Johan sin pekmi Biathlam

10 Cun vancung in a ṭhawngmi a dang vancungmi pakhat a ṭummi kha ka hmuh. Minmei in aa thuam i a lu ah chuncha a um, a hmai cu nika bantuk a si i a ke cu mei tung bantuk a si. 2 A kut in aa samhciami cazual hmete pakhat kha aa put. A orhlei ke nih rili kha a lamh i a kehlei ke nih vawlei kha a lamh. 3 Chiandeih a huk bantuk in aw thangpi in a au. A au tikah khuari pasarih nih bia an chimmi kha ka theih.

4 Khuari pasarih nih bia an chim tikah ṭial kaa tim nain vancung in aw pakhat nih “Khuari pasarih nih an chimmi kha cakhenh khenh law ṭial hna hlah” tiah a timi kha ka theih. 5 Rili cung le vawlei cung ah a dirmi, ka hmuhmi vancungmi nih a orhlei kut kha vanlei ah a hler. 6 Van le a chung ah a ummi thil, vawlei le a chung ah a ummi thil, rili le a chung ah a ummi thil a sertu zungzal in zungzal tiang a nungmi Pathian kha chalh in hitin chiat a ser: “A rau ti lai lo. 7 Vancungmi pasarihnak nih a muko a tum lai te ah Pathian nih a sal profet hna sinah a thanhmi thawngṭha he aa tlaimi, a thiangmi biathli cu a tling cang lai.”

8 Cun vancung in aw pakhat ka theih ṭhan i “Va kal law rili cung le vawlei cung ah a dirmi vancungmi nih aa putmi, aa samhciami cazual kha va la” tiah a ka ti. 9 Vancungmi sinah cun ka kal i cazual hmete kha ka pe tiah ka ti. “Cazual kha i lak law ei tuah, na pawpi chung ah cun a kha lai nain na kaa chung ah cun khuaihliti bantuk in a thlum lai” tiah a ka ti. 10 Vancungmi kut ah a ummi cazual hmete cu ka lak i ka ei, ka kaa ah cun khuaihliti bantuk in a thlum, asinain ka dolh tikah ka pawpi chung ah cun a kha. 11 Cun “Mi kip, ram kip, holh kip le siangpahrang tampi kong he aa tlaimi Pathian bia kha na chim ṭhan a hau lai” timi aw kha ka theih.