Hebru

9 Biakamnak hlun i a thiangmi rian caah phunglam a um i vawleicung ah hmunthiang zong a um. 2 Puan thlam i a pakhatnak khaan cu sak a si i cuka ah mei vannak tung, cabuai le Pathian hunhmi changreu* a um; mah khaan cu A Thiangmi Khaan tiah auh a si. 3 A pahnihnak puanzar hnulei ah A Thiang Bikmi Khaan tiah auhmi chungchin khaan a um. 4 Cuka ah rimhmui khanghnak sui kheng le sui in hut dihmi biakamnak kuang a um. Mah kuang chung ah manna changreu chiahmi sui um, a parmi Aaron ṭhiangṭhunh le biakamnak lungtlap hna an um. 5 Kuang a chin* cung ah sunparnak in a khatmi cherubim* zuk pahnih an um i an thla an zarh. Asinain atu cu hi thil kong hi a dikthliar in chim caan a si lo.

6 Hi thil vialte an timhtuah dih hnuah tlangbawi hna cu a thiangmi rian ṭuan awkah thlam i a pakhatnak khaan ah nifate an lut zungzal. 7 Asinain thlam i a pahnihnak khaan ah cun tlangbawi ngan lawnglawng kumkhat ah voikhat a lut. Amah ca le mi nih hngalh loin an tuahmi sualnak caah raithawinak pek awkah thi kha aa put. 8 A pakhatnak thlam a um chung paoh cu A Thiang Bikmi Khaan chung luhnak lam kha aho sin hmanh ah phuan a si rih lo ti kha thiang thlarau nih a langhter. 9 Mah thlam cu atu chan caah tahchunhnak a si. Mah timhtuahnak ning in laksawng le raithawinak hna cu pek a si. Asinain cutin an tuahmi nih a thiangmi rian a ṭuanmi hna i an chiaṭha thleidannak lungthin kha tling tein a thianter kho lo. 10 Cu hna cu ei awk, din awk le Moses Nawlbia ning in thianhnak phunglam he lawng aa pehtlaimi an si. Taksa he aa tlaimi phunglam an si i zeizong vialte ningcang tein chiah ṭhan awkah rikhiahmi caan a phanh tiang lawng a hmun lai.

11 Asinain Khrih cu atu kan hmuhmi thilṭha ratpi awkah tlangbawi ngan in a rat tikah a ṭha deuhmi le a tling deuhmi thlam chung ah a lut. Mah thlam cu minung kut in sakmi a si lo i hi vawleicung ah a ummi zong a si lo. 12 Khrih cu A Thiang Bikmi Khaan ah meheh thi le cawfa thi si loin amah thi i put in voikhat ah zungzal ca in a lut. Cucaah kannih cu zungzal khamhnak kan hmu kho. 13 Meheh thi, cawtum thi le a thurhnawmmi hna cung ah thehmi cawla vutcaam nih Pathian mithmuh ah a thianter khawh hna ahcun, 14 Khrih thi nih cun zeitluk in dah a thianter khawh chinchin hna lai! Khrih nih zungzal a hmunmi thiang thlarau lamhruainak ning in amahle amah kha soisel awk a um lomi raithawinak in Pathian sinah aa pe. A thi nih kan chiaṭha thleidannak lungthin kha a thianter i thihnak a phanhtermi thil tuahnak kha kan ngol. Cucaah a nungmi Pathian kha kan biak khawh.

15 Khrih cu biakamnak thar i remnak sertu a hung si. Cucaah auh a simi hna cu zungzal a hmunmi ro he aa tlaimi biakam kha an hmu kho. Biakamnak hlun tang i an rak um lioah an tuahmi sualnak in Khrih thihnak nih a tlanh hna i a luatter hna. 16 Mi nih Pathian he biakamnak an ser tikah a sertu cu a thih a hau. 17 Biakamnak sertu a thih lawng ah mah biakamnak cu fehter a si. Biakamnak sertu a nun chung paoh cu fehter a si rih lo. 18 Cucaah biakamnak hlun zong thisen loin fehter a rak si lo. 19 Moses nih Nawlbia chung i nawl peknak vialte kha mizapi a chimh hna hnuah cawfa thi le meheh thi kha ti he a cawh i hyssop* nge ah ṭemmi tuuhmul sen in cazual le mizapi kha a theh hna. 20 Cun “Mah hi nanmah zulh awkah Pathian nih aan pekmi hna biakamnak thisen a si” tiah a ti. 21 Moses nih thlam le a thiangmi rianṭuannak ah hmanmi umkheng vialte zong kha thi in a theh hna. 22 Nawlbia ning in thisen nih zeizong vialte ti awk in a thianter khawh. Thisen luanh loin sual ngaihthiamnak a um kho lo.

23 Cucaah vancung he aa tlaimi thil a aiawhmi thil hna cu saram raithawinak thi in thenh a hau. Asinain vancung he aa tlaimi thil caah cun a ṭha deuhmi raithawinak a herh. 24 Khrih cu a taktak a simi he i loin minung nih an sakmi, A Thiang Bikmi Khaan ah a lut lo, vancung tu ah a kai. Atu ah Khrih cu kanmah aiawh in Pathian hmaiah a chuak lengmang cang. 25 Tlangbawi ngan cu amah thi si loin saram thi i put in A Thiang Bikmi Khaan ah kum fatin a lut. Khrih tu cu amahle amah raithawinak ah atu le atu i pekchanh a hau lo. 26 Cutin si hlah seh law vawlei ser hramthawk in* voi tampi temhinnak a tuar a hau hnga. Asinain atu cu sualnak hloh awkah amahle amah raithawinak ah aa peknak thawng in chan donghnak caan* ah voikhat ah zungzal ca in a lang cang. 27 Minung hi voikhat kan thi lai i mah hnuah biaceih kan si lai bantuk in, 28 Khrih zong mi tampi sualnak hloh awkah* voikhat ah zungzal ca in aa pe ve. Khrih a voihnihnak a langh ṭhanmi cu sualnak hloh awkah si loin lungtho tein amah a hngakmi hna khamh awkah a si.