Hebru

2 Cucaah zumhnak in duhsah duhsah in kan pial sual nakhnga lo kan theihmi kong kha a hlan nakin lungthin kan pek deuh a hau. 2 Vancungmi hna sinin Pathian chimmi bia cu a hmaan i nawl a buarmi le nawl a ngai lomi hna cu ding tein dantat an si ahcun, 3 hi tluk in a nganmi khamhnak bia hi zei rel loin kan um ahcun zeitindah dantatnak in cun kan luat khawh lai? Zeicahtiah Bawipa nih khamhnak kong cu a rak chim hmasa bik i a theimi hna nih an kan chimh chin. 4 Cun Pathian nih hmelchunhnak, khuaruahhar thil le thil lianngan a phunphun a tuah i thiang thlarau kha a duhnak ning in a pek hnanak thawng in an chimmi bia a hmaan ti kha a langhter.

5 Atu i kan chimmi, a hung um dingmi vawlei uk awkah Pathian nih vancungmi kha rian a pe hna lo. 6 Tehte pakhat nih hitin a chim bal: “Minung hi zeidah a si i na philh lo, mi fapa hi zeidah a si i na zohkhenh? 7 Amah cu vancungmi hna nakin tlawmte niam deuh ah na ser; sunparnak le upatnak in na hlorh. Na kut in na sermi thil hna kha uk awkah rian na pek. 8 Zeizong vialte kha a ke tang ah na chiah hna.” Pathian nih zeizong vialte a ukter tikah a ukter lomi zeihmanh a um lo. Atu ah Jesuh nih zeizong vialte a ukmi kha kan hmu rih lo. 9 Asinain vancungmi hna nakin tlawmte niam deuh ah ser a simi Jesuh cu thihnak a in ruang ah sunparnak le upatnak in hlorh a simi kha cu kan hmuh. Pathian velngeihnak thawng in mi vialte caah thihnak kha a in.

10 Zeizong vialte cu Pathian sunparnak caah le Pathian thawng in a ummi an si. Fale tampi nih sunparnak an hmuh nakhnga Hruaitu kha sifah harnak in awkah Pathian nih a awnhmi cu aa tlakmi a si. Cuticun Hruaitu cu anmah khamh awkah sining a hun tlinh. 11 Thiantertu Jesuh le thianter a simi hna cu an pa aa khat. Cucaah annih kha unau tiah auh awkah Jesuh cu a ning a zak lo. 12 “Ka unau hna sinah na min cu ka thanh lai; aa pummi mibu lakah hla in kaan thangṭhat lai” tiah a ti. 13 Cun “Pathian kha kaa bochan lai,” “Jehovah* nih a ka pekmi ngakchia hna he hika ah ka um” ti zong in a ti.

14 Mah “ngakchia” hna cu thi le sa in a nungmi an si caah Jesuh zong nih thi le sa kha aa lak ve. Mah cu a thihnak thawng in thihnak a chuahtertu Satan kha a hrawh khawh nakhnga caah a si. 15 Cun thihnak an ṭih ruang ah an nun chung vialte sal bantuk a simi kha a luatter hna nakhnga ca zong ah a si. 16 A tak ti ahcun Jesuh nih a bawmhmi hna cu vancungmi kha an si lo, Abraham tefa tu kha an si. 17 Jesuh cu zeizong kip ah a “unau hna” he aa lawh a hau ko. Cuticun Pathian rianṭuannak ah zaangfahnak a ngeimi le zumhawk a tlakmi tlangbawi ngan a hung si kho lai. Mah lawng ah minung sualnak caah sual thawinak kha a pek khawh lai. 18 Hneksaknak a ton lioah amah theng nih fahnak a in caah hneksaknak a tongmi kha a bawmh khawh hna.