Matthai

23 Cun Jesuh nih mibu le a zultu kha hitin a ti hna: 2 “Phungbia cawnpiaktu le Farasi mi hna nih Moses ngeihmi nawlngeihnak bantuk kha an i lak. 3 Cucaah an chimmi vialte kha zul u. Asinain anmah bantuk in va tuah hlah u. A chim lawng an chim i anmah theng nih an tuah lo. 4 Thil kha ritpi in an tom i midang liang cung ah an khinh tawn. Asinain anmah tu nih cun an kutdong hmanh in an tawng duh lo. 5 An tuahmi paoh cu mi hmuh awkah an tuah. Runvennak caah an i khihmi cathiang bia khumhnak bawm kha an nganter i an puan hmum kha an fualter. 6 Rawl danghnak puai i a langhnak bik hmun ah le pumhnak inn i a hmai bik ah ṭhut kha an duh. 7 Chawdawrnak hmun ah upatnak he chawnhbiak kha an duh. Saya* tiin auh kha an duh. 8 Asinain nannih tu cu Saya tiah auh kha va duh hlah u. Saya pakhat lawng nan ngei i nan dihlak in u le nau nan si. 9 Cun vawleicung ah ahohmanh ka pa tiah au hna hlah u, vancung ah a ummi Pa pakhat lawng nan ngei. 10 Hruaitu ti zong in auh kha va duh hlah u. Khrih tiah auhmi Hruaitu pakhat lawng nan ngei. 11 Nan lakah a ngan bikmi cu sinum a si awk a si. 12 Mahle mah aa hlorhmi cu ṭhumh an si lai i mi toi ah aa dormi cu hlorh an si lai.

13 “Mi depde a simi phungbia cawnpiaktu le Farasi mi hna, thil ṭhalo nan tong lai! Nannih nih vancung Pennak kutka kha mi nan kharkanh hna. Nanmah zong nan lut lo i a lut dingmi zong luhnak nawl nan pe hna lo. 14* ——

15 “Mi depde a simi phungbia cawnpiaktu le Farasi mi hna, thil ṭhalo nan tong lai! Nannih nih mi pakhat biaknak aa thlen nakhnga rili le tlang kip nan cul. Biaknak a hun i thlen tikah nanmah nakin a let hnih in Gehenna* ah phanh awk a tlakmi nan siter.

16 “Hruaitu mitcaw hna, thil ṭhalo nan tong lai, ‘Biakinn chalh in chiatserh ahcun san a tlai lo. Biakinn chung ah a ummi sui chalh in chiatserh ahcun chiatserhnak cu san a tlai’ tiah nan ti. 17 Mihrut mitcaw hna! Zei cu dah a biapi deuh? Sui maw asiloah sui pekchanhmi biakinn dah? 18 ‘Biakṭheng chalh in chiatserh ahcun san a tlai lo. Biakṭheng cung i laksawng chalh in chiatserh ahcun chiatserhnak cu san a tlai’ tiah nan chim rih fawn. 19 Mitcaw hna! Zei cu dah a biapi deuh? Laksawng maw asiloah laksawng pekchanhmi biakṭheng dah? 20 Cucaah biakṭheng chalh in chiat an ser tikah biakṭheng le a cung ah a ummi thil vialte chalh in chiat an sermi a si. 21 Biakinn chalh in chiat an ser tikah Biakinn le Biakinn ah a ummi Pathian chalh in chiat an sermi a si. 22 Van chalh in chiat an ser tikah Pathian bawiṭhutdan le bawiṭhutdan cung ah a ṭhumi chalh in chiat an sermi a si.

23 “Mi depde a simi phungbia cawnpiaktu le Farasi mi hna, thil ṭhalo nan tong lai! Puṭinan, mazi, zera kha cheuhra cheukhat cu nan pek nain dinnak, zaangfahnak, zumhfek tein umnak ti bantuk nawlbia nih biapi deuh ah a chiahmi tu kha cu zei ah nan rel lo. Cheuhra cheukhat cu pek ding a si ko nain mah hna zong kha zei rel loin um awk a si lo. 24 Hruaitu mitcaw hna, fikfa cu nan zet nain kalauk tu cu nan dolh!

25 “Mi depde a simi phungbia cawnpiaktu le Farasi mi hna, thil ṭhalo nan tong lai! Hrai le kheng kha a lenglei cun nan ṭawl nain a chunglei tu ah cun hakkauhnak le i sum lonak in a khat. 26 Mitcaw Farasi mi hna! Hrai le kheng cu a chunglei kha ṭawl hmasa u. Mah hnu lawng ah a lenglei zong a thiang lai.

27 “Mi depde a simi phungbia cawnpiaktu le Farasi mi hna, thil ṭhalo nan tong lai! Nannih cu siiraang aa thuhmi thlan he nan i lo. A lenglei cun aa dawh tuk nain a chung ahcun mithi ruh le a thianghlim lomi thil in a khat. 28 Cu bantuk in nannih zong lenglei in cun a dingmi nan lo nain nan chunglei ah cun i titernak le ṭhatlonak in a khat.

29 “Mi depde a simi phungbia cawnpiaktu le Farasi mi hna, thil ṭhalo nan tong lai! Profet hna thlan cu nan ser i miding mi hna thlan kha nan ṭamh. 30 ‘Pupa chan ah rak nung u sih law profet pawl thisen chuahnak ah kannih cu kan i tel lai lo’ tiah nan ti. 31 Cucaah nanmah lila nih profet pawl a rak thattu tefa nan si kha nan langhter ko. 32 Nan pupa hna nih an rak thawkmi cu liim lawlaw ko u.

33 “Rul hna, rul tefa hna, Gehenna* i biaceihnak in cun zeitindah nan luat khawh lai? 34 Cucaah nan sinah profet pawl, mifim pawl le cawnpiaktu pawl kha ka rak thlah hna lai. A cheu cu nan thah hna lai, a cheu cu tung cung ah nan thlai hna lai, a cheu cu pumhnak inn ah nan tuk hna lai, a cheu cu khua khat hnu khua khat in nan dawi hna lai i nan hrem hna lai. 35 Miding mi Abel thawk in hmunthiang le biakṭheng karlak ah nan rak thahmi Berekhiah fapa Zekhariah tiang in vawleicung i miding mi vialte thisen chuah mawhnak cu nan cung ah a tlung lai. 36 Biatak kaan chimh hna lai, cu thil vialte cu tuchan mi hna cung ah hin a tlung lai.

37 “Jerusalem, Jerusalem, nang cu profet pawl a thatmi khua, Pathian nih a thlahmi pawl lung in a chepmi khua na si. Arpi nih a fale kha a thla tang ah a pumh hna bantuk in na fale kha pumh awkah atu le atu kaa zuam! Asinain na duh lo. 38 Na inn cu kaltak a si cang lai.* 39 Kaan chimh lai, ‘Jehovah* min in a rami cu thluachuah hmu ko seh!’ tiah na chim hlan tiang atu thawk in na ka hmu ti lai lo!”