Lamkaltu

15 Judea ram in mi cheukhat an ra i “Moses Nawlbia ning in nan cuarpar nan i tan lo ahcun khamhnak nan hmu kho lai lo” tiah unau pawl kha an cawnpiak hna. 2 Paul le Barnabas cu anmah he an lung aa khah lo caah fakpi in an i al. Cucaah mah kong he aa tlaiin va hal awkah Paul, Barnabas le unau cheukhat kha Jerusalem ah a ummi lamkaltu le upa hna sinah thlah ding in an timhtuah.

3 Khrihfabu nih tlawmpal tiang an hei thlah hna. Annih nih Foinisia ram le Samaria ram kha an pal pah i miphun dang hna nih Pathian an hun biaknak kong kha a dikthliar in an chimh hna. Mah tikah unau pawl cu an i lawm tuk. 4 Jerusalem khua an phanh tikah Khrihfabu le lamkaltu hna le upa hna nih lunglawm tein an rak conglawmh hna. Paul le Barnabas nih anmah hmang in Pathian nih a tuahmi thil vialte kha an chimh hna. 5 Asinain Farasi bu chungtel a rak si i zumtu a hung simi mi cheukhat cu an dir i “Hi mi hna hi an cuarpar an i tan a hau. Moses Nawlbia nan zulh lai tiah chimh an hau” tiah an ti.

6 Cucaah lamkaltu hna le upa hna cu mah kong i ceih awkah hmunkhat ah an i pum. 7 Fakpi in an i ruahceih hnuah Peter cu a dir i “Unau hna, miphun dang nih thawngṭha kha an theih i an zumh nakhnga an sin i va chim awkah Pathian nih kan lakin keimah a ka thim hmasa bik ti kha nan hngalh ko. 8 Lungthin a hngaltu Pathian nih kanmah thiang thlarau a kan pek bantuk in miphun dang zong a pek hnanak thawng in a cohlan ve hna ti kha a langhter. 9 Annih le kannih karlak ah Pathian cu thleidannak a ngei ti lo. An zumhnak thawng in an lungthin kha a thianter cang. 10 Cucaah kan pupa hna nih siseh, kanmah nih siseh kan phorh khawh lomi hngawngkual kha zultu pawl nan khinh hnanak thawng in Pathian cu zeicah nan hneksak? 11 Kannih cu Bawipa Jesuh vel thawng in khamhnak kan hmu tiah kan zumh bantuk in annih zong an zumh ve” tiah a ti.

12 Mah tikah an dihlak in dai tein an um. Barnabas le Paul nih anmah hmang in miphun dang hna sinah Pathian nih a tuahmi khuaruahhar thil le hmelchunhnak kong kha an chimh hna tikah an ngaih. 13 An chim dih hnuah Jeim nih “Unau hna, ka bia hi ngai hmanh u. 14 Pathian nih miphun dang kha lungthin a pek hna i a min caah an lakin mi a thim hnanak kong kha Simeon* nih fiang tein a chim cang. 15 Mah cu Profet cauk ah aa ṭialmi hi bia hna he aa tlak: 16 ‘Hi thil vialte hnuah ka ra ṭhan lai i a tlumi David thlam kha ka tun ṭhan lai; a rawkmi kha ka remh lai i ka sak ṭhan lai. 17 A taangmi hna nih ka min in auh a simi miphun dang hna he keimah Jehovah* kha lungtho tein an ka kawl lai. Hi bia hi mah thil hna a tuahtu keimah Jehovah* nih ka chim. 18 Mah thil hna tuah awkah hlanliopi in bia ka rak khiah cang.’ 19 Cucaah kei ka ruahnak ah cun Pathian a hun biami miphun dang hna kha hnahnawhnak pek awk an si lo. 20 Mah canah siasal biaknak he aa tlaimi a thurhnawmmi thil, nupa sualnak,* hngawng dih sa* le thi kha hrial u tiin cakuat ṭial ah a ṭha lai. 21 Hlanliopi in mah nawlbia hna aa telmi Moses cauk kha khua kip ah a rel i a chimmi an um. Sabbath ni fatin pumhnak inn hna ah mah cauk kha aw thangpi in an rel tawn” tiah a ti.

22 Mah tikah lamkaltu hna le upa hna i telin Khrihfabu dihlak nih Paul, Barnabas le thimmi unau pahnih kha Antiok khua ah thlah ding in bia an khiah. Hruaitu a simi Barsabbas tiah auhmi Judas le Silas kha an thlah hna. 23 Hitin ca an ṭial i an sinin an kuat hna:

“Nan unau a simi lamkaltu le upa hna nih Antiok khua, Siria ram le Silisia ram ah a ummi miphun dang unau hna kha nan kut kan in tlaih hna! 24 Kan lak i mi cheukhat cu lamhruainak zeihmanh kan pe hna lo nain nan sinah an ra i nan lung a tuaitermi bia an chim i nan zumhnak hrawh awkah an i zuam ti thawng kan theih. 25 Kan dawtmi Barnabas le Paul kha thimmi hna he nan sin i thlah awkah kan dihlak hnatla in bia kan khiah. 26 Barnabas le Paul cu Bawipa Jesuh Khrih min caah an nunnak hmanh pek a ngamhmi an si. 27 Mah kong kha anmah hmurka in chim awkah Judas le Silas zong kan rak thlah hna. 28 Hi a herhmi hleiin nan cung ah thilrit khinh lo awkah thiang thlarau bawmhnak thawng in biakhiahnak kan tuah: 29 siasal pekchanhmi rawl, thi, hngawng dih sa* le nupa sualnak* kha hrial zungzal u. Hi thil hna hi ralring tein nan hrial ahcun nan caah a ṭha lai. Dam tein!”

30 An i thawh i Antiok khua an phanh tikah zultu vialte kha an pumh hna i ca cu an pek hna. 31 Ca kha an rel tikah thazaang peknak bia ruang ah an i lawm ngaingai. 32 Profet zong a simi Judas le Silas nih forhfialnak bia tampi an chim i unau pawl kha thazaang an pek hna. 33 Cuka ah caan sau nawn an caam. Mah hnuah unau pawl nih an kut an tlaih hna i Jerusalem khua ah an rak kir ṭhan. 34* —— 35 Paul le Barnabas tu cu Antiok khua ah an caamta i Jehovah* bia kong thawngṭha kha unau tampi he an chim i an cawnpiak hna.

36 Ni tlawmpal hnuah Paul nih Barnabas kha “Jehovah* bia kan rak chimnak khua kip i unau hna zeidah an lawh ti hngalh awkah atu* va kal u sih law va tlawng hna u sih” tiah a ti. 37 Barnabas nih Marka tiah auhmi Johan kha i kalpi ding in bia a khiah. 38 Asinain Paul nih i kalpi kha a duh lo. Zeicahtiah Johan nih Pamfilia ah a rak kaltak hna i phungchim rian ah anmah kha a rak zulh ti hna lo caah a si. 39 Mah kong ah fakpi in bia an i al i an i ṭhen. Barnabas nih Marka kha aa auh i Saipras tikulh lei ah tilawng in an kal. 40 Paul tu nih cun Silas kha aa thim i unau pawl nih Jehovah* velngeihnak a hmuh nakhnga thla an campiak hnuah a kal ve. 41 Siria ram le Silisia ram vialte ah a kal i Khrihfabu hna kha thazaang a pek hna.