Lamkaltu

20 Buaibainak a dih hnuah Paul nih zultu pawl kha a auh hna, thazaang a pek hna i a chawnhbiak hna hnuah Masidonia lei ah aa thawh. 2 Cuka ram chung ah khua khat hnu khua khat a tlawng i zultu pawl kha thazaang tampi a pek hna. Mah hnuah Greek ram ah a phan. 3 Cuka ah thla thum a um hnuah Siria ram lei ah tilawng in kal aa tim. Asinain Judah mi nih a thli tein thah an timh caah Masidonia lei in kir awkah bia a khiah. 4 Berea khuami Pirhas fapa Sopater, Thesalonika khuami Aristarkas le Sekandas, Derbe khuami Gaius, Timote, Asia peng mi Taikhikas le Trofimas zong nih an zulh. 5 Annih cu an kal chung i Troas khua in an rak kan hngah. 6 Thilnu Phulh Lo Changreu Puai a dih hnuah Filipi khua in tilawng in kan i thawh. Ninga hnuah Troas khua ah kan phanh hna. Cuka ah nisarih kan caam.

7 Zarh i a nikhatnak ni ah hmunkhat ah rawl eiṭi ding in kan i pum. Paul cu a thaizing kal aa timh caah phung a chim lengmang i zanṭim tiang a chim. 8 Kan i pumhnak cungdot khaan ah cun meiinn tampi an van. 9 Paul nih phung a chim lengmang lioah thlalang awng kam ah a ṭhumi, Zutikhas timi tlangval pa cu a mit a ku tuk i aa hngilh caah dot thumnak in a tla. An va char tikah a rak thi cang. 10 Paul zong a va ṭum ve, a kun hnawh i a pom. Cun “Nan ngaihchia hlah u, a nung ṭhan cang”* tiah a ti hna. 11 Mah hnuah Paul cu cungdot ah a kai ṭhan i changreu kha a cheu i an ei. Khuadei tiang saupi bia a ruah hna hnuah aa thawh. 12 Tlangval pa kha inn ah an ṭinpi i a nun ṭhan caah an hna a ngam tuk hringhran.

13 Kannih cu Assos khua ah tilawng in kan kal chung, asinain Paul tu cu a ke in kal aa tim. Cucaah a kan cah bantuk in cuka ah tilawng in hei auh pah awkah kan timh. 14 Assos khua i kan i ton tikah tilawng cung ah kan kaiter i Mitilene khua ah kan kal. 15 A thaizing ah kan i thawh i Khios tikulh kan phan. A nihnihnak ni ah Samos tikulh ah chikkhat kan i din i a nithumnak ni ah Melitas khua ah kan phan. 16 Paul nih a si khawh ahcun Pentikos Puai ni tanh in Jerusalem khua phanh a duh caah Asia peng ah sau um loin Efesa khua kha tilawng in lanhtak awkah bia a khiah.

17 Asinain Paul nih Melitas khua in Efesa khua i Khrihfa upa pawl kha bia a cah hna i a auh hna. 18 An hun phanh tikah Paul nih “Asia peng i ka phanh ni thawk in nan sin i ka um chung vialte zeitindah ka nuncan a si ti kha ṭha tein nan hngalh ko. 19 Judah mi nih a thli tein thah an ka timh caah harnak tampi ka tong i toidornak le mitthli he Bawipa rian kha sal bang in ka ṭuan. 20 Nan ca i a ṭha dingmi kha ka nganhtakmi zeihmanh a um lo. Zapi hmaiah siseh, innkhat hnu innkhat ah siseh ka kal i kaan chimh hna, kaan cawnpiak hna. 21 I ngaihchih in Pathian sinah i mer awk le Bawipa Jesuh zumh awkah Judah mi le Greek mi sinah felfai tein tehte ka khaan. 22 Atu cu thiang thlarau lamhruainak in Jerusalem ah ka kal lai. Cuka khua ah zeidah ka ton lai ti kha ka hngal rih lo. 23 Asinain thongthlaknak le harnak na tong lai tiah thiang thlarau nih khua kip ah atu le atu ralrin a ka pekmi kha cu ka hngalh. 24 Asinain Pathian velngeihnak kong thawngṭha kha felfai tein tehte khaan awkah Bawipa Jesuh nih a ka pekmi rian le ka tuah awk a simi kha ka liim khawh ding a si ahcun ka nunnak hi cu zeihmanh ah ka rel lo.

25 “Pathian Pennak kong ka rak in chimhmi hna ahohmanh nih nan ka hmu ṭhan ti lai lo ti kha ka hngalh. 26 Cucaah mi vialte thisen in ka thiang cang ti kha nihin hrimhrim ah hngalhter kaan duh hna. 27 Zeicahtiah Pathian tinhnak vialte kha zeihmanh nganhtak loin kaan chimh dih hna. 28 Pathian nih a Fapa thisen in a cawkmi Khrihfabu kha khalh awkah thiang thlarau nih zohkhenhtu in rian aan pek hna. Cucaah nanmahle nanmah i ralring u, tuurun zong a ningpi in ṭha tein zohkhenh hna u. 29 Ka um ti lo hnuah ṭih a nungmi cenghngia cu nan lakah an lut lai i tuu pawl kha puarhrangpi in an pehtlaih hna lai ti kha ka hngalh. 30 Cun zultu pawl kha anmah hnu zulhter awkah a hmaan loin mi a cawnpiakmi zong nanmah lak hrimhrim in an chuak te lai.

31 “Cucaah hliphlau tein um u. Mitthli he kum thum chung, chunzan in kaan cawnpiakmi hna kha i cinken u. 32 Atu cu Pathian kut ah le a velngeihnak bia chung ah kaan chanh cang hna. Mah bia nih thazaang aan pek khawh hna leng ah mithiang mi vialte he ro aan coter khawh hna. 33 Aho sui le ngun le thilpuan hmanh ka hngar hna lo. 34 Keimah le ka sin i a ummi hna nih kan herhmi hmuh khawh awkah hi ka kut tein hin rian ka ṭuan ti kha nan hngalh ko. 35 Cutin rian i zuamnak thawng in a derthawmmi nan bawmh hna awk a si ti kha zeizong kip ah zohchunh awk kaan chiahpiak cang hna. ‘Hmuhlei nakin peklei ah lunglawmhnak a um deuh’ timi Bawipa Jesuh bia kha nan i cinken awk a si” tiah a ti hna.

36 Paul nih mah bia a chim dih hnuah an dihlak in an khuk an i bil i thla a cam. 37 Cun an zapi in an ṭap i Paul kha an kuh i an hnamh. 38 Nan ka hmu ṭhan ti lai lo timi a bia ruang ah an ngaih a chia tuk. Cun Paul kha tilawng umnak tiang an hei thlah.