Matthai

28 Sabbath ni a dih hnu zarh i a nikhatnak ni, khuadeika te ah Mary Magdalin le a dang Mary cu thlan zoh awkah an kal.

2 Cu caan ah cun li fakpi in aa hnin i Jehovah* vancungmi cu van in a rung ṭum. Thlankhar lung nganpi kha a thawn i mah cung ah a ṭhu. 3 A muisam cu nimtlau bantuk in a ceu, a hnipuan cu hawhra bantuk in a raang. 4 Ralvengtu hna cu an ṭih tuk caah a therh hna i mithi bantuk in an um.

5 Vancungmi nih nu pawl kha “Ṭih hlah u, thingtung cung ah thah a simi Jesuh nan kawl ti kha ka hngalh. 6 Anih cu hika ah a um ti lo, a rak chim bantuk in a tho ṭhan cang. Ra u law a ruak an chiahnak hmun hi rak zoh hmanh u. 7 Khulrang in va kal u law a zultu pawl kha thihnak in a tho ṭhan cang i Galili peng ah nan hlanah a kal chung cang tiah va chim hna u. Cuka ah nan hmuh te lai. Mah kong chimh awkah ka ratmi a si” tiah a ti hna.

8 Cucaah nu pawl cu thlan in khulrang in an chuak, an ṭih tuk ko nain a zultu pawl va chimh awkah lunglawm ngai in an tli. 9 Jesuh nih a hmuh hna tikah “Nan cung ah daihnak um ko seh!” tiah a ti hna. Mah tikah Jesuh kha an zuan hnawh i a kehram ah an bawk. 10 Jesuh nih “Ṭih hlah u! Galili ram ah kal ding in ka unau hna kha va chim hna u. Cuka ah an ka hmuh te lai” tiah a ti hna.

11 Mah nu hna an kal lioah ralvengtu cheukhat cu khua chung ah an lut i tlangbawi upa hna kha thil sining vialte cu an va chimh hna. 12 Tlangbawi upa hna nih Judah mi hruaitu pawl he an i ruahceih dih hnuah ralkap pawl kha ngun tangka tampi an phalh hna i, 13 “‘Zan kan i hngilh karah a zultu pawl cu an ra i a ruak kha an fir’ nan ti lai. 14 Cun mah kong hi uktu nih a theih sual ahcun dantat nan si nakhnga lo kan in chimhpiak hna lai” tiah an ti hna. 15 Ralkap pawl nih tangka kha an i lak i an fial hna ning tein an chim. Mah thawngpang cu Judah mi lakah a karh i atu tiang chim a si.

16 Zultu 11 cu Galili ram ah an kal i Jesuh nih a rak chimhmi hna tlang cung ah cun an kai. 17 Jesuh kha an hmuh tikah a hmaiah an kun, asinain a cheu tu cu lungawṭawm in an um. 18 Jesuh nih a hun naih hna i “Vancung le vawleicung i nawlngeihnak vialte cu pek ka si cang. 19 Cucaah miphun vialte sinah va kal u law ka zultu an si nakhnga va cawnpiak hna u. Pa le Fapa le thiang thlarau min in tipilnak va pe hna u. 20 Nawl kaan pekmi vialte hna hi an zulh nakhnga va cawnpiak hna u. Chan dongh* tiang nan sinah a zungzal in ka um lai” tiah a ti hna.