Luka

5 Nikhat cu Genesaret tilikam* ah Jesuh cu a dir i Pathian bia a cawnpiak hna tikah mi nih a bia ngaih awkah an rak but hnawh. 2 Mah tikah tikam ah a dirmi lawng pahnih kha Jesuh nih a hmuh, ngatlaitu hna cu lawng cung in an ṭum i an sur kha an rak ṭawl. 3 Jesuh cu Simon lawng cung ah a kai i tikam in tlawmpal a thawnter. Cun a ṭhu i tilikam ah a ummi mibu kha a cawnpiak hna. 4 A cawnpiak hna hnuah Jesuh nih Simon kha “Ti thuhnak lei ah lawng kha zap law na sur kha hei chep” tiah a ti. 5 Simon nih “Saya, zan khuadei kan i zuam len ko nain nga pakhat hmanh kan tlai lo. Asinain na ka tuahter ning in ka sur cu ka cheh ko lai” tiah a ti. 6 Cun an sur an cheh tikah nga tampi an tlaih i an sur cu tleh dih hnik aa zal. 7 Mah tikah a dang lawng cung i ngatlaitu an hawile kha kut zaoh in an auh hna. An rak bawmh hna tikah lawng pahnih pil dengmang tiang in nga cu khat lakin an tlaih. 8 Mah kha a hmuh tikah Simon Peter cu Jesuh hmaiah a khuk aa bil i “Bawipa, kei cu misual ka si. Rak ka kaltak ko” tiah a ti. 9 Zeicahtiah nga tampi an tlaih caah amah le a sin i a ummi hna cu an khuaruah a har tuk. 10 Simon hawile a simi Zebedi fapa Jeim le Johan zong an khuaruah a har ve. Asinain Jesuh nih Simon kha “Na thinphang ti hlah. Atu thawk in mi tlaitu na si cang lai” tiah a ti. 11 Cucaah an lawng kha tikam ah an chiah hnuah zeizong vialte kaltak in Jesuh hnu kha an zulh.

12 Nikhat cu khua pakhat ah Jesuh cu a rak phan, cuka khua ah a pumpaluk in thinghmui zawtnak nih a tlunhmi pa pakhat a um. Jesuh kha a hmuh tikah a khuk aa bil i “Bawipa, na duh ahcun na ka thianter khawh” tiah a nawl. 13 Jesuh nih a hei banh i a tawngh, cun “Ka duh! Thiang ko” tiah a ti. Chikkhat te ah a thinghmui zawtnak cu a dam i a thiang. 14 Cun Jesuh nih mah kong kha aho sin hmanh ah chim lo ding in nawl a pek, asinain “Na zawtnak a thiang cang ti langhter awkah tlangbawi sinah va kal law va i hmuhsak. Na thian cang caah Moses lamhruainak ning in raithawinak va tuah” tiah a ti. 15 Asinain Jesuh thawngpang cu a karh chin. Mi nih Jesuh chimmi bia ngaih an duh ca le an zawtnak damter an duh caah an rak fuh. 16 Jesuh cu thlacam awkah mi um lonak hmun ah atu le atu a kal tawn.

17 Nikhat cu Jesuh nih a cawnpiak hna lioah Farasi mi* le phungbia cawnpiaktu hna zong cuka ah an ṭhu ve. Annih cu Jerusalem khua in le Galili ram le Judea ram i a ummi khuate hna in a rami an si. Jesuh cu mi pawl damter awkah Jehovah* ṭhawnnak a hmu. 18 Mah lioah mi nih a zengmi pa pakhat kha laang in an rak zawnh. Mizaw kha Jesuh hmaiah phakpi ding in an i zuam. 19 Mi an tam tuk caah Jesuh hmaiah an phakpi kho lo. Cucaah inncung ah an kai, inncung cih kha an hawh i Jesuh hmaiah mizaw kha laang in an vun ṭhumh. 20 An zumhnak kha a hmuh tikah Jesuh nih a zengmi pa kha “Na sualnak cu ngaihthiam na si cang” tiah a ti. 21 Phungbia cawnpiaktu le Farasi mi hna nih “Hi pa hi Pathian serhsat in bia a chim. Pathian dah ti lo cu ahodah sual ngaihthiamnak nawl a ngei?” tiin an ruah. 22 Asinain an ruahmi kha Jesuh nih a hngalh caah “Zeicah cutin nan ruah? 23 ‘Na sualnak cu ngaihthiam na si cang’ ti maw a fawi deuh, ‘Tho law kal tuah’ ti dah a fawi deuh? 24 Mi Fapa cu hi vawlei ah sualnak ngaihthiam khawhnak nawl a ngei ti kha kaan hngalhter hna lai” tiah a ti, cun mizeng pa kha “Kaan chimh lai, Tho, na laang kha i put law inn ah va ṭin” tiah a ti. 25 An hmaiah a dir i laang kha aa put, Pathian thangṭhat pah in inn ah a ṭin. 26 Mizapi cu an khuaruah a har tuk i Pathian sunparnak kha an thangṭhat. “Nihin ah khuaruahhar thil kan hmuh cang” tiah khuaruahhar ngai in an chim.

27 Jesuh cu cuka in a chuah tikah Levi tiah auhmi ngunkhuai kholtu pakhat ngunkhuai kholhnak zung ah a ṭhutmi kha a hmuh. Jesuh nih “Rak ka zul” tiah a ti. 28 Cucaah a tho i zeizong vialte kaltak in a hnu kha a zulh. 29 Mah hnuah Levi nih Jesuh caah inn ah rawl danghnak nganpi a tuahpiak. Rawl a dumṭimi hna lakah ngunkhuai kholtu le midang tampi zong an i tel. 30 Mah tikah Farasi mi le anmah bu chung i phungbia cawnpiaktu hna nih “Ngunkhuai kholtu le misual mi hna he zeicah nan ei, nan dinṭi?” tiah a zultu kha an mawhchiat hna. 31 Jesuh nih “A dammi nih siibawi an herh lo, a zawmi lawng nih an herh. 32 Ka ratmi cu miding mi hna caah a si lo, misual mi hna an i ngaihchih nakhnga caah a si” tiah a ti hna.

33 Mi cheukhat nih “Johan zultu le Farasi mi zultu hna cu atu le atu rawl an ul i thla an cam tawn. Nang na zultu hna cu an ei, an ding ko” tiah Jesuh kha an ti. 34 Jesuh nih “Nupi ṭhi tlangval a um chung ahcun a hawile cu rawl nan ulhter kho hna lai maw? 35 Asinain nupi ṭhi tlangval cu an sinin lak caan a phan te lai, mah tikah rawl an ul ve te ko lai” tiah a ti.

36 Mah hnuah tahchunhnak hna hmang in Jesuh nih hitin a ti: “Thilpuan thar kha thleh in thilpuan hlun ah an belh bal lo, cutin an belh ahcun thilpuan a thar nih a dawh lai i a hlun cu a tlek chinchin ko lai. Cun thilpuan hlun le thilpuan thar cu aa tlak fawn lai lo. 37 Cu bantuk in saphawcua* hlun chung ah mitsur zu thar an rawng bal lo. An rawn ahcun mitsur zu thar ruang ah saphawcua cu a kek lai i mitsur zu zong a zut lai, saphawcua zong a rawk lai. 38 Mitsur zu thar cu saphawcua a thar lawng ah an rawn tawn. 39 Mitsur zu a hlun an din hnu ahcun ahohmanh nih a thar kha an ding duh ti lo. ‘A hlun hi a thaw’ tiah an ti tawn.”