Galati
1 Minung nih asiloah mi pakhat nih rian pekmi si loin Jesuh Khrih le Khrih thihnak in a thawhtertu Pa Pathian nih rian pekmi keimah lamkaltu Paul le, 2 ka sin i a ummi unaupa vialte nih Galati ram i a ummi Khrihfabu hna sinah cakuat kan rak ṭial:
3 Kan Pa Pathian le Bawipa Jesuh Khrih vel le daihnak cu nan cung ah um ko seh. 4 Kan Pa le kan Pathian duh ning in hi chan ṭhalo* in khamh kan si nakhnga Khrih nih kan sualnak caah a nunnak kha a pek. 5 Pathian cu zungzal in zungzal tiang sunparnak hmu ko seh. Amen.
6 Khrih velngeihnak in aan autu hna Pathian kha nan mertak colh i a dang thawngṭha nan cohlanmi cu ka khuaruah nan har tuk. 7 A tak ti ahcun a dang thawngṭha timi hi a um lo. Asinain nan lung aan tuaitertu hna le Khrih kong thawngṭha merh a duhmi mi cheukhat tu cu an um. 8 Kanmah kan si ah, van in a rak ṭummi vancungmi an si ah kan chimmi thawngṭha he aa lo lomi thawngṭha a chimmi cu chiatserh si ko seh. 9 Ka chim cang bantuk in atu ah ka chim ṭhan lai, nan cohlan cangmi he aa lo lomi thawngṭha a chimmi paoh cu chiatserh si ko seh.
10 Minung mithmai ṭha hmuh awkah maw kaa zuam, Pathian mithmai ṭha hmuh awkah dah? Asiloah minung lungton awkah maw kaa zuam? Minung lungton awkah kaa zuam ahcun Khrih sal ka si hnga lo. 11 Unau hna, nan sin i ka chimmi thawngṭha cu minung nih phuahchommi a si lo ti kha hngalhter kaan duh hna. 12 Mah thawngṭha cu minung sinin ka hmuhmi zong a si lo i an ka cawnpiakmi zong a si lo. Jesuh Khrih nih ka sinah a phuanmi a si.
13 Judah biaknak ka rak um lio i ka tuahsernak cu nan hngalh ko, Pathian Khrihfabu kha fakpi in ka rak hrem i hrawh awkah kaa zuam. 14 Pupa hna phungphai kha ka rak ṭanh tuk caah Judah biaknak phung zulhnak ah ka miphun lak i ka ṭhirual tampi kha ka lonh hna. 15 Asinain ka nu paw chung in a ka chuahter i a velngeihnak in a ka autu Pathian nih, 16 a Fapa kong kha miphun dang nih an hngalh nakhnga mah thawngṭha kha keimah hmang in chim ah a ṭha lai tiah a ruah. Pathian nih cutin tuah ding in a ka thim tikah ahohmanh ruahnak ka hal hna lo. 17 Keimah hlan i lamkaltu a simi hna ton awkah Jerusalem khua zong ah ka kal lo. Asinain Arabia ram ah ka kal i mah hnuah Damaskas khua ah ka kir ṭhan.
18 Kum thum a rauh hnuah Sefas* va ton ding in Jerusalem khua ah ka kal, a sinah ni 15 ka caam. 19 Bawipa a nau Jeim dah ti lo cu lamkaltu dang ahohmanh ka hmu hna lo. 20 Nan sinah ka ṭialmi, hi kong ah hin lih ka chim lo tiah Pathian hmaiah ka chim ngam.
21 Mah hnuah Siria ram le Silisia ram ah ka kal. 22 Khrih he lungthin khat tein a ummi Judea ram i Khrihfabu hna nih an ka hmu bal rih lo. 23 “A hlanah a rak kan hremtu pa nih hrawh aa timhmi zumhnak kong thawngṭha kha atu ah amah nih a phuan cang” ti lawng an theih. 24 Cucaah keimah ruang ah Pathian kha an thangṭhat.