Lamkaltu
8 Saul zong Steven an thahmi kha a hna a tla ve.
Mah ni thawk in Jerusalem khua ah a ummi Khrihfabu cu hremnak fakpi in an ton caah lamkaltu hna dah ti lo cu zultu vialte cu Judea ram le Samaria ram dihlak ah an i ṭhek dih. 2 Pathian a ṭihzahmi hna nih Steven ruak kha an va lak i an vui, cun fakpi in an ṭah. 3 Saul nih Khrihfabu kha hrawh awkah fakpi in aa zuam. Innkhat hnu innkhat ah a lut. Nu he, pa he a hnuh hna i thong ah a thlak hna.
4 Asinain aa ṭhenṭhekmi zultu hna cu hmun kip ah an kal i Pathian bia thawngṭha kha an chim. 5 Filip tu cu Samaria khua* ah a kal i Khrih kong kha a chimh hna. 6 Filip chimmi kha an theih i khuaruahhar thil a tuahmi kha an hmuh tikah mibu nih a chimmi kha ṭha tein an ngaih. 7 Cuka ah khuachia nih a tuahmi mi tampi an um, mah khuachia pawl cu fakpi in an au i an chuak. A zengmi le kebeimi tampi zong an dam. 8 Cucaah khuami hna cu an i lawm tuk.
9 Cuka khua ah Simon tiah auhmi mi pakhat a um. A hlanah amahle amah ṭhawnnak ka ngei tiah aa ti i Samaria mi kha a camhthiamnak in an khuaruah a harter hna. 10 A hme bik in a ngan bik tiang, mikip nih a bia kha an ngaih i “Hi pa hi Ṭhawnnak Ngan, Pathian Ṭhawnnak kha a si” tiah an ti. 11 A camhthiamnak in caan saupi tiang an khuaruah a rak harter hna caah cutin a bia an ngaihmi a si. 12 Filip nih Pathian Pennak le Jesuh Khrih min he aa tlaimi thawngṭha kha a chim tikah mi nih an hun zumh i nu he, pa he tipil an ing. 13 Simon theng zong zumtu a hung si caah tipil a ing i Filip sinah a um peng. Filip nih a tuahmi khuaruahhar thil le hmelchunhnak hna kha a hmuh tikah a khuaruah a har tuk.
14 Samaria mi nih Pathian bia an cohlan cang ti kha Jerusalem khua i a ummi lamkaltu hna nih an theih tikah Peter le Johan kha an thlah hna. 15 Samaria ram an phanh tikah zumtu hna nih thiang thlarau an hmuh nakhnga thla an campiak hna. 16 Zumtu hna cu Bawipa Jesuh min in tipil lawng an ing rih, ahohmanh thiang thlarau an hmu rih lo. 17 Cucaah Peter le Johan nih an cung ah an kut an chuan tikah thiang thlarau kha an hmuh.
18 Lamkaltu hna nih an kut an chuan tikah thiang thlarau an hmu ti kha Simon nih a hmuh tikah tangka a pek hna i, 19 “An cung ah ka kut ka chuanmi paoh nih thiang thlarau an hmuh nakhnga hi ṭhawnnak hi ka pe ve u” tiah a hal hna. 20 Peter nih “Pathian pekmi laksawng kha tangka in cawk khawh a si rua tiah na ruah caah nangmah he, na tangka he va loral u. 21 Pathian hmaiah na lungput a hmaan lo caah hi rian ah naa tel kho hrimhrim lai lo. 22 Cucaah na sualnak i ngaichih law a ṭhalomi na ruahnak hi ngaihthiam na si nakhnga Jehovah* Pathian sinah lungtak tein thla va cam. 23 Na lungthin chung ah siivai le ṭhatlonak in a khahmi kha ka hmuh” tiah a ti. 24 Mah tikah Simon nih “Na chimmi pakhat hmanh ka cung ah a tlun nakhnga lo Jehovah* sinah thla rak ka campiak” tiah a nawl.
25 Lamkaltu hna nih felfai tein tehte an khaan i Jehovah* bia kha an chim. Mah hnuah Jerusalem ah an kir pah in Samaria khua tampi ah thawngṭha an chim.
26 Jehovah* vancungmi nih Filip kha “Tho law Jerusalem khua in Gaza lei ah a zuangmi lam ning in thlanglei ah va kal” tiah a ti. (Mah lam cu thetse ram lam a si.) 27 Filip cu a tho i a kal. Mah tikah Ethiopia siangpahrang nu Kandeis i chawva zohkhenhtu le bawi a simi, Ethiopia bawi* pakhat kha a hmuh. Anih cu Jerusalem khua ah Pathian biak awkah a kal i, 28 a kirlei a si. A rangleng cung ah a ṭhu i profet Isaiah cauk kha aw thangpi in a rel. 29 Mah tikah thiang thlarau nih Filip kha “Va kal law khi rangleng khi va naih tuah” tiah a ti. 30 Filip cu rangleng pawng ah a va tli i Isaiah cauk a relmi kha a theih tikah “Na relmi hi a sullam na hngal maw?” tiah a hal. 31 Cu bawi nih cun “Aho tal nih a sullam an ka chimh lo ahcun zeitindah ka hngalh khawh lai?” tiah a ti. Cun Filip kha rangleng cung ah ṭhut ve awkah a sawm. 32 A relmi cacaang cu mah hi a si: “Thah dingmi tuu bantuk in amah kha an kalpi. A hmul mettu hmaiah dai tein a ummi tuufa bantuk in bia kaakhat hmanh a chim lo. 33 Ningzahnak a in chung vialte ding tein bia an ceihpiak lo. Vawleicung i a nunnak cu lak a si cang caah a chuahkehnak kong a dikthliar kha aho nih dah a chim ti lai?”
34 Cu bawi nih cun Filip kha “Profet nih aho kong dah a chim? Amah kong maw asiloah midang kong dah? Rak ka chim tuah” tiah a ti. 35 Filip nih mah cacaang in a thawk i Jesuh kong thawngṭha kha a chimh. 36 Cutin an kal lengmang lioah ti a umnak hmun kha an phan i “Zoh hmanh! Hika ah ti a um ko; tipil ka in nakhnga lo zeinihdah a ka dawnh lai?” tiah a ti. 37* —— 38 Cun cu bawi nih cun rangleng kha a dirter. An pahnih in ti chung ah an ṭum i Filip nih tipil a pek. 39 Ti chung in an hun chuah tikah Jehovah* thiang thlarau nih Filip cu a lak colh caah cu bawi nih cun a hmu ṭhan ti lo. Anih zong a kalnak ding lam ah lunglawm tein a lan. 40 Filip cu Ashdod khua ah a phan i cuka in Sisaria khua tiang khua kip ah thawngṭha kha a chimh hna.