Johan sin pekmi Biathlam

18 Mah hnuah nawlngeihnak nganpi a ngeimi a dang vancungmi pakhat van in a rung ṭummi kha ka hmuh. A sunparnak ruang ah vawlei cu a ceu dih. 2 Fakpi in hitin a au: “A Liannganmi Babilon cu a tlu cang! A tlu cang! Anih cu khuachia le a thurhnawmmi thlarau* hna an umnak hmun, a thiang lomi le huat a tlaimi va nih bu an sernak hmun a si cang. 3 Nupa sualnak* timi a hornak zu ruang ah vawleicung mi vialte cu an ri dih. Vawleicung i siangpahrang hna cu amah he nupa sualnak an tuah. Zah hngal loin a rumnak kha aa nuamhpi caah vawleicung chawlet pawl cu an rum cang.”

4 Cun vancung in aw pakhat ka theih ṭhan i hitin a ti: “Ka mi hna, a sualnak ah i tel ve nan duh lo i a in hngami dantatnak kha in ve nan duh lo ahcun amah chung in chuak u. 5 Zeicahtiah a sualnak cu van a tawng cang i a ding lomi a tuahsernak ruang ah Pathian nih bia a ceih cang lai. 6 Midang a pehtlaih hna ning in amah cu pehtlai u. A rak tuahmi thil ruang ah a let hnih in lehrulh u. A cawhmi hrai chung ah amah caah a let hnih in cawhpiak u. 7 Amahle amah aa hlorh tluk le zah hngal loin rumnak aa nuamhpi tluk in hremnak le ṭah-aihramnak kha pe u. Zeicahtiah ‘Siangpahrang nu bantuk in bawiṭhutdan cung ah ka ṭhu, nuhmei ka si lo. Zeitik hmanh ah ṭah-aihram in ka um bal lai lo’ tiah amahle amah aa ti tawn. 8 Cucaah thihnak, ṭah-aihramnak le mangṭam in dantatnak kha nikhat chung ah a in lai. Mei in khangh dih cikcek a si lai. Zeicahtiah bia a ceihtu Jehovah* Pathian cu a ṭhawngmi a si.

9 “Amah he nupa sualnak* a tuah i zah hngal loin rumnak aa nuamhpimi vawleicung siangpahrang hna nih a kanghnak meikhu an hmuh tikah ngaihchia in an ṭang an i cum lai i an ṭah lai. 10 Amah bantuk in hrem kan si lai ti an phan caah langhlatpi in an dir lai i ‘Maw a liannganmi khualipi, a fekmi Babilon khualipi, a va poi hringhran dah, a va poi hringhran dah, suimilam pakhat chung ah pei dantat na si ko hi!’ tiah an ti lai.

11 “Mah leng ah vawleicung chawlet pawl zong an thil a cawtu ding ahohmanh an um ti lo caah amah cu an ṭah i an hram. 12 An zuarmi thil ah sui, ngun, lung mansung, tikep lungvar, khiangraang puan, maimaw puan, pu puan, puan sen; a hmuimi thing in sermi thil phunzakip; vuiho, thing mansung, dar, thir le marble lung* in sermi thil phunzakip; 13 nakzik, India meh hang ṭamhnak, rimhmui, zihmui, frankinsen,* mitsur zu, oliv chiti, changvut dip, fang, caw, tuu, rang, rangleng, sal le minung hmanh an i tel. 14 Ei na duh tukmi thingthei hmin cu an lo dih cang. Rawl thawthaw le thil dawhdawh cu na sinin an lo dih cang i zeitik hmanh ah hmuh ṭhan an si ti lai lo.

15 “Cu thil hna a zuar i amah thawng in a rummi chawlettu pawl zong amah bantuk in hrem kan si lai ti an phan caah langhlatpi in an dir i an ṭap, an hram. 16 ‘Khiangraang puan, maimaw puan le puan sen in aa thuam i sui hlawn, lung mansung le tikep lungvar dawhdawh in aa ṭamhmi, a liannganmi khualipi, a va poi hringhran dah, a va poi hringhran dah. 17 Suimilam pakhat chung ah pei na rumnak vialte cu an loh dih ko hi!’ tiah an ti lai.

“Tilawng haotu hna le tilawng in khual a tlawngmi hna le tilawng mawngtu hna le rili in a paw aa cawmmi vialte cu langhlatpi in an dir i, 18 amah a kanghnak meikhu kha an hmuh tikah an ṭap i ‘Hi khualipi tluk in a liannganmi khualipi hi a um ti hnga maw?’ tiah an ti. 19 An lu ah leidip an i phulh i an ṭap, an hram. ‘A liannganmi khualipi, a va poi hringhran dah, a va poi hringhran dah. Na ngeihchiah thawng in tilawng ngeitu vialte cu mirum an hung si. Asinain suimilam pakhat chung ah pei na ngeihchiah vialte cu an loh dih ko hi!’ tiah an ti.

20 “Vancung ah a ummi hna, mithiang mi hna, lamkaltu hna le profet hna, a tonmi ruang ah cun i lawm ko u. Zeicahtiah Pathian nih nanmah caah amah cu dan a tat cang!”

21 Cun a ṭhawngmi vancungmi pakhat nih facang rialnak lung nganpi he aa lomi lung pakhat kha a cawi i rili ah a thlak. Cun hitin a ti: “A liannganmi Babilon khualipi cu hi bantuk hin pil lakin thlak a si lai i zeitik hmanh ah hmuh ṭhan a si ti lai lo. 22 Tingtang tum in hla a sami hna, ringawn tum thiam hna, thonglawi tum thiam hna le muko tum thiam hna aw thawng zong zeitik hmanh ah theih a si ti lai lo. Zungthiam hna zong pakhat hmanh hmuh an si ti lai lo. Facang rial thawng zong zeitik hmanh ah theih a si ti lai lo. 23 Khuapi ah meiinn a ceu ṭhan ti lai lo. Monu le mopa aw zong theih a si ti lai lo. Na chawlettu pawl cu vawleicung ah milian an si. Na khuachia thiamnak in vawleicung mi vialte kha lam na pialter hna. 24 Profet hna, mithiang mi hna le vawleicung ah thah a simi vialte hna i an thi cu a chung ah hmuh a si.