Johan Pakhatnak

2 Ka fale hna, mah kong ka rak ṭialmi cu sualnak nan tuah nakhnga lo caah a si. Asinain pakhatkhat nih sualnak a tuah ahcun bawmtu* kan ngei ko. Amah cu Pa sinah a ummi miding Jesuh Khrih kha a si. 2 Anih cu kanmah ca lawng si loin vawleicung pumpi sualnak caah sual thawinak a si. 3 Mah sual thawinak thawng in amah cu kan hun hngalh. A nawlbia kha kan zulh zungzal ahcun amah a hngalmi kan si kha a lang lai. 4 Pakhatkhat nih “Amah cu ka hngalh” tiah a ti nain a nawlbia a zulh lo ahcun mi lihchim a si i a chung ah biatak a um lo. 5 Asinain Khrih bia a zulmi cu Pathian a daw taktakmi a si. Kannih zong cutin kan tuah ahcun amah he lungthin khat tein kan um ti kan langhtermi a si lai. 6 Amah he lungthin khat tein ka um tiah a titu cu amah a rak zulhmi lam kha zulh peng awkah rian a ngei.

7 Ka dawtle hna, nan sinah ka rak ṭialmi hi nawlbia thar a si lo, a hramthawk tein nan rak hmuh cangmi nawlbia hlun a si. Mah nawlbia hlun cu nan rak theih cangmi bia kha a si. 8 Asinain atu ka ṭialmi hi nawlbia thar ti zong in ti khawh a si. Mah nawlbia hi Khrih thengte nih a rak zulh i nanmah zong nih nan zulh. Zeicahtiah muihnak cu a lo i ceunak taktak cu a ceu cang.

9 Ceunak chung ah ka um a ti nain a unau a huami cu muihnak chung ah a um rihmi a si. 10 A unau a dawmi cu ceunak chung ah a ummi a si. A caah tlukrilhtertu zeihmanh a um lo. 11 Asinain a unau a huami cu muihnak chung ah a um i muihnak chung ah a tlongleng. Muihnak nih cun a mit a cawtter caah khuazei ah ka kal ti awk a hngal lo.

12 Ka fale hna, a min ruang ah nan sualnak cu ngaihthiam a si cang caah cakuat ka rak ṭial. 13 Pale hna, a hramthawk tein a rak um cangmi amah kha nan hun hngalh caah ca kaan kuat hna. Tlangval hna, miṭhalo pa kha nan tei cang caah ca kaan kuat hna. Fale hna, Pa Pathian kha nan hun hngalh caah ca kaan kuat hna. 14 Pale hna, a hramthawk tein a rak um cangmi amah kha nan hun hngalh caah ca kaan kuat hna. Tlangval hna, nannih cu nan ṭhawng, Pathian bia cu nan chung ah a um i miṭhalo pa kha nan tei cang caah ca kaan kuat hna.

15 Vawlei hi siseh, vawlei ah a ummi thil si hna seh tlaihchan hna hlah u. Vawlei a tlaihchanmi cu a chung ah Pa Pathian dawtnak a um lo. 16 Zeicahtiah pumsa duhnak, mitthitnak le ngeihmi thilri kong ah i porhlawtnak ti bantuk vawlei ah a ummi thil vialte cu Pathian sinin a rami an si lo. Vawlei in a rami an si. 17 Mah leng ah vawlei le vawlei ah a ummi, mi nih an duhmi thil hna cu an lo cuahmah cang. Asinain Pathian duhnak a tuahmi tu cu zungzal in an hmun.

18 Ka fale hna, atu hi donghnak caan a si cang. Khrih ralchanhtu* an chuak lai tiah nan rak theih bantuk in atu hmanh ah Khrih ralchanhtu tampi an chuak cang. Cucaah donghnak caan a si cang ti kha kan hngalh. 19 Annih cu kanmah bantuk an si lo caah kan sinin an chuak. Kanmah bantuk rak si hna seh law kan sinah an um zungzal ko hnga. Asinain kan sinin an chuah caah kanmah bantuk an si lo ti cu a lang. 20 Nannih tu cu a Thiangmi Pathian nih chiti aan thuh hna caah nan dihlak in biatak kong kha nan hngalh. 21 Biatak nan hngalh lo caah si loin biatak nan hngalh caah le biatak chung in lihbia a chuah lo caah ca kaan kuat hna.

22 Ahodah mi lihchim cu a si? Jesuh cu Khrih a si ti a cohlang lomi kha a si ko lo maw? Pa le Fapa a hlawmi cu Khrih ralchanhtu* a si. 23 Fapa a hlawmi cu Pa mithmai ṭha an hmu lo. Asinain Fapa a cohlangmi nih cun Pa mithmai ṭha an hmuh. 24 Nannih tu cu a hramthawk tein nan rak theihmi kong kha nan lungthin chung ah caamter peng u. A hramthawk tein nan rak theihmi kong cu nan lungthin chung ah a caam peng ahcun Fapa he, Pa he lungthin khat tein nan um kho peng lai. 25 Mah leng ah zungzal nunnak kaan pek hna lai tiah amah hrimhrim nih bia a kan kamh.

26 Nanmah lampialter awkah aa zuammi mi cheukhat an um caah hi kong hna hi ka rak ṭial. 27 Nannih tu cu Pathian nih a thiang thlarau in chiti aan thuh hna i a thlarau cu nan chung ah a hmun, cucaah ahohmanh nih cawnpiak nan herh lo. Asinain Pathian nih chiti aan thuh hnanak thawng in zeizong vialte kha aan cawnpiak hna. Mah cu biatak a si, lihbia a si lo. Cucaah cawnpiak nan simi ning in amah he lungthin khat tein um peng u. 28 Cucaah ka fale hna, amah he lungthin khat tein um peng u. Cuticun a hung langh tikah zalong tein biachimnak nawl* kan ngei lai i a rat tikah ningzak in i thuh a hau lai lo. 29 Amah cu a dingmi a si caah a dingmi thil a tuahmi paoh cu Pathian fale an si ti kha nan hngalh lai.