Rom

3 Cu a si ah Judah mi sinak i a ṭhathnemhnak cu zeidah a si? Cuarpar tannak i a santlaihnak cu zeidah a si? 2 A lam kip in ṭhathnemhnak tampi a um. A hmasa bik ah Judah mi cu Pathian bia pek an si. 3 Cu a si ah zumhnak a ngei lomi Judah mi hna tah zeitin? Zumhnak an ngeih lomi nih Pathian i zumhawktlak a sinak kha pakpalawng ah a canter maw? 4 A canter hrimhrim lo! Mi vialte nih lih an chim hmanh ah Pathian cu a dik ko. Cathiang ah “Na bia in a dingmi na si kha na langhter lai i sual aan phawtu hna an palh kha na langhter lai” tiah aa ṭial bantuk khan a si. 5 A ding lomi thil kan tuahmi nih Pathian dinnak kha a langhter chin. Cu a si ah dan a kan tat tikah Pathian cu a ding lo tinak a si maw? (Minung hmuhnak in ka chimmi a si.) 6 A si hrimhrim lo! Pathian cu a din lo ahcun zeitindah vawlei cu bia a ceih lai?

7 Asinain ka lihchimnak nih Pathian biatak kha a langhter chin i Pathian kha sunparnak a pek ahcun zeicah misual in biaceih ka si rih kun? 8 Cutin a si ahcun “Ṭhatnak a chuah nakhnga ṭhatlonak tuah u sih” tiah kan ti ko hnga. Cutin kan ti tiah mi cheukhat nih sual an kan puh. Cu bantuk mi hna biaceih an simi cu a dingmi a si.

9 Cu a si ah kannih Judah mi hna kan dirhmun cu a ṭha deuh hlei maw? A ṭha deuh hlei lo! Kan rak chim cang bantuk in Judah mi he, Greek mi he, kan dihlak in sualnak tang ah kan um. 10 Cathiang nih “Miding an um lo, pakhat hmanh an um lo; 11 thleidan thiamnak a ngeimi ahohmanh an um lo; Pathian a kawlmi pakhat hmanh an um lo. 12 Mi vialte cu an pial dih cang, san a tlai lomi an si dih cang; zaangfahnak a langhtermi an um lo, pakhat taktak hmanh an um lo.” 13 “An hrom cu aa hungmi thlan bantuk a si; an lei cu lihbia in a khat.” “An hmur ah rul siivai a um.” 14 “An kaa cu chiatserhnak le biachiakha in a khat.” 15 “An ke cu thisen chuah awkah a khul a rang.” 16 “An kalnak lam ah rawhnak le harnak lawng a um, 17 daihnak lam kha an hngal lo.” 18 “Pathian kha an ṭihzah lo” tiah a ti bang khan a si.

19 Nawlbia nih a chimmi vialte cu Nawlbia tang ah a ummi hna caah a si ti kha kan hngalh. Mah cu mi nih silhnalh khawhnak zeihmanh an ngeih nakhnga lo le vawlei cu a ningpi in Pathian hmaiah dantat awk tlak a si kha a langh nakhnga caah a si. 20 Nawlbia nih sualnak cu zeidah a si ti kha fiang tein a langhter caah nawlbia zulhnak thawng in ahohmanh Pathian hmaiah miding tiah ti khawh an si lo.

21 Nawlbia le Profet bia* ah langhter a si bantuk in nawlbia zulh loin Pathian hmaiah a dingmi dirhmun ngeih khawh a si ti kha atu ah hngalh a si cang. 22 Cucaah zumhnak a ngeimi vialte cu Jesuh Khrih zumhnak thawng in Pathian hmaiah a dingmi dirhmun an ngei kho. Zeicahtiah Pathian cu mi vialte cung ah thleidannak a ngei lo. 23 Mi vialte cu misual an si dih caah Pathian sunparnak he an i hlat. 24 Asinain Khrih Jesuh pekmi tlanhnak man thawng in Pathian nih a dingmi in a hmuh hna. Mah cu a vel thawng in hmuhmi laksawng a si. 25 Khrih thisen an zumhnak thawng in Amah he remnak an hmuh nakhnga Pathian nih Khrih kha raithawinak caah a pek. Mah cu a dinnak langhter awkah a si, zeicahtiah hlanlio ah mi nih an rak tuahmi sualnak kha a ngaihthiam hna i a in hna. 26 Atu zong ah Pathian nih Jesuh a zummi kha miding tiah a ti hnanak thawng in a dinnak kha a langhter.

27 Cu a si ah i porhlawt khawh a sinak a ruang a um maw? A um lo. Zei nawlbia nih dah a thlauh? Tuahsernak a hau timi nawlbia nih maw? A si lo. Zumhnak nawlbia nih a thlauh. 28 Cucaah mi pakhat miding tiah ti a simi cu nawlbia zulhnak thawng in si loin zumhnak thawng in a si. 29 Pathian cu Judah mi hna Pathian lawng maw a si? Miphun dang hna Pathian tah a si lo maw? Miphun dang hna Pathian zong a si ko. 30 Pathian cu pakhat lawng a um. Cuarpar aa tanmi kha an zumhnak thawng in miding tiah a ti hna bantuk in cuarpar aa tan lomi zong kha an zumhnak thawng in miding tiah a ti ve hna. 31 Kan zumhnak thawng in nawlbia cu kan hlo maw? Kan hlo hrimhrim lo! A tak ti ahcun nawlbia kha kan fehter lehlam.