a ra lai. Amah a chuntu hna i telin mi vialte nih an hmuh lai. Vawleicung miphun vialte cu amah ruang ah ngaihchia ngai in an ṭang an i cum lai. Cutin a si hrimhrim lai. Amen.

8 Jehovah* Pathian nih “Keimah cu Alfa le Omega ka si.* Hlanlio ah le atu ah le hmailei tiang zungzal in a ummi A Ṭhawng Bik ka si” tiah a ti.

9 Jesuh zultu in nanmah he harnak a ing vemi, siangpahrang a si dingmi le inkhawhnak a ngeimi nan unau, keimah Johan cu Pathian kong ka chim ruang le Jesuh kong tehte ka khaan ruang ah Patmos tikulh ah ka phan. 10 Thiang thlarau in ka khat i Bawipa ni ah ka phan. Ka hnulei in muko tum thawng bantuk aw thangpi pakhat kha ka theih. 11 “Na hmuhmi kha cazual ah ṭial law Khrihfabu pasarih: Efesa, Samarna, Pergamum, Tiatira, Sardis, Filadelfia le Laodisia ah kua hna” tiah a ka ti.

12 A ka chawntu kha zoh awkah ka hun i mer tikah sui mei vannak tung pasarih kha ka hmuh. 13 Mei vannak tung hna lakah mi fapa he aa lomi mi pakhat a um. A ke tiang a phiakmi angki fual kha aa hruk i a ṭang ah sui ṭangmenh kha aa menh. 14 A sam cu tuuhmul le hawhra bantuk in a raang i a mit cu mei bantuk in a alh. 15 A ke cu meiphu ah an tit i a tleumi dar sen bantuk a si. A aw cu tisor nganpi thawng bantuk a si. 16 A orhlei kut ah arfi pasarih a um i a kaa in kaphnih haar vainam sau a chuak. A hmai cu chun laicer i a ceumi nika bantuk a si. 17 Amah cu ka hmuh tikah mithi bantuk in a kehram ah ka tlu.

A orhlei kut in a ka tawngh i hitin a ka ti: “Ṭih hlah. Keimah cu Hmasa Bik le Hmanung Bik ka si. 18 A nungmi ka si. Ka rak thi, asinain atu cu zungzal in zungzal tiang ka nung cang. Thihnak tawh le Thlan* tawh zong ka ngei. 19 Cucaah na rak hmuhmi thil, atu na hmuh liomi thil le na hmuh laimi thil kha ṭial hna. 20 Ka orhlei kut ah na hmuhmi arfi pasarih le sui mei vannak tung pasarih cu a thiangmi biathli an si i a sullam cu hihi a si: Arfi pasarih nih Khrihfabu pasarih i lamkal hna kha a aiawh i mei vannak tung pasarih nih Khrihfabu pasarih kha a aiawh.