Jeim

4 Nan lakah a ummi i dohnak le i siknak hna cu khoika in dah aa thawk? Nanmah he aa domi nan pumsa duhnak in aa thawkmi a si lo maw? 2 Duhnak nan ngei, asinain nan duhmi cu nan ngei lo. Lai nan nawng i mi nan hngar, asinain nan ngei kho lo. Cucaah nan i si, nan i do. Pathian sinah nan hal lo caah nan ngei kho lo. 3 Nan hal tik zong ah nan hmu hlei lo. Zeicahtiah nan pumsa duhnak caah hman ding in a hmaan lomi tinhnak he nan hal.

4 Mi zuangzam hna, vawlei he i hawikomh cu Pathian he i ral a si ti kha nan hngal lo maw? Vawlei hawikom si a duhmi cu Pathian ral ah aa ser a si ko. 5 “Kan chung ah a ummi nahchuahnak lungput nih zeizong vialte kha a kan duhter peng” tiah cathiang nih a timi hi a sawhsawh ah maw nan ruah? 6 Asinain Pathian pekmi vel cu mah lungput nakin a ṭhawng deuh. “Pathian nih aa porhlawmi cu a doh hna, asinain aa toidormi cu vel a ngeih hna” tiah cathiang nih a ti.

7 Cucaah Pathian tang ah i dor u; Satan kha do u law nan sinin a zam ko lai. 8 Pathian kha naih u law aan naih ve hna lai. Misual mi hna, nan kut kha i thianh u. Lungrep a ngei lomi hna, nan lungthin kha thianter u. 9 Ngaihchia in ṭap u law aihram u. Nihnak kha ṭahnak ah thleng u, lawmhnak kha ngaihchiatnak ah thleng u. 10 Jehovah* hmaiah i toidor u law aan hlorh hna lai.

11 Unau hna, pakhat le pakhat i thangchiat hlah u. A unau a thangchiat i bia a ceihmi cu nawlbia a thangchiat i bia a ceihmi a si. Nawlbia kha bia nan ceih ahcun nawlbia a zultu si loin bia a ceihtu nan si. 12 Nawlbia Petu le Biaceihtu cu pakhat lawng a um. Amah lawnglawng hi mi a khamh khotu le a hrawk khotu a si. Nannih tu cu nan minunghawi biaceih awkah ahodah nan si?

13 “Nihin ah maw, thaizing ah dik khual kan tlawng lai i cuka khua ah kumkhat hrawng kan va um lai. Cun chaw kan let lai i a miak kan hmu lai” tiah a timi hna, ngai tuah u. 14 Thaizing ah nan nunnak cu zeidah a lawh lai ti kha nan hngalh ṭung lo. Nannih cu caan tawite chung a hung chuak i a lo ṭhan colhmi tichum bantuk pei nan si ko cu. 15 Mah canah “Jehovah* duhnak a um ahcun kan nung lai i cucu khakha kan tuah lai” tiah nan ti awk tu a si. 16 Asinain nan ruam a kai i nan i porhlaw. Cu bantuk porhlawtnak cu a ṭhalomi a si. 17 A hmaanmi thil tuah awk a si ti a hngal ko nain a tuah lomi cu misual a si.