Jeim
3 Unau hna, nan lak i tam deuh cu cawnpiaktu nan si awk a si lo. Zeicahtiah cawnpiaktu kan si ahcun fak deuh in biaceih kan si lai. 2 Kan dihlak in voi tampi palhnak kan tuah tawn. A biachim a palh bal lomi cu mitling a si i a pum dihlak aa uk khomi a si. 3 Rang nih kan nawl a ngaih nakhnga chak kan hlomh ahcun a pum ning in kan hruai khawh. 4 Tilawng nganpipi zong thli nih fakpi in a hranh i a choih tikah tilawng mawngtu nih lawng zahnak hmete in a duhnak lei paoh ah a mer khawh.
5 Cu bantuk in lei cu pum ṭengnge hmete a si ko nain aa porhlaw tuk tawn. Meici hmete nih tupi nganpi kha a kangh khawh dih! 6 Lei cu mei bantuk a si. Kan pum ṭengnge lakah lei cu ṭhatlonak in a khat i kan pum dihlak kha a thurter. Kan nunnak hi a dihlak in a kangh khawh. Gehenna* bantuk in rawhralnak a chuahter. 7 Minung nih sahrang, va, a lawn in a lawnmi thilnung le rili chung thilnung a phunphun kha ngam lak in an tuah khawh hna i a tuah zong an tuah taktak hna. 8 Asinain lei cu aho minung hmanh nih an uk kho lo. Lei cu uk khawh lomi thil ṭhalo a si i thihnak siivai in a khat. 9 Lei kha hmang in kan Pa Jehovah* kha kan thangṭhat tawn i cu lei ṭhiamṭhiam in cun “Pathian muikeng” in sermi minung kha chiat kan serh tawn hna. 10 Kaa pakhat in thluachuahnak he, chiatserhnak he an chuak.
Unau hna, cutin a si awk a si lo. 11 Cerhti put pakhat chung in ti-thlum he, ti-kha he an chuakṭi kho maw? 12 Unau hna, theipi kung in oliv thei a tlai kho maw? Mitsur ruang in theipi a tlai kho maw? Ti-al in ti-thlum a chuak kho maw?
13 Nan lakah fimnak le hngalhthiamnak a ngeimi nan um maw? A um ahcun a ṭhami tuahsernak in langhter ko seh. Fimnak nih a chuahtermi nemnak in zeizong vialte kha tuah ko seh. 14 Asinain nan lungthin cu nahchuahnak in a khah ahcun, i sik i al duhnak lungput nan ngeih ahcun mifim kan si tiin i porhlaw hlah u. Biatak ralchanh zong in lih chim hlah u. 15 Mah cu cunglei in a rami fimnak a si lo. Hi vawlei in, pumsa duhnak a zulmi hna sinin le khuachia sinin a rami fimnak a si. 16 Nahchuahnak le i sik i al duhnak lungput a umnak hmun paoh ah ningcang loin umnak le ṭhatlonak phun kip a um.
17 Cunglei in a rami fimnak a ngeimi cu a hmasa bik ah a thiang, cun rualrem tein a um, a tlarimi a si, nawlngaih awkah timhcia a si, zaangfahnak le ziaza ṭha* in a khat, thleidannak le i titernak a ngei lo. 18 Daihnak sertu hna nih daihnak in a khatmi thil sining ah thlaici an tuh i dinnak theipar kha an zun lai.